ក្រុងហេស៊ីនគី៖ វាជាជំនាញមួយដែលអ្នកនឹងមិនអាចបំភ្លេចបាននៅ ពេលបានរៀនរហូតដល់មានពាក្យស្លោកមួយថា «ការធ្វើចំណាកស្រុកទៅកាន់ហ្វាំងឡង់ អាចទទួលការរៀនជិះកង់ឥតគិតថ្លៃ ដើម្បីជួយពួកគេសម្របខ្លួនកាន់តែប្រសើរទៅនឹងប្រទេសស្រឡាញ់កង់មួយនេះ»។
នាព្រឹក អាកាសធាតុស្រឡះល្អ សិស្ស ៨ នាក់ មានឱកាសបានរៀនជិះកង់ក្នុងចំណតរថយន្ដទទេស្អាតមួយនៃក្រុងហេស៊ីនគី ជាទីដែលពួកគេត្រូវពាក់មួកសុវត្ថិភាព និងកាន់កង់ ១ គ្រឿងម្នាក់។
លោក Federico Ferrara មកពីសហព័ន្ធអ្នកជិះកង់ហ្វាំងឡង់ ដែលបើកគម្រោងនេះ បាននិយាយថា៖ «មនុស្សជាច្រើន ដែលមកហ្វាំងឡង់ ភាគច្រើនជាស្ដ្រី ពួកគេគ្មានចេះជិះកង់ទេ ហើយវាពិតជាសំខាន់ណាស់ចំពោះសង្គមហ្វាំងឡង់» ។
លោក Ferrara ទទូចថា ការរៀនជិះកង់ជួយផ្ដល់ថាមពលដល់អ្នកចំណូលថ្មី ជាពិសេសស្ដ្រីដែលពួកគេជាច្រើនមកពីតំបន់អាហ្រ្វិកខាងជើង ឬមជ្ឈិមបូព៌ា។
លោកនិយាយថា៖ «អតិថិជនរបស់យើងជាច្រើនរងនូវការមាក់ងាយចំពោះជំនាញជិះកង់នេះ ប្រហែលមកពីពួកគេឧស្សាហ៍ជិះដួល ពេលនៅក្មេង ហើយពួកគេបាក់ស្បាតលែងហ៊ានជិះទៀតរហូតដល់ពេល ២០ ឆ្នាំ ក្រោយទើបកាន់ដៃកង់ជាថ្មី»។
អ្នកបង្ហាត់បង្រៀនជួយទប់កង់ឲ្យសិស្សឡើងអង្គុយ ហើយសម្រាប់ក្រុមសិស្សទាំងនេះ បានស៊ាំជាមួយកង់ខ្លះៗ។ ទោះមិនទាន់រៀនទ្រឹស្ដីចប់សព្វគ្រប់យ៉ាងណាក៏ដោយ ក៏អ្នកបង្រៀនឈ្មោះ សាមី វីតានេន បានសម្រេចថា ក្រុមនេះបានឆ្លងផុតមួយវគ្គ និងនាំពួកគេទៅអនុវត្ដការជិះកង់ផ្ទាល់តែម្ដង។
ការជិះកង់ពិតជាពេញនិយមនៅប្រទេសដ៏ត្រជាក់មួយនេះ ដែលប្រជាជនជាងពាក់កណ្ដាលក្នុងទីក្រុងធ្វើដំណើរដោយការជិះកង់យ៉ាងហោចណាស់ម្ដងក្នុង ១ សប្ដាហ៍។
លោក Ferrara ដែលបានបង្រៀនអ្នកជិះកង់ដំបូង ៣២០ នាក់ ជាមួយសហការីរបស់លោកបានបន្ថែមថា៖ «បើពួកគេស្ថិតក្នុងមជ្ឈមណ្ឌលជនភៀសខ្លួន ពេលពួកគេមិនដឹងទៅណាពួកគេអាចជិះកង់តាមសហគមន៍យ៉ាងរីករាយ»៕ AFP/HR