ភ្នំពេញ៖ ដំណឹងល្អសម្រាប់អ្នកចូលចិត្តថតវីដេអូ ខណៈមជ្ឈមណ្ឌលកម្ពុជាដើម្បីផ្សព្វផ្សាយព័ត៌មានឯករាជ្យ (CCIM) រៀបចំការប្រកួតថតវីដេអូអប់រំខ្លី ក្រោមប្រធានបទ «សមភាពយេនឌ័រដើម្បីអ្នកជំនាន់ក្រោយ» និងមានឱកាសល្អឈ្នះរង្វាន់ជយលាភី ៣ ចុងក្រោយ គឺលេខ ១ ដល់លេខ ៣ ចំពោះសា្នដៃរបស់ខ្លួន។
បើតាមកញ្ញា លី សុគន្ធារី ជាជំនួយការគម្រោងនៃមជ្ឈមណ្ឌលកម្ពុជាដើម្បីផ្សព្វផ្សាយព័ត៌មានឯករាជ្យ (CCIM) ឲ្យដឹងថា៖ «នេះជាលើកដំបូង ដែលមជ្ឈមណ្ឌលយើងបានរៀបចំឡើងក្នុងគម្រោងប្រកួតជាលក្ខណៈវីដេអូខ្លី ខណៈកន្លងមកយើងធ្លាប់រៀបចំការប្រកួតបែបជាសំណេរអត្ថបទរឿងសម្រាប់វិទ្យុ។ ការប្រកួតវីដេអូនេះ ព្រោះតែចង់លើកទឹកចិត្តក៏ដូចជាផ្តល់ឱកាសដល់យុវជនក្នុងការជួយលើកកម្ពស់សមភាពយេនឌ័រ តាមរយៈការប្រកួតថតវីដេអូខ្លី ក្រោមប្រធានបទ «សមភាពយេនឌ័រ ដើម្បីអ្នកជំនាន់ក្រោយ»។ ខណៈវីដេអូផ្តោតសំខាន់ទៅលើការផ្លាស់ប្តូរផ្នត់គំនិតសង្គម និងទស្សនអវិជ្ជមាន របស់សាធារណជន ដើម្បីរួមគ្នាបង្កើតនូវយុគសម័យនៃសមភាពយេនឌ័រ សម្រាប់ក្មេងៗជំនាន់ក្រោយជាការបញ្ជ្រាបទស្សនៈយេនឌ័រ និងឆ្លុះបញ្ចាំងតថភាពសង្គមកម្ពុជា តាមរយៈវីដេអូអប់រំខ្លីនេះទៀតផង»។
កញ្ញាបន្តពីលក្ខខណ្ឌនៃការផលិតវីដេអូខ្លីនេះដែរថា៖ « គ្រប់ប្រភេទវីដេអូទាំងអស់អាចដាក់ចូលរួមប្រកួត (រួមទាំងបញ្ចូលសំឡេងទាំងវីដេអូគំនូរជីវចល និងវីដេអូគូរដោយដៃ) ឬវីដេអូដែលថតចេញពីទូរសព្ទដៃ ក៏អាចចូលរួមប្រកួតបានដែរ ឬជាវីដេអូមិនធ្លាប់ដាក់ចូលរួមក្នុងការប្រកួតពីមុនមក ឬក៏ធ្លាប់បានផ្សាយជាសាធារណៈ។ ជាវីដេអូ ដែលផលិតត្រូវមានរយៈពេលចន្លោះពី ៥-៧ នាទី និងមានចំណងជើងរត់ជាភាសាអង់គ្លេស (English Subtitle) ហើយបេក្ខជនត្រូវមានអាយុចន្លោះពី ១៥ ឆ្នាំ ទៅ ៣០ ឆ្នាំ អាចចូលរួមជាបុគ្គល ឬក្រុមបាន ចំពោះស្រ្តីអ្នកស្រឡាញ់ភេទដូចគ្នា ជនជាតិភាគតិច និងជនពិការ ត្រូវបានលើកទឹកចិត្ត។ ចំពោះរង្វាន់ទី១ បានកុំព្យូទ័រតម្លៃ ៨០០ ដុល្លារ ខណៈរង្វាន់ទី២ រង្វាន់ ទី៣ នឹងបានស្មាតហ្វូនតម្លៃ ៧៣០ ដុល្លារដូចគ្នា»។
សម្រាប់វីដេអូ ដែលមានគំនិតច្នៃប្រឌិតខ្ពស់ និងត្រឹមត្រូវតាមលក្ខខណ្ឌដែលបានកំណត់ នឹងត្រូវដាក់ឲ្យមហាជនបោះឆ្នោតតាមបណ្តាញទំនាក់ទំនងសង្គមស្ថាប័ន និងគម្រោងផ្ទាល់។ តែវីដេអូណាមួយ ដែលពណ៌នាពីអំពើហិង្សា ការបៀតបៀនភេទ ការរើសអើងពូជសាសន៍ ឬមាតិកា-មិនសមរម្យ នឹងត្រូវដកសិទ្ធិដោយស្វ័យប្រវត្តិ។ រក្សាសិទ្ធិចំពោះវីដេអូ មានគំនិតបង្កើតថ្មី និងមិនចម្លងពីអ្នកដទៃ តែបើលួចចម្លងគេ ត្រូវដកសិទ្ធិដោយស្វ័យប្រវត្តិ។ ពាក្យចូលរួមផុតកំណត់ថ្ងៃទី ៦ ខែមេសា ឆ្នាំ ២០២០។ បេក្ខជនអាចសួរនាំព័ត៌មានលម្អិតពីការប្រកួតតាមអ៊ីមែល: voicesforequality@ccimcambodia.org និងទូរសព្ទ ០៦០ ៤១៩ ៨៨៨៕