.jpg)
លោក ប៉ា សុងហៀង និងសកម្មភាពជួយសង្គមចម្រុះរបស់លោកមានតាំងពីឆ្នាំ ២០០៥ មក។ សហការី
ក្រុងសៀមរាបៈ រួមដំណើរជាមួយសហការីគឺម៉ូតូ ១ គ្រឿង និងកាមេរ៉ា ១ គ្រឿង ជិះរុករកទីភូមិឋានពលរដ្ឋក្រីក្រខ្មែរ ដែលខ្វះអណ្តូងទឹកស្អាតប្រើ បុរសមានមុខមាត់ទំនងជាកូនកាត់ខ្មែរ-ចិន វ័យជិតសែសិបឆ្នាំ បានចំណាយពេលវេលាប្រមាណ ១៤ ឆ្នាំ ប្រឡូកជាអ្នកកៀរគរទទួលជំនួយមនុស្សធម៌ពីជនបរទេសធ្លាប់ជាភ្ញៀវមកកម្សាន្តស្រុកខ្មែរ ដោយលោកក៏ជាមគ្គុទ្ទេសក៍ទេសចរណ៍ក្រៅក្របខ័ណ្ឌ និងជាអ្នករត់រ៉ឺម៉កកង់បីជិត ២០ ឆ្នាំ នៅតំបន់ប្រាសាទបុរាណនានាក្នុងខេត្តសៀមរាបនោះនឹកចង់បើកជាអង្គការមួយ ដើម្បីជួយទៅដល់សហគមន៍ក្រីក្រ ដើម្បីសម្រេចក្តីសុបិនរបស់ខ្លួនបន្តដំណើរទៅមុខផងដែរ។
លោក ប៉ា សុងហ៊ាង ដែលធ្លាប់មានមុខរបរបែបចម្រុះដោយធ្វើជាមគ្គុទ្ទេសក៍ទេសចរណ៍ឯកជននៅតំបន់ប្រាសាទអង្គរ និងអ្នករត់រ៉ឺម៉កកង់បី ហើយលោកគឺជាអ្នកកៀរគរទទួលជំនួយមនុស្សធម៌ពីជនបរទេស ដែលលោកបានស្គាល់ ដើម្បីចុះទៅជួយសង់អណ្តូងទឹកស្អាត នៅតាមតំបន់សហគមន៍ក្រីក្រទូទាំងខេត្តសៀមរាប អស់រយៈពេល ១៤ ឆ្នាំ រួមទាំងមានសកម្មភាពបន្ទាប់បន្សំផ្សេងទៀត ដោយបានជួយសង់អណ្តូងទឹកស្អាតជិត ៧០០ អណ្តូង បានជួយសង់បណ្ណាល័យជូនសាលាបឋមសិក្សា ១ កន្លែង ជួយសង់ផ្ទះ និងជួយជួសជុលដំបូលសាលា ដែលធ្លុះធ្លាយមួយចំនួនដោយគិតពីឆ្នាំ ២០០៥ មក ឆ្នាំ ២០១៩ នេះសរុបការចំណាយប្រាក់ប្រហែលជា ៥០ ម៉ឺនដុល្លារ។
អគារបណ្ណាល័យសាលាបឋមសិក្សាជន្លង់ ដែលលោក សុងហៀង បានស្នើសុំជួយ។ សហការី
លោក ប៉ា សុងហ៊ាង ដែលដើរតួជាម្ចាស់គម្រោងផង និងជាកម្មករផង ក្នុងការនាំយកជំនួយចុះទៅជួយសង់អណ្តូងទឹកស្អាតជូនពលរដ្ឋខ្មែរតាមសហគមន៍ក្រីក្រ ក៏បង្ហើបឲ្យដឹងពីក្តីប្រាថ្នាមួយចង់មានជាទីស្នាក់ការអង្គការមួយសម្រាប់លោកមានគ្នាធ្វើកិច្ចការជួយសម្រួលសហគមន៍ក្រីក្រ ដែលលោកធ្លាប់ឆ្លងកាត់អស់រយៈពេលប្រមាណ ១៤ ឆ្នាំមកនេះផងដែរ ដោយលោកមិនធ្លាប់គិតថា ធ្វើទង្វើមនុស្សធម៌ជួយពលរដ្ឋខ្មែរក្រោមរូបភាពអ្វីផ្សេងទៀតនោះឡើយ។
លោកបង្ហើបប្រាប់ពីសមិទ្ធផលនៃការងារជួយសង្គមដោយដើរតួនាទីជាអ្នកកៀរគរទទួលជំនួយពីមិត្តភក្តិបរទេស តាំងពីឆ្នាំ ២០០៥ ថា៖ «បើគិតពីដំបូងមក (ឆ្នាំ ២០០៥) ដល់សព្វថ្ងៃនេះ សង់អណ្តូងបានជិត ៧០០ សង់អគារបណ្ណាល័យសាលាបឋមសិក្សាជន្លង់ ១ ក្នុងភូមិចន្លោង សង្កាត់ស្រងែ ក្រុងសៀមរាប នៅអំឡុងឆ្នាំ ២០១៤-២០១៥ ជួយសង់ផ្ទះ និងជួយជួសជុលដំបូលសាលា ដែលធ្លុះធ្លាយមួយចំនួន គិតជាប្រាក់គឺមិនតិចជាង ៥០ ម៉ឺនដុល្លារ ឡើយនៅក្នុងពេល ១៤ ឆ្នាំ ដែលខ្ញុំបានដើរចុះជួយសង់អណ្តូងទឹកស្អាតឲ្យបងប្អូនខ្មែរតាមសហគមន៍ក្រីក្រនោះ ដែលទទួលបានជំនួយពីសប្បុរសជនបរទេសនានាមាន ន័រវែស អូស្ត្រាលី ហូឡង់ និងអាមេរិក ជាដើម។ ឥឡូវនេះ ក៏មានក្តីសុបិនចង់បើកអង្គការសម្រាប់ជួយសហគមន៍»៕
