ភ្នំពេញ៖ ដោយសារតែចង់បណ្តុះបណ្តាលឲ្យកុមារខ្មែរមានទេពកោសល្យលើវិស័យសិល្បៈដើរបង្ហាញម៉ូដ និងអាចជួយវិស័យនេះឲ្យមានការរីកចម្រើន មានកម្រិតស្តង់ដាអន្តរជាតិ អាចប្រកួតប្រជែងនឹងគេបាន ភ្នាក់ងារអឹរ៉ាយស៍អេជេនស៊ី (Arise Agency) បើកវគ្គបង្រៀនដើរបង្ហាញម៉ូដដល់កុមារខ្មែរជាលើកដំបូង។
លោក ម៉ែន និមលរ័តន៍ ជាប្រធានប្រតិបតិ្តនៃភ្នាក់ងារអឹរ៉ាយស៍ អេជេនស៊ី ដែលបណ្តុះបណ្តាល និងការបញ្ជូនបេក្ខភាពកញ្ញាឯកខ្មែរប្រចាំឆ្នាំ សម្រាប់ការប្រកួតនានា បានឲ្យភ្នំពេញប៉ុស្តិ៍ ដឹងថា៖ «នេះគឺការបើកវគ្គបង្រៀនថ្នាក់ដើរបង្ហាញម៉ូដជាលើកដំបូងនៅខ្មែរ សម្រាប់កន្លែងយើង។ ការបណ្តុះបណ្តាល ១ អាទិត្យមាន ៣ ថ្ងៃ គឺចន្ទ ពុធ និងសុក្រ ខណៈយើងបង្រៀន ១ ថ្ងៃ ចំនួន ២ ម៉ោង (ម៉ោង ៤ ដល់ម៉ោង ៦ ល្ងាច) ថ្លៃសិក្សា ១ ខែ តម្លៃ ១០០ ដុល្លារ»។
លោក ម៉ែន និមលរ័តន៍ បញ្ជាក់ពីគោលបំណងនៃការបើកវគ្គនេះថា៖ «ព្រោះចង់ឲ្យវិស័យដើរម៉ូដនៅស្រុកខ្មែរដើរទាន់ប្រទេសគេជិតខាង ឬក្នុងតំបន់ ដែលមានការរីកចម្រើន ហើយអ្នកដើរម៉ូដរបស់គេគឺពោរពេញទៅដោយសមត្ថភាព និងមានភាពស្ទាត់ជំនាញ។ ក្រោយពីឆ្លងកាត់បទពិសោធដែលចេញទៅក្រៅប្រទេសច្រើន ហើយទទួលបានបទពិសោធក៏ច្រើនដែរនោះ ទើបយល់ថា គួរតែមានបើកថ្នាក់បង្រៀនកុមារខ្មែរឲ្យមានភាពស៊ាំតាំងពីក្មេងវ័យទៅ ទើបពួកគាត់អាចដើរទាន់គេ ឬមានភាពចេះស្ទាត់ជំនាញតាំងពីក្មេងទៅតែម្តង ទើបអាចជួយឲ្យវិស័យដើរម៉ូដយើងអាចប្រកួតប្រជែងជាមួយប្រទេសនានានៅលើសកលបាន។ តែទោះជាយ៉ាងណាក្តី ការបើកបង្រៀនដើរម៉ូដទៅដល់ប្អូនៗកុមារនេះ មិនបានជះឥទ្ធិពលដល់ការសិក្សារៀនសូត្រនោះឡើយ គឺយើងនៅតែបន្តជំរុញឲ្យពួកគាត់ផ្តោតលើការសិក្សាច្រើនដដែល។ ការដើរបង្ហាញម៉ូដនេះ គ្រាន់តែជាជម្រើសក្រៅម៉ោងសិក្សារបស់កុមារប៉ុណ្ណោះ ប្រសិនបើពួកគាត់ចូលចិត្តវិស័យនេះ។ ប្រសិនបើពួកគាត់មានចំណូលចិត្ត និងអាចមានភាពស៊ាំទាំងក្មេងវ័យនោះ គឺរឹងរឹតតែអាចជួយឲ្យពួកគាត់ទទួលអត្ថប្រយោជន៍ពេលធំ និងស្ទាត់ជំនាញលើវិស័យដើរម៉ូដរួចជាស្រេច»។
លោក ម៉ែន និមលរ័តន៍ ក៏បានបញ្ជាក់ឲ្យដឹងពីការបើកវគ្គបង្រៀនដើរម៉ូដដល់កុមារជាលើកដំបូងនេះ ដែលតម្រូវឲ្យមានការបង់ថ្លៃសិក្សាដែរថា៖ «យើងបានបើកបង្រៀនដោយឥតគិតថ្លៃ ក៏ព្រោះតែយើងត្រូវចំណាយច្រើនសម្រាប់វគ្គបណ្តុះបណ្តាលមួយនេះ ដូចជាការចំណាយទៅលើថ្លៃជួលគ្រូ និងចំណាយទៅលើថ្លៃជួលទីកន្លែងសម្រាប់ការបង្ហាត់បង្រៀនផងដែរ»។
តាមបទពិសោធវិស័យដើរម៉ូដនៅក្នុងសង្គមកម្ពុជា គឺពិតជានៅមានលក្ខណៈមិនទាន់ល្អគ្រប់គ្រាន់ ដើម្បីប្រកួតប្រជែងជាមួយនឹងបណ្តាប្រទេសគេបានឡើយ ព្រោះថាវាហាក់ដូចជានៅខ្វះវិធីសាស្រ្តដើម្បីបណ្តុះបណ្តាលទេពកោសល្យពីក្មេងវ័យ ខណៈនៅឯប្រទេសគេវិញគឺបានហ្វឹកហាត់តាំងពីក្មេងវ័យមក។
លោក ម៉ែន និមលរ័តន៍ ក៏បានអះអាងថា៖ «ប្រសិនបើយើងមិនបានបើកវគ្គបង្រៀនដើរបង្ហាញម៉ូដដល់កុមារតាំងពីក្មេងវ័យនោះទេ គឺថាវិស័យដើរម៉ូដនៅស្រុកខ្មែរនៅតែមានភាពដើរយឺតៗ មិនអាចតាមទាន់គេដដែល។ ម្យ៉ាងទៀត ក្រុមដើរម៉ូដ ពេលធំពេញវ័យ គឺមើលទៅហាក់ដូចជានៅមិនទាន់មានភាពស្ទាត់ជំនាញដូចជាការផ្ស៊ាំតាំងពីពេលនៅក្មេងនោះឡើយ»។
សម្រាប់ព័ត៌មានលម្អិតស្តីពីការបើកបង្រៀនដើរម៉ូដកុមាររបស់ភ្នាក់ងារអឹរ៉ាយស៍ អេជេនស៊ី អាចធ្វើការទំនាក់ទំនងតាមប្រព័ន្ធលេខទូរស័ព្ទ ០៩៣ ៥៩ ៤៤៤៤ ដើម្បីចុះឈ្មោះបុត្រធីតាលោកអ្នកឲ្យចូលរៀន៕