The Phnom Penh Post Search

Search form




Logo of Phnom Penh Post newspaper Phnom Penh Post - ភាព​យន្ដ​ខ្នាតខ្លី​ខ្មែរ​ រឿងក​ង់បី​ ឈ្នះពាន Youth Jury Prize




ភាព​យន្ដ​ខ្នាតខ្លី​ខ្មែរ​ រឿងក​ង់បី​ ឈ្នះពាន Youth Jury Prize

Content image - Phnom Penh Post
ឈុត​សម្តែង​មួយ​នៅ​ភាព​យន្ដ​ខ្នាត​ខ្លី​រឿងកង់បី ឬ Three Wheels របស់លោក នាង កាវិច។ រូប សហការី

ភាព​យន្ដ​ខ្នាតខ្លី​ខ្មែរ​ រឿងក​ង់បី​ ឈ្នះពាន Youth Jury Prize

ភ្នំពេញ: ​ភាព​យន្ដ​ខ្លី​រឿង​កង់បី ឬ Three Wheels ជា​វណ្ណកម្ម​របស់​ផលិត​ករ​ខ្មែរ​ នាង កាវិច បាន​ឈ្នះ​ពានរង្វាន់​ Youth Jury Prize ក្នុង​ការ​ប្រកួត​ Southeast Asian Short Film Competition នា​ឱកាស​ប្រារព្ធ​កម្មវិធី​មហោ​ស្រពភាព​យន្ដ​អន្ដរជាតិ​សិង្ហ​បុរី​ (SGIF) លើកទី ២៦ ដែល​ធ្វើនៅ​ប្រទេស​សិង្ហបុរីកាល​ពីថ្ងៃ​ទី ២៦ ខែ​វិច្ឆិកា​ដល់ថ្ងៃទី ៦ ខែ​ធ្នូ​ ឆ្នាំ ២០១៥ កន្លង​មក​នោះ​។

កម្ម​វិធី SGIF ​បង្កើត​ឡើង​ក្នុង​គោល​បំណង​ប្រមូល​ផ្តុំនូវ​ស្នា​ដៃ​ភាព​យន្ដ​របស់​ផលិតករ​នៅ​តំបន់​អាស៊ីអាគ្នេយ៍​ដើម្បី​បង្ហាញ​​ឲ្យ​ទស្សនិក​ជន ​បាន​ស្គាល់អំពី​ទេពកោសល្យ​របស់​ផលិត​ករ​ និង​ប្រកួត​យក​ពាន Silver Screen​ Awards ប្រចាំ​ឆ្នាំ ២០១៥​ ដោយ​មាន​ចំនួន ១៤៦ រឿង​ មក​ពី​ចំនួន ៥១ ប្រទេសបាន​ចូល​រួម ខណៈ​កម្ពុជា​យើង​មាន​ពីរ​​គឺ​ភាព​យន្ដ​រឿង ​អ្នករើស​អេតចាយ​ និង​រឿង​ កង់បី។

Content image - Phnom Penh Post
លោក នាង កាវិច ជាផលិត​ករភាព​យន្ដ​ខ្នាត​ខ្លីវ័យ​ក្មេង​កម្ពុជា។ រូប សហការី

ពិតជា​គួរ​ឲ្យ​កោត​សរសើរ និង​ជា​ទី​មោទន​ភាព​ណាស់​ដែរ​ នូវ​​ពន្លក​ដុះ​ដាលលើ​​វិស័យ​ផលិត​ខ្សែ​ភាពយន្ដ​​ខ្នាតខ្លី​របស់​យុវ​វ័យ​ខ្មែរ​នា​សម័យ​ទំនើប​ ដែល​កំពុង​តែលូត​ឡើង​សន្សឹមៗ​ និង​បាន​នាំមុខ​​មាត់​ប្រទេស​ជាតិរបស់​ខ្លួន​បង្ហាញ​​នៅ​​លើ​ឆាក​អន្ររជាតិ​។ ​

តួ​យ៉ាងដូច​ជា​ភាព​យន្ដ​រឿង​​ កង់​បី ដែល​និយាយ​ពីអាពាហ៍​ពិពាហ៍​ និង​​ការ​ណាត់​ជួប​​របស់​ប្រជាជន​ខ្មែរ​ក្នុង​សម័យ​ខ្មែរ​​ក្រហម​ ​និង​ធ្លាប់​​ជាប់​ជម្រើស​នាពេលចាក់​បញ្ចាំង​​នៅ​ក្នុង​កម្មវិធី ​20th មហោ​ស្រព​ភាពយន្ដ​អន្ដរជាតិ​ក្រុងប៊ូសាន កូរ៉េ​ខាងត្បូង​កន្លងមក​នោះ គឺ​​ជា​វណ្ណកម្ម ​កុល​បុត្រ​ខ្មែរ​ នាង កាវិច ជាដើម​។

ខូវ ស៊ូពីង​ បុគ្គលិកនៅ​ផ្នែក​ទំនាក់ទំនង​សាធារណៈ​នៃកម្ម​វិធី​មហោ​ស្រព​ភាពយន្ដ​អន្ដរជាតិ​សិង្ហបុរី​នោះបាន​ឲ្យ​ដឹង​ថា៖ «ការ​ប្រកួត​ប្រជែង​យក​ពាន​ Asian Feature Film Competition និង​ការ​ប្រកួត​ភាពយន្ដខ្លី​ប្រចាំ​តំបន់​អាស៊ី អាគ្នេយ៍​ ក្នុង​កម្មវិធី​ SGIF ឆ្នាំ ២០១៥ នេះ​ យើង​បែង​ចែក​ខុសៗ​គ្នា។ សម្រាប់​ Asian Feature Film Competition មាន​ពានរង្វាន់​ដូច​ជា​ ភាព​យន្ត​ខ្លី​ឆ្នើម​របស់សិង្ហបុរី ​អ្នក​ដឹកនាំ​រឿង​ឆ្នើម ​Special Mention និង​ Youth Jury Prize ខណៈ ការ​ប្រកួត​ភាពយន្តខ្លី​ប្រចាំ​អាស៊ី អាគ្នេយ៍​ វិញ​មាន​ពានរង្វាន់​ដូច​ជា​ ខ្សែ​ភាពយន្ត​ឆ្នើម អ្នកដឹក​នាំ​រឿង​ឆ្នើម ការ​សម្ដែង​ឆ្នើម និង Special Mention»។

សម្រាប់​អ្នក​ឈ្នះ​ពាន​រង្វាន់​ទាំង​អស់គឺ​សុទ្ធ​តែ​ទទួល​បាន​​នូវ​​វិញ្ញា​ប​ន​បត្រ​មួយសន្លឹក​ ពាន​មួយ និង​ទឹក​ប្រាក់មាន​ចំនួន​ផ្សេងៗ​គ្នា​។ សម្រាប់​ពាន​រង្វាន់​ Youth Jury Prize បេក្ខជន​ជយលាភី​ នាង កាវិច ​ទទួល​បាន​ទឹក​ប្រាក់ចំនួន $ ៥០០៕​

អត្ថបទគួរចាប់អារម្មណ៍