ក្រុងហ្សាការតា៖ បិទព្រំដែន និងផ្ដាច់ទំនាក់ទំនងសង្គម ដើម្បីបន្ថយហានិភ័យឆ្លងវីរុសកូរ៉ូណា នៅតែជាយុទ្ធសាស្ដ្របរាជ័យក្នុងការបញ្ឈប់គូស្នេហ៍ឆ្លងដែនឥណ្ឌូនេស៊ីកាត់ផ្ដាច់ចំណងអាពាហ៍ពិពាហ៍កាលពីថ្ងៃពុធ ទោះមិនបានសិទ្ធស្នាលក្ដី។
អ៊ីរ៉ា ឆរីណា អូថូរ៉ា និងដៃគូតួកគី យ៉ាវុស អូហ្សដេមៀរ បានរៀបចំពិធីមង្គលការនៅព្រះវិហារអ៊ិស្លាម អាល់អាកបារ ក្នុងក្រុងស៊ូរ៉ាបាយ៉ា ខណៈមិត្ដភក្ដិ និងក្រុមគ្រួសារ អង្គុយគម្លាតគ្នា ២ ម៉ែត្រ ជាសក្ខីភាព។
គូស្នេហ៍ឆ្លងវេហាស៍ទាំង ២ បានពាក់ម៉ាស់ និងរក្សាគម្លាតពេញមួយចប់ពិធីស្របតាមគោលការណ៍របស់អាជ្ញាធរ ដែលបានហាមប្រាមការជួបជុំ រួមទាំងពិធីអាពាហ៍ពិពាហ៍ តែអនុញ្ញាតលើករណីខ្លះសម្រាប់អាពាហ៍ពិពាហ៍កក់ទុកមុនពេលប្រកាសអាសន្ន។
ការព្រមានវីរុសត្រូវបានដាក់សញ្ញាបង្ហាញ ដោយព្រឹត្ដិការណ៍នោះមិនមានអ្នកចូលរួមលើសពី ២៥ នាក់ រួមទាំងមានការវាស់កម្ដៅខ្លួននៅមាត់ច្រកចូលព្រះវិហារ និងការលាងដៃសម្លាប់មេរោគ។ អាពាហ៍ពិពាហ៍នេះក៏ត្រូវបានប្រារឰឡើងត្រឹម ៣០ នាទីប៉ុណ្ណោះ។
ភាពស្និទ្ធស្នាលលើកដំបូងបានកើតឡើងនៅពេលលោក អូហ្សដេមៀរ ដែលកញ្ញា អ៊ីរ៉ា ឆរីណា បានជួបលើកដំបូងតាមបណ្ដាញសង្គម បានដោះម៉ាស់ខ្លួនឯងមួយភ្លែត ដើម្បីឲ្យកូនក្រមុំបញ្ចុកនំអាពាហ៍ពិពាហ៍។
ពិធីជប់លៀងមង្គលការរបស់ពួកគេត្រូវបានលុបចោល ដែលគ្រាន់តែមានកម្មវិធីនៅព្រះវិហារអ៊ិស្លាមប៉ុណ្ណោះកាលពីថ្ងៃពុធ ដើម្បីឲ្យស្របទៅតាមគម្រោងអាពាហ៍ពិពាហ៍កក់ទុកមុនប៉ុណ្ណោះ។
អ្នកនាំពាក្យព្រះវិហារ អាល់ អាក-បារ លោក ហេលមី អេម ន័រ បានប្រាប់ AFP ថា៖ «មនុស្សទាំងអស់ត្រូវដើរឆ្លងកាត់កន្លែងបាញ់សម្លាប់មេរោគ ក្រោយពីបានត្រួតពិនិត្យកម្ដៅខ្លួន»។
អ្នកស្រី អូថូរ៉ា ទើបរៀបការថ្មីថ្មោងបាននិយាយថា អ្នកស្រីនៅតែរីករាយចំពោះអាពាហ៍ពិពាហ៍នេះ ទោះស្ថិតក្នុងការរឹតបន្តឹងយ៉ាងណាក៏ដោយ។
អ្នកស្រីនិយាយថា៖ «យើងបារម្ភថា បើយើងខកខានក្នុងពិធីមង្គលការថ្ងៃទី ២៩ ខែមិនា ទៀត ហើយយើងក៏ប្រហែលជាអស់ឱកាសរៀបការហើយ»៕ AFP/HR