ក្រុងសេអ៊ូល: កីឡដ្ឋាន Stade de France ក្រុងប៉ារីសទទួលមហាជនពេញ។ ពួកគេសុទ្ធតែយុវវ័យដែលពាក់អាវគ្របមួក មួកត្រចៀកទន្សាយចម្រុះពណ៌ និងអាវភ្លៀង ខណៈមេឃចាប់ផ្ដើមបង្អុរភ្លៀង។
ក្នុងវេលាបាញ់ផ្សែងអ័ព្ទ ក្រុមចម្រៀង BTS បានបង្ហាញខ្លួនលើវេទិកាតន្ដ្រីពីក្រោយប៉ឺតប៉ោងខ្លាលីអូយក្ស ២ ក្បាល។ គ្រងឈុតពណ៌ស ពួកគេលោតតាមចង្វាក់តន្ដ្រីពេញនិយម «Dionysus» ដើម្បីផ្ដល់ការកម្សាន្ដដល់អ្នកគាំទ្រកំពុងមមាញឹកលើកកាមេរ៉ាទូរស័ព្ទថត និងបាញ់ពន្លឺភ្លើងច្រូងច្រាង។
វាជាសញ្ញាចាប់ផ្ដើមសម្រាប់ក្រុមចម្រៀងបុរសកូរ៉េខាងត្បូងដែលមានសមាជិក ៧ នាក់កំពុងបំពេញបេសកកម្មទេសចរណ៍តន្ដ្រី «Love Yourself: Speak Yourself» បានមកដល់ទីក្រុងប៉ារីសរយៈពេល ២ រាត្រីកាលពីចុងសប្ដាហ៍មុន ក្រោយពីបញ្ចប់បេសកកម្មនៅទីក្រុងឡូសអេនជឺលេស ស៊ីកាហ្គោ និងកីឡដ្ឋាន Wembley ជានិមិត្តរូបទីក្រុងឡុងដ៍។
លោក Ben Beaumont-Thomas ជាការីនិពន្ធផ្នែកតន្ដ្រីនៃកាសែត The Guardian របស់អង់គ្លេសបានប្រាប់ទីភ្នាក់ងារព័ត៌មាន AFP ថា៖ «ក្រុម BTS បានទាក់ទាញក្រុមអ្នកគាំទ្រនៅបស្ចិមប្រទេសដោយគ្មានក្រុមចម្រៀងអាស៊ីណាធ្លាប់បង្កើតប្រវត្ដិសាស្ដ្រនេះឡើយ»។
លោកលើកហេតុផលថា៖ «ការស្ដាប់តន្ដ្រីអន្ដរជាតិកាន់តែងាយស្រួលធ្វើឲ្យអ្នកគាំទ្រស្ដាប់ចូលនឹងបទចម្រៀងមិនមែនភាសាអង់គ្លេស។ ការធុញទ្រាន់នឹងចម្រៀងបរទេសលែងជាឧបសគ្គសម្រាប់អ្នកគាំទ្រជុំវិញពិភពលោក»។
ភាពជោគជ័យរបស់ក្រុមចម្រៀងបុរសទាំងនេះអាចឈរលើមូលហេតុមួយផ្នែកដោយសារនៃការបញ្ជ្រាបវប្បធម៌តាមរយៈឧស្សាហកម្មនាំចេញរបស់កូរ៉េខាងត្បូងកើនឡើងដូចជា សម្លៀកបំពាក់ គ្រឿងសម្អាង និងម្ហូបអាហារ និងភ្ញៀវទេសចរផងដែរ។
ទំនាក់ទំនងយ៉ាងស្អិតរមួតរវាងក្រុមចម្រៀង និងអ្នកគាំទ្រដែលជោរជន់ពេញបណ្ដាញសង្គមជាមួយរូបភាពសែលហ្វី វីដេអូ និងសំណេរភាសាកូរ៉េ និងអង់គ្លេសបានឲ្យក្រុមអ្នកគាំទ្ររាប់លាននាក់នៅជុំវិញពិភពលោកហៅពួកគេថា «ទាហាន»។
ក្រុមចម្រៀងច្រៀងភាសាកូរ៉េ តែមិនបានបង្អាក់ចិត្ដអ្នកគាំទ្រខិតស្រែកច្រៀងតាមនោះទេ ដោយបទចម្រៀងត្រូវបានបញ្ចូលពាក្យពេចន៍អង់គ្លេស ហើយវីដេអូយូធូបរបស់ពួកគេក៏បានបកប្រែផងដែរ។
ភីឡែរ បុគ្គលិករោងចក្រផលិតរថយន្ដវ័យ ២២ ឆ្នាំបាននិយាយថា៖ «វីដេអូតន្ដ្រីរបស់ពួកគេបានផ្ដល់នូវភាពរីករាយប្រចាំថ្ងៃដល់ពួកយើង។ ខ្ញុំចូលចិត្ដសារក្នុងបទចម្រៀងរបស់ពួកគេ។ ពួកគេច្រៀងអំពីអ្វីៗគ្រប់យ៉ាងចាប់ពីបញ្ហាធ្លាក់ទឹកចិត្ដរហូតដល់វិបត្ដិក្នុងគ្រួសារ និងការមាក់ងាយជាដើម»៕ HR