ក្រុងសេអ៊ូល៖ ភាពយន្ដដំបូងស្ដីពីរឿងរ៉ាវការជួយសង្គ្រោះក្រុមបាល់ទាត់វ័យក្មេង និងគ្រូបង្វឹកចំនួន ១២ នាក់ ពីក្នុងល្អាងភ្នំថៃ បានដាក់បញ្ចាំងលើកដំបូងកាលពីថ្ងៃសៅរ៍ ហើយបុរសម្នាក់ក្នុងចំណោមទស្សនិកជនជាអ្នកបានជួបបទពិសោធដ៏រន្ធត់នោះ។
ជាអ្នកសង្គ្រោះក្នុងហេតុការណ៍នោះ លោក ជីម វ៉ានី បានប្រាប់ AFP ថា៖ «ពិបាកក្នុងអារម្មណ៍ណាស់ បើរំឭកព្រឹត្ដិការណ៍ឡើងវិញ តែវាក៏ជាហេតុការណ៍ដ៏គួរឲ្យរញ្ជួយអារម្មណ៍ និងធូរទ្រូង ពេលគ្រោះអាក្រក់នោះបានកន្លងហួស»។
ជនជាតិបែលហ្ស៊ិករស់នៅប្រទេស អៀរឡង់ រូបនេះស្ថិតក្នុងចំណោមក្រុមការងារអ្នកមុជទឹកអន្ដរជាតិដោយចូលសង្គ្រោះ ដែលបានយកក្រុមបាល់ទាត់ជ្រូកព្រៃ និងគ្រូបង្វឹកចេញពីល្អាងថាមលួងណាងណុន កាលពីឆ្នាំមុន ហើយលោកបានធ្វើដំណើរទៅចូលរួមមហោស្រពភាពយន្ដអន្ដរជាតិក្រុងប៊ូសាន សម្រាប់ការដាក់បញ្ចាំងភាពយន្ដដ៏គួរឲ្យតក់ស្លុតរឿង «The Cave»។
លោក វ៉ានី បានសម្ដែងផ្ទាល់ក្នុងភាពយន្ដនេះ និងបាននិយាយថា បទពិសោធសម្ដែងក្នុងភាពយន្ដជាលើកដំបូងរបស់លោក ពិតជាមិនឆ្ងាយពីតថភាពពិតទេ។
ដឹកនាំដោយផលិតករកូនកាត់ថៃ-អៀរឡង់ ថម វ៉ុលល័រ ភាពយន្ដ «ល្អាង» រៀបរាប់ពីហេតុការណ៍កើតឡើងចំពោះកុមារាថៃជាប់ក្នុងល្អាងរយៈពេល ១៨ ថ្ងៃ។ លោក វ៉ានី ទើបបានវិលត្រឡប់ទៅជួបក្រុមគ្រួសារ និងធ្វើការងារជាជាងអេឡិចត្រូនិកនៅប្រទេស អៀរឡង់ ដោយលោកមមាញឹកនឹងការលើកទូរស័ព្ទពីផលិតករភាពយន្ដ អ្នកផលិតកម្មវិធីទូរទស្សន៍ និងអ្នកកាសែត។
ខ្សែភាពយន្ដរបស់ វ៉ុលល័រ ផ្ដោតសំខាន់លើកិច្ចការសង្គ្រោះដ៏ប្ដូរផ្ដាច់ជាជាងផ្ដោតលើក្មេងៗ និងគ្រូបង្វឹក ដែលជាប់ក្នុងល្អាងនោះ។
របាយការណ៍ជាច្រើនបានរាយការណ៍ថា ពួកគេត្រូវបានផ្ដល់ប្រាក់ជាង ១០ ម៉ឺនដុល្លារម្នាក់ ហើយក៏មានការថតជាឯកសារក្នុងកម្មវិធីទូរទស្សន៍ National Geographic ដោយសហការជាមួយក្រុមការងារដែលបានស្ទួយឲ្យភាពយន្ដ «Free Solo» ជាប់ពានអូស្ការ។
ភាពយន្តរឿង «ល្អាង» គ្រោងដាក់បញ្ចាំងនៅប្រទេស ថៃ ថ្ងៃទី ២៨ ខែ វិច្ឆិកា និងបន្ដទៅកាន់ទីផ្សារភាពយន្ដដទៃទៀត៕ AFP/HR