The Phnom Penh Post Search

Search form

Logo of Phnom Penh Post newspaper Phnom Penh Post - មជ្ឈមណ្ឌល​វិបស្សា​នៅ​ភ្នំពេញ បើកទ្វារ​ជួយ​អ្នកស្រេ្តស​ការងារ




មជ្ឈមណ្ឌល​វិបស្សា​នៅ​ភ្នំពេញ បើកទ្វារ​ជួយ​អ្នកស្រេ្តស​ការងារ

Content image - Phnom Penh Post
ពិធីសូត្រមន្ដក្នុងថ្ងៃ​សម្ពោធ​មជ្ឈមណ្ឌល​វិបស្សា​នៅភ្នំពេញ​។ Vannaksen

មជ្ឈមណ្ឌល​វិបស្សា​នៅ​ភ្នំពេញ បើកទ្វារ​ជួយ​អ្នកស្រេ្តស​ការងារ

ភ្នំពេញ: ខណៈ​មជ្ឈមណ្ឌល​សមាធិបន្ដ​រីកដុះដាល​ច្រើន​ក្នុង​ទីក្រុង វិបស្សា ឬ (VIPASSA) ផ្ដល់​សេវាកម្ម​ដល់​អតិថិជន​ជាក្រុម​អ្នកជំនាញ និង​អ្នកជំនាញ​ដែល​ត្រូវការ​ឱកាស​ទទួលបាន​នូវ​សេចក្ដី​ស្ងប់សុខ។

អតីត​ព្រះសង្ឃ និងដៃគូ​ជំនួញ​របស់លោក​បាន​បង្កើត​មជ្ឈមណ្ឌល​មួយ​សម្រាប់​ធ្វើការ​សមាធិ វិបស្សនា និង​កម្មដ្ឋាន ដែល​ពួកគេ​រំពឹងថា​នឹងអាច​កាត់បន្ថយ​បញ្ហា​ស្រេ្តស​ពីកិច្ចការស្មុគស្មាញ​ចំពោះ​អាជីព​របស់​ខ្លួន។

លោក នឹម ឈុន្នី ដែលជា​អតីត ព្រះសង្ឃ​បានចេញ​ទៅ​សាងផ្នួស​រៀនធ្វើ​វិបស្សនា​បែប​ព្រះពុទ្ធសាសនា​រាប់ឆ្នាំ​ក្នុងខេត្ដ​ឈាងម៉ៃ​ប្រទេស​ថៃ និង​ប្រទេស​ជាច្រើន​ទៀត ដៃគូ​របស់លោក​ឈ្មោះ ឆាត់ សុភាព ជាអ្នក​បណ្ដុះបណ្ដាល​ផ្នែកជា​អ្នកដឹកនាំ​ឲ្យ​អង្គការ និង​ក្រុមហ៊ុន​នានា​ក្នុង និង​ក្រៅប្រទេស។

ការបណ្ដុះបណ្ដាល​សមាធិ និង​ភាពជា​អ្នកដឹកនាំ ដែល​បាន​បើកសម្ពោធ​កាលពី​ថ្ងៃអាទិត្យ​សប្ដាហ៍​មុនបាន​ផ្ដល់នូវ​វគ្គ​បណ្ដុះបណ្ដាល​ប្លែកៗ​ដែល​មាន​គុណប្រយោជន៍ ដូចជា​ការគ្រប់គ្រង​អារម្មណ៍​ស្រេ្តស​តុល្យភាព​នៃ​ជីវិត ការគ្រប់គ្រង​គម្រោង​ភាពជា​អ្នកដឹកនាំ ការគ្រប់គ្រង​ជម្លោះ និង​ការកសាង​ក្រុម។

សម្រាប់​លោក សុភាព គោលដៅ​ចម្បង​មួយ​របស់​មជ្ឈមណ្ឌល​គឺផ្សារ​ភ្ជាប់​ទំនាក់ទំនង​សមត្ថភាព​បញ្ញា​ស្មារតី​ជាមួយ​សុខភាព​ផ្លូវកាយ និង​ផ្លូវចិត្ដ។

Content image - Phnom Penh Post
លោក នឹម ឈុន្នី ថា​វិបស្សនា​ផ្ដល់​សន្ដិភាព​ដល់​ផ្លូវកាយ និង​ចិត្ដ​​​។ Eli Lillis

លោកបាន​បន្ដថា៖ «វាដល់​ពេលដែល​ត្រូវបង្កើត​កម្មវិធី​ឲ្យមានការ​ផ្លាស់ប្ដូរ​ចំពោះ​ទំនាក់ទំនង ការដឹកនាំ​ដោះស្រាយ​បញ្ហា និងការ​កំណត់​គោលដៅ​ជីវិត»។

ថ្វីដ្បិតតែ​ការធ្វើ​សមាធិ​គឺជា​ផ្នែក​មួយនៃការ​ប្រណិប័តន៍​សាសនា​ព្រះពុទ្ធ​យ៉ាងណា​ក៏ដោយ ក៏វា​មិនបាន​ជ្រួតជ្រាប​ដល់​ឫសគល់​វប្បធម៌​ប្រជាជន​ខ្មែរ​នៅឡើយ​ទេ។

លោក ឈុន្នី សង្ឃឹមថា វិបស្សនា​អាចជួយ​ឲ្យ​មានការ​ផ្លាស់ប្ដូរ​ដើម្បី​ឈាន​ទៅដល់​សន្តិភាព​ទាំង​ផ្លូវកាយ និង​ផ្លូវចិត្ត។

លោក នឹម ឈុន្នី ជាអតីត ព្រះសង្ឃ​បាន​បន្ថែមថា៖ «នៅ​បស្ចិមប្រទេស​ការធ្វើ​វិបស្សនា​គឺល្បីល្បាញ​បំផុត។ ក្រុមហ៊ុន​ខ្លះបាន​បញ្ចូល​កម្មវិធី​វិបស្សនា​ពីប្រាំ​ទៅដប់​នាទី​មុនម៉ោង​ការងារ​របស់​ពួកគេ​ថែម​ទៀតផង»។

លោកបាន​ពន្យល់​ពីអត្ថប្រយោជន៍​នៃ​ការធ្វើ​វិបស្សនា​ថា៖ «ខ្ញុំ​ជឿជាក់​លើ​ថាមពល​កម្មដ្ឋាន និង​សមាធិ ហើយ​យើង​សង្ឃឹមថានឹង​ផ្សព្វផ្សាយ​ជំនាញ​នេះ​ដើម្បី​ជំរុញ​ទឹកចិត្ដ​ស្ងប់សុខ​ដោះស្រាយ​បញ្ហា​ដោយ​សន្ដិវិធី គ្រប់គ្រង​កំហឹង និងរៀន​ស្វែងយល់​ពីគ្នា»។

ផ្ដើមពី​ខែក្រោយ​ទៅ​វិបស្សា នឹងផ្ដល់​វគ្គ​សិក្សា​សមាធិ​នៅ​ល្ងាចថ្ងៃ​ចន្ទ​ដោយ​ឥតគិតថ្លៃ​ដោយ​ស្វាគមន៍​គ្រប់បុគ្គល ព្រមទាំង​វគ្គ​មេត្ដា​ករុណា​ប្រចាំខែ​ឥតគិតថ្លៃ​ផងដែរ។ ចាប់ពី​ខែក្រោយ​នេះដែរ នឹងមាន​វគ្គ បណ្ដុះបណ្ដាល​ភាពជា​អ្នក​ដឹកនាំ​ប្រចាំ​សប្ដាហ៍​ទៀត។ វគ្គ​ផ្សេងៗ ដូចជា​ការបណ្ដុះបណ្ដាល​ទំនាក់ទំនង នឹងបើក​ទៅតាម​ការស្នើសុំ​ពីសំណាក់​អ្នកមាន​ចំណាប់ អារម្មណ៍​សិក្សា​ស្វែងយល់។

យោងតាម​លោក សុភាព អ្នក​ទាំងពីរ បង្កើត​មជ្ឈមណ្ឌល​នេះឡើង​ដើម្បី​ផ្សព្វផ្សាយ​ពីវិធីសាស្ត្រ​ក្នុង​ការគិត​អំពី​ការអភិវឌ្ឍ​ខ្លួនឯង ដែល​មិនមាន​នៅក្នុង​ប្រព័ន្ធអប់រំ​កម្ពុជា។

គោលដៅ​គឺ​កសាង​ភាពជា​អ្នកដឹកនាំ តាមរយៈ​ជំនាញ​នៃការស្ដាប់ និង​ការស្វែងយល់។ វិបស្សា ស្ថិតនៅក្នុង​ភោជនីយដ្ឋាន​រតនគិរី មហាវិថី​ព្រះ​សុរាម្រិត (២៦៨) និងបើក​ដំណើរការ​ពីម៉ោង ៦ ព្រឹក​ដល់ម៉ោង ៩ យប់។ ទំនាក់ទំនង​ព័ត៌មាន​បន្ថែម ពីវគ្គ​សិក្សា​នានា អាច​ទូរស័ព្ទ​ទៅ​លេខ ០៧៨ ៧៨៥០៤៤៕HR

អត្ថបទគួរចាប់អារម្មណ៍