.jpg)
លោកស្រី តាត គឹមលន ភរិយាលោក គង្គ ប៊ុនឈឿន នៅអាកាសយានដ្ឋានអន្តរជាតិភ្នំពេញ។ រូបថត យូសុះ អាប់ឌុលរ៉ាស់ហ៊ីម
ភ្នំពេញៈ ក្រោយពីផ្ទុះការរិះគន់ជាច្រើនពីសំណាក់ប្រជាជនខ្មែរទៅលើការលួចចម្លងនូវចម្រៀងមរតកដើមបទ «នឹកភូមិភ្នំធំ» របស់កវីម្ចាស់ដងស្ទឹងសង្កែលោក គង្គ ប៊ុនឈឿន ពីសំណាក់ផលិតកម្មសាន់ដេនៅថ្ងៃទី ១៥ ខែមីនា លោកស្រី តាត គឹមលន ភរិយាកវីជើងចាស់ គង្គ ប៊ុនឈឿន បានធ្វើដំណើរមកដល់កម្ពុជាក្នុងគោលបំណងប្រារព្ធខួប ៣ ឆ្នាំរបស់ស្វាមី និងស្វែងរកយុត្តិធម៌ជូនក្រុមគ្រួសារពីការលួចចម្លងស្នាដៃដោយគ្មានការអនុញ្ញាត។
លោកស្រី តាត គឹមលន អាយុ ៧៦ ឆ្នាំបានប្រាប់ឲ្យ ភ្នំពេញប៉ុស្តិ៍ ដឹងថា៖ «បញ្ហាចម្រៀងខ្ញុំពឹងទៅលើក្រសួងវប្បធម៌ទុកឲ្យគាត់សម្រេចចិត្តចាត់ការការងារនេះ។ ចំពោះខ្ញុំរឿងលុយកាក់ជាសំណងមិនសំខាន់ជាងសំណងផ្លូវចិត្តស្នាដៃរបស់អ្នកនិពន្ធដែលមានទេ។ ខ្ញុំមានការឈឺចាប់ណាស់។ ខ្ញុំហួសចិត្តព្រោះក្មេងសម័យនេះគេធ្វើដូចលេងសើចធ្វើឲ្យបាត់បង់អស់កេរដំណែលស្នាដៃជំនាន់មុនដ៏កម្រដែលយើងមិនអាចធ្វើបាន»។
កន្លងទៅអ្នកនិពន្ធទំនុកច្រៀង និងអ្នកសម្រួលបទភ្លេងរបស់ផលិតកម្មសាន់ដេ បានចេញមុខធ្វើការបកស្រាយសុំទោសជាសាធារណៈ និងព្រមទទួលយកកំហុសដោយបានលុបបទចម្រៀងចម្លងមានចំណងជើងថា «អូនជាអ្នកមានសមនឹងអ្នកមានដូចគ្នា» ដែលច្រៀងដោយ នាយចឺម ចេញពីយូធូប និងផលិតកម្មខ្លួន។
បទចម្រៀងដែលត្រូវបានសាន់ដេដកចេញពីយូធូប និងផលិតកម្ម។ រូបថត Youtube
ប៉ុន្តែទាក់ទងនឹងការសុំទោសពីផលិតកម្មសាន់ដេ ភរិយាលោក គង្គ ប៊ុនឈឿន បញ្ជាក់ថា៖ «ខ្ញុំអត់អាចទទួលយកការសុំទោសបានទេព្រោះសុំទោសនេះលក្ខណៈខ្លាចអន់»។
មកដល់ពេលនេះស្នាដៃរបស់លោក គង្គ ប៊ុនឈឿន ដែលបានចុះបញ្ជីគ្រប់គ្រងមានចំនួន ៤១ បទ និងត្រៀមដាក់រៀបចំឯកសារដាក់បញ្ចូលបន្ថែមទៀត។
ចំណែកបទ «នឹកភូមិភ្នំធំ» គឺមិនស្ថិតក្រោមការគ្រប់គ្រងរបស់គ្រួសាររបស់លោក គង្គ ប៊ុនឈឿន ឡើយ ខណៈដែលមិនទាន់មានឯកសារគ្រប់គ្រាន់ក្នុងការផ្ទេរកម្មសិទ្ធិ។ ដូចនេះបទ «នឹកភូមិភ្នំធំ» ស្ថិតក្រោមការគ្រប់គ្រង និងជាកម្មសិទ្ធិរបស់ក្រសួងវប្បធម៌ និងវិចិត្រសិល្បៈ។
លោក ស៊ឹម សត្តា ប្រធាននាយកដ្ឋានសិទ្ធិអ្នកនិពន្ធ និងសិទ្ធិប្រហាក់ប្រហែលនៃក្រសួងវប្បធម៌ និងវិចិត្រសិល្បៈបានឲ្យដឹងថា៖ «ផលិតកម្មសាន់ដេបានរំលោភបំពានលើសិទ្ធិបេតិកភណ្ឌរបស់អ្នកនិពន្ធយកបទហ្នឹងផលិតឡើងវិញឲ្យអ្នកចម្រៀងថ្មីច្រៀងឡើងវិញមិនមានការអនុញ្ញាតពីក្រសួងវប្បធម៌ និងរំលោភលើសិទ្ធិសីលធម៌របស់អ្នកនិពន្ធគឺមិនគោរពឋានៈឈ្មោះរបស់អ្នកនិពន្ធ។ ដូចនេះក្រសួងវប្បធម៌កំពុងតែដំណើរនីតិវិធីប្រមូលភ័ស្តុតាងទាំងអស់ដែលអាចនឹងកោះហៅ ឬរៀបចំនីតិវិធីប្តឹងតែម្តងព្រោះក្រសួងជាម្ចាស់កម្មសិទ្ធិ»។
ចំណែកលោកស្រី តាត គឹមលន អះអាងថាបើលោកស្រីមិនធ្វើបែបនេះទេគឺអ្នកសិល្បៈជំនាន់ថ្មីនឹងមិនខិតខំប្រឹងប្រែងបង្កើតស្នាដៃរបស់ខ្លួនឡើយ ហើយនឹងនៅតែចាំចម្លងស្នាដៃពីអ្នកដទៃជានិច្ចដោយមិនគិតវប្បធម៌ជាតិ និងតម្លៃនៃសិល្បៈខ្មែរឡើយ។
ភ្នំពេញ ប៉ុស្តិ៍ បានព្យាយាមទូរស័ព្ទសុំការស្រាយបំភ្លឺពីម្ចាស់ផលិតកម្មសាន់ដេ លោក ឡាយ សុខចំរើន កាលពីចុងសប្តាហ៍ដោយលោកបានឆ្លើយថាជាប់រវល់ប្រជុំ៕
វីដេអូ៖
