The Phnom Penh Post Search

Search form




Logo of Phnom Penh Post newspaper Phnom Penh Post - ភ្លក្សរសជាតិ​បង្អែម​ក្រឡានខ្មែរ​ រូបមន្ដ​ដូនតា​អ្នក បាត់ដំបង​




ភ្លក្សរសជាតិ​បង្អែម​ក្រឡានខ្មែរ​ រូបមន្ដ​ដូនតា​អ្នក បាត់ដំបង​

Content image - Phnom Penh Post
យាយ សយ ហួយ អង្គុយចម្អិន​ក្រឡាន​តាម​រូបមន្ដ​ដែល​ម្ដាយ​របស់​គាត់​បង្ហាត់បង្ហាញ។ Kimberley Mccosker

ភ្លក្សរសជាតិ​បង្អែម​ក្រឡានខ្មែរ​ រូបមន្ដ​ដូនតា​អ្នក បាត់ដំបង​

បាត់ដំបង: លើ​វិថី​ក្នុង​ភូមិ​សាស្រ្ដភូមិសំរោង​ក្នុង ឃុំ​សំរោងក្នុង​ ស្រុក​ឯកភ្នំ​ ​ខេត្ដបាត់​ដំបង លោកយាយ សយ ហួយ អាយុ ៧១ ឆ្នាំ អង្គុយ​រួយភ្លើងធ្យូង​ដើម្បី​ដុតបំពង់​ឫស្សីញាត់​អង្ករ​ដំណើប​លាយ​សណ្ដែក​សៀង និង​ដូង​ដ៏​ឈ្ងុយ​ដែលតម្រៀប​ជាជួរក្រោម​ខ្ទម​ប្រក់ស្លឹក​ត្នោតមួយ​។

លោក​យាយ ហួយ ដែល​មាន​ទម្លាប់​ក្រោក​ពីដំណេក​នៅ​ម៉ោង ៤ ទៀបភ្លឺ​រៀង​រាល់ថ្ងៃ​ដើម្បី​ធ្វើ​នំក្រឡាន​តាំងពី​ទសវត្សរ៍​ទី ៨០ បាន​និយាយ​ប្រាប់​ថា​៖ «​ម្ដាយ​របស់ខ្ញុំ​បាន​បង្រៀន​ខ្ញុំ​ពីវិធី​ធ្វើ​ក្រឡាន​ ពេលខ្ញុំ​នៅ​ក្មេង​។ ខ្ញុំ​ចូលចិត្ដ​រសជាតិ​របស់​វា ហើយ​ខ្ញុំ​គិត​ថា ក្រឡាន​ជា​បង្អែម​ខ្មែរ​មួយ​បែប​ដែលអាច​លក់​ដាច់​ច្រើន​។ វាគ្មាន​រូបមន្ដ​ផ្សំ​ជាក់​លាក់​ណាមួយ​ទេ ប៉ុន្ដែ​ប្រជាជន​ខ្មែរ​ចូលចិត្ដ​វា​ណាស់​។ ដូច្នេះ​យើង​នៅ​តែ​បន្ដប្រកប​របរ​នេះ​រៀង​រហូត​មក​»។

លោក​បាន​ប្រាប់​អំពីវិធី​សាមញ្ញ​ៗ​ថា ក្រឡាន​នៅ​ឃុំសំរោង​ក្នុង​ ធ្វើ​ពី​អង្ករដំណើប​ត្រាំ​ទឹក​ សណ្ដែក​ខ្មៅ ខ្ទិះ​ដូង​ និង​ស្ក​រ​ញាត់​ក្នុង​បំពង់ឫស្សី​ ជា​បង្អែម​ខ្មែរ​ដ៏​ពេញ​និយម​នៅ​ទូទាំង​ប្រទេស​។ ប៉ុន្មាន​ឆ្នាំ​ចុងក្រោយនេះ ប្រជាជន​ដែល​ឆ្លង​កាត់​តំបន់​នេះ​មិន​ភ្លេច​ទិញ​ក្រឡាន​ដាក់​ឃ្លុបរថយន្ដ​ត្រឡប់​ទៅ​ផ្ទះ​វិញ​ឡើយ​។

កញ្ញា កួយ មួយហ្គេច​ អាយុ ១៦ ឆ្នាំ មក​ពី​ក្រុង​បាត់​ដំបង​ដែល​បាន​ចូល​ទិញ​ក្រឡាន​ពេល​ធ្វើ​ដំណើរឆ្លង​កាត់​ដោយ​ម៉ូតូ បាន​និយាយ​ថា​៖ «​ខ្ញុំ​តែងតែ​ចូល​ទិញ​ក្រឡាន​ទី​នេះ ជួន​កាល​ទិញផ្ញើ​បង​ប្អូន​នៅ​ភ្នំពេញ ឬ​អាមេរិក​ និង​អូស្ដ្រាលី​ទៀត​»។

Content image - Phnom Penh Post
រសជាតិ​ក្រឡាន​បាត់ដំបង​អន្ទង​ចិត្ត​ទេសចរ​ឲ្យ​ចុះ​ទិញ​។ Kimberley Mccosker

កញ្ញា​បន្ដថា​៖ «​ខ្ញុំ​ស្គាល់​កន្លែង​លក់​របស់​គាត់ដោយ​សារតែ​មិត្ដភក្ដិ​ធ្លាប់​ចូលទិញ​ផ្ញើ​ឲ្យ​ខ្ញុំ​។ ខ្ញុំ​ចូលចិត្ដ​រសជាតិ​ដូង​ និង​គ្រឿង​ផ្សំ​ផ្សេង​ៗ​ទៀត​»។ ​

​លោក អ៊ូច អ៊ុំធីនី សារ៉ា ជា​ប្រធាន​នាយកដ្ឋាន​ទេសចរណ៍​ខេត្ដ​បាត់ដំបង បាន​ឲ្យ​ដឹងថា អាជ្ញាធ​រមូលដ្ឋាន​តែងតែ​ធ្វើ​ការ​ផ្សព្វ​ផ្សាយ​ទេសចរណ៍​ម្ហូប​អាហារ​របស់​ពួកគេ​ ដែល​រួម​បញ្ចូល​ទាំង​ទី​អារាមដ៏ល្បី​ល្បាញ​ ផ្ទះ​បុរាណ​ខ្មែរ និង​ទេសភាព​វាល​ស្រែ​ចម្ការ​បរិយាកាស​បរិសុទ្ធ​ផងដែរ​។

លោក​ អ៊ុំធីនី សារ៉ា ​បន្ដថា​៖ «យើង​បាន​រៀបចំ​តំបន់​ទេសចរណ៍​ជា​៣​ផ្នែក​ផ្សេងគ្នា​ក្នុង​គម្រោង​អភិវឌ្ឍន៍​ដែល​លក់​ក្រឡាន ណែម និង​សម្បក​ខ្ចប់​ណែម​​ស្រដៀង​​បន្ទះ​ខ្ចប់​គួង​ដែរ»។

លោក ឌួង ផុន ជា​ប្រធាន​ភូមិ​សំរោង​ក្នុងឲ្យដឹង​ថា ភ្ញៀវ​ទេសចរ​​ជា​ច្រើន​បាន​មក​ទស្សនា​វត្ដ​សំរោង​ក្នុង​ ដែល​ធ្លាប់​ត្រូវ​បាន​ប្រើ​ជា​ពន្ធនាគារ​នៅ​សម័យ​ខ្មែរ​ក្រហម​ និង​ជា​កន្លែង​ផ្ទុក​អដ្ឋិធាតុ​ជនរង​គ្រោះ​ពី​របបនេះ​។

លោក​បាន​ឲ្យ​ដឹងថា៖ «​បច្ចុប្បន្ន​ មាន​ភ្ញៀវ​ច្រើន​មក​កម្សាន្ដ​តំបន់​ប្រវត្ដិ​សាស្ដ្រ​របស់​យើង និង​ទិញ​ក្រឡាន​ពី​ប្រជាជន​យើង​»។

Content image - Phnom Penh Post
ខ្ទមលក់​ក្រឡាន​ចម្អិន​ភ្លាម​ៗ​ស្ថិត​នៅ​តាមដង​ផ្លូវ។ Kimberley Mccosker

ក្រឡាន​របស់​លោកយាយ ហួយ លក់​ក្នុង​តម្លៃ​ពី ១០០០ ទៅ​ ៥០០០ រៀល​ទៅតាម​ទំហំ​បំពង់​ឫស្សី​ ដែល​លោក​យាយ​អាច​រកចំណូល​បាន​ប្រមាណ ២ ម៉ឺន​រៀល​ក្នុង​មួយ​ថ្ងៃ​។

យ៉ាង​ណាមិញ លោក​យាយ​ បាន​ឲ្យ​ដឹងថា លោក​យាយ​មិន​អាច​ធ្វើ​ក្រឡាន​ឲ្យ​បាន​ច្រើន​ដើម្បីផ្គត់ផ្គង់​ទី​ផ្សារ​បាន​ឡើយ។ ដូន​ចាស់​ដែល​​កូន​ស្រីតែ​ម្នាក់ទៅ​ធ្វើ​ការ​នៅ​ប្រទេស​ថៃ​ និង​ចិញ្ចឹម​បី​បាច់​ចៅ​ប្រុស​ម្នាក់​នៅ​ជួយ​ជំនួស​ដៃជើង​ខ្លះ​ៗ។

ប៉ុន្ដែ ដោយ​សារ​តែ​ការធ្វើ និង​លក់​មិន​មែន​ជា​កិច្ចការ​ងាយ​ស្រួល លោក​យាយ​នៅ​តែ​ចង់​អភិរក្ស​ទំនៀម​ទម្លាប់​ដូន​តា​ដើម្បី​បង្ហាញ​ភ្ញៀវ​ជាតិ និង​អន្ដរជាតិ​បាន​ទស្សនា​។

ដូន​ចាស់​រូប​នេះ បាន​ថ្លែង​បន្ថែម​ទៀត​ថា​៖ «គ្រួសារកូន​ស្រី​របស់​ខ្ញុំ​ក៏​ធ្លាប់​លក់​ក្រឡាន​ដែរ តែ​បច្ចុប្បន្នពួកគេ​ធ្វើ​ចំណាក​ស្រុក​នៅ​ប្រទេស​ថៃ​អស់​ហើយ​ ពីព្រោះ​កិច្ចការ​នេះ​ វា​លំបាក​ និង​មិន​អាចរកចំណូល​បាន​ច្រើន​ឡើយ​»៕ HR​

អត្ថបទគួរចាប់អារម្មណ៍