ខេត្ដកណ្ដាល៖ រោគសញ្ញា និងអាការ ដែលឪពុកម្ដាយត្រូវសម្គាល់នៅផ្ទះចំពោះហានិភ័យជំងឺមហារីកលើកុមារតូចៗត្រូវបានវេជ្ជបណ្ឌិតជប៉ុនម្នាក់ ផ្ដល់ការណែនាំក្នុងបំណងចង់ឱ្យអាណាព្យាបាលនាំកូនមកព្យាបាលឱ្យបានទាន់ពេលវេលា។
លោកវេជ្ជបណ្ឌិត ហ៊ីដេតុ យ៉ូស៊ីអូកា ស្ថាបនិកអង្គការ បេះដូងជប៉ុន មូលដ្ឋាននៅឧដុង្គ បាននិយាយថា៖ «ចូរពិនិត្យមើលថា តើកុមារមានរូបរាងខុសប្រក្រតីឬអត់ មានសភាពហើមត្រង់ចំណុចណាឬទេ។ ពេលស្ទាបនៅលើរាងកាយ តើមានដុំសាច់ដុះគួរឱ្យសម្គាល់ ឬក៏ប្លែកខុសប្រក្រតីឬទេ។ តើមានក្អួតចង្អោរអ្វីឬអត់?»។
អង្គុយលើកន្ទេលក្បែរគ្រែពេទ្យ និងមានបង្វិចខោអាវធំមួយ អ្នកស្រី ចក់ យឿន អាយុ ២១ ឆ្នាំ កំពុងបញ្ចុកបាយកូនប្រុសអាយុជាង ១ ខួប ដែលមកសម្រាលព្យាបាលជំងឺមហារីក។
ស្ដ្រីមកពីខេត្ដព្រះសីហនុរូបនេះ ប្រាប់ ភ្នំពេញ ប៉ុស្ដិ៍ ថា៖ «ពេលខ្ញុំស្ទាបពោះគាត់ ខ្ញុំឃើញមានដុំគីស តែមិនមានអាការឈឺ និងប៉ះពាល់ដល់ការញ៉ាំរបស់គាត់ទេ។ ខ្ញុំទើបតែដឹងប៉ុន្មានថ្ងៃនេះ ហើយក៏សាកលាបប្រេងកូឡា តែវារាងឡើងធំជាងមុន»។
នៅក្នុងបន្ទប់សម្រាករួមជាមួយអ្នកជំងឺកុមារឯទៀត អ្នកស្រីបន្ដថា៖ «ខ្ញុំយកគាត់មកគេងពេទ្យគន្ធបុប្ផា ៣ ថ្ងៃ ទើបបន្ដមកដល់ពេទ្យបេះដូងជប៉ុននេះ គេងបាន ៥ ថ្ងៃហើយ»។
ស្ដ្រីដែលមានកូនតូចកើតដុំសាច់ក្នុងពោះរូបនេះ បានលើកពីជម្រើសមកកាន់ទីនេះថា៖ «ដោយខ្ញុំអត់មានលុយ ទើបខ្ញុំជ្រើសរើសការព្យាបាលមកកាន់ទីនេះ ដែលការព្យាបាលទាំងអស់មិនតម្រូវបង់ប្រាក់ទេ»។
ដោយមើលឃើញពីអត្រាមរណៈចំពោះកុមារច្រើននៅតាមបណ្ដាប្រទេសមីយ៉ាន់ម៉ា ឡាវ និងកម្ពុជា វេជ្ជបណ្ឌិតជប៉ុនរូបនេះបានកត់សម្គាល់ថា ផ្នែកវេជ្ជសាស្ដ្រ ឱសថសាស្ដ្រ មន្ទីរពេទ្យ និងគ្រូពេទ្យនៅបណ្ដាប្រទេសទាំងនេះនៅមិនទាន់មានគ្រប់គ្រាន់។
ចំណុចសំខាន់ អ្នកជំងឺអត់លទ្ធភាពក្នុងការព្យាបាល ដោយសារការចំណាយខ្ពស់ និងរយៈពេលយូរ។
វេជ្ជបណ្ឌិតវ័យ ៥៥ ឆ្នាំ រូបនេះបានបង្កើតអង្គការបេះដូងជប៉ុន ក្នុងឆ្នាំ ២០០៤ ហើយឆ្នាំ ២០០៨ លោកផ្ដើមសកម្មភាពវេជ្ជសាស្ដ្រនៅកម្ពុជា ក៏ដូចជាការបង្កើតមន្ទីរពេទ្យផ្ទាល់ខ្លួនក្នុង ២០១៦។
ស្ថាបនិកមជ្ឈមណ្ឌលព្យាបាលកុមារ បេះដូងជប៉ុន ដែលត្រូវបានបង្កើតឡើងក្នុងឆ្នាំ ២០១៨ នេះ បានលើកឡើងថា៖ «ខ្ញុំចង់ឱ្យសមត្ថភាពផ្នែកវេជ្ជសាស្ដ្រមានកម្រិតប្រហាក់ប្រហែលនឹងបណ្ដាប្រទេសជិតខាង វៀតណាម និងថៃ។ នៅថ្ងៃខាងមុខខ្ញុំរំពឹងថា មន្ទីរពេទ្យនឹងពង្រីកខ្លួនកាន់តែធំជាងនេះទៅទៀត។
ពាក់អាវយឺតពណ៌លឿង ក្បាលអត់សក់រលីង និងមានសភាពស្លេកស្លាំង កុមារាម្នាក់អាយុប្រមាណ ១២ ឆ្នាំ នៅតែអាចបញ្ចេញស្នាមញញឹមយ៉ាងស្រស់ស្រាយក្នុងការថតរូបអនុស្សាវរីយ៍ នៅពេលរូបគេបានចេញពីមន្ទីរពេទ្យ ក្រោយសម្រាកព្យាបាលដោយប្រើថ្នាំប្រឆាំងដុំសាច់មហារីក។
នេះជាអ្នកជំងឺដុំសាច់មហារីកដ៏ក្មេងខ្ចីម្នាក់ក្នុងចំណោមកុមារជាច្រើនទៀត ខណៈអ្នកជំងឺមានការកើនឡើងអំឡុងពេលប្រទេសជិតខាងបន្ដរឹតបន្តឹងព្រំដែនដោយសារវិបត្តិកូវីដ។
យោងតាមទិន្នន័យពីមជ្ឈមណ្ឌលព្យាបាលកុមារ បេះដូងជប៉ុន បានបង្ហាញថា អំឡុងខែកញ្ញាឆ្នាំមុន អ្នកជំងឺមកព្យាបាលមហារីកនៅមន្ទីរពេទ្យនេះមានចំនួន ៩ នាក់ និងបានកើនឡើង ២៦ នាក់នាឆ្នាំនេះ។
ទិន្នន័យបានបន្ដថា៖ «ក្នុងចំណោមកុមារមហារីក ៧ នាក់ ដែលមកទទួលយកសេវាថែទាំវេជ្ជសាស្ដ្រកាលពីខែកញ្ញា នេះ មានកុមារ ៤ នាក់ បានធ្វើដំណើរមកពីតំបន់ក្បែរព្រំដែននៃប្រទេសឡាវ និងថៃ ដោយចំណាយពេលដល់ ៨ ម៉ោងតាមរថយន្ដ»។
ភាពវិជ្ជមាននៃការឆាប់ព្យាបាលជំងឺមហារីក
បើទោះបីជាការព្យាបាលត្រូវការចំណាយខ្ពស់ ជាអ្វីដែលអង្គការជប៉ុនមួយនេះប្រឈមផងនោះ មជ្ឈមណ្ឌលព្យាបាលកុមារ បេះដូងជប៉ុន រីករាយក្នុងការផ្ដល់សេវាកម្មសង្គ្រោះជីវិតកុមារនូវដំណាក់កាលដំបូងៗនៃរោគសញ្ញាជំងឺកាចសាហាវ។
វេជ្ជបណ្ឌិត ហ៊ីដេតុ យ៉ូស៊ីអូកា ស្ថាបនិកអង្គការបេះដូងជប៉ុន បានប្រាប់ ភ្នំពេញ ប៉ុស្ដិ៍ ថា៖ «ពេលយើងព្យាបាលកុមារម្នាក់ឱ្យជាសះស្បើយពីតូចនៅពេលគាត់ធំឡើង គាត់អាចធ្វើការងារ និងជួយសង្គមបានច្រើន ក៏ដូចជាការចែករំលែកចំណេះដឹងរបស់ខ្លួនដល់អ្នកដទៃ»។
លោកបាននិយាយតាមរយៈអ្នកបកប្រែភាសាជប៉ុនមកខ្មែរថា៖ «អ្នកជំងឺមហារីក ក៏អាចរស់នៅដូចមនុស្សដទៃធម្មតា ដូចគេដូចឯងដែរនៅថ្ងៃអនាគត»។
ស្ថិតនៅក្នុងមន្ទីរពេទ្យបង្អែកពញាឮ ប្រជាពលរដ្ឋដែលមានបំណងមកទទួលការព្យាបាលនៅមជ្ឈមណ្ឌលព្យាបាលកុមារ បេះដូងជប៉ុន គួរតែឆ្លងកាត់ការពិនិត្យរោគពីសំណាក់ក្រុមគ្រូពេទ្យនៅមន្ទីរពេទ្យបង្អែក។
ជាធម្មតាមជ្ឈមណ្ឌលព្យាបាលកុមារ បេះដូងជប៉ុន បានស្វាគមន៍អ្នកជំងឺជាច្រើនរយនាក់ក្នុង ១ ខែៗ ដែលត្រូវបានបញ្ជូនមកកាន់ទីនេះ។
កញ្ញា កាណាន់ ណាកាមឹរ៉ា ទទួលបន្ទុកផ្នែកទំនាក់ទំនង និងទីផ្សារ នៅមជ្ឈមណ្ឌលបានឱ្យដឹងថា៖ «យើងក៏ទទួលអ្នកជំងឺមកពីកន្លែងដទៃទូទាំងប្រទេសកម្ពុជា ដូចជាបណ្ដាគ្លីនិកឯកជន និងមន្ទីរពេទ្យរដ្ឋនានាសម្រាប់ការពិនិត្យព្យាបាលជំងឺខាងលើ»។
លោក ចេកកុប ណូតុន ជាបុគ្គលិកផ្នែកទំនាក់ទំនងជាតិនូវែលសេឡង់បានបន្ទរថា៖ «ជាក់ស្ដែងអ្នកជំងឺនៅមន្ទីរពេទ្យខេត្ដសៀមរាប និងមន្ទីរពេទ្យដទៃទៀត មិនអាចព្យាបាលបានពួកគេក៏មកទទួលការព្យាបាលនៅទីនេះចំពោះប្រភេទជំងឺធ្ងន់ៗ»។
កញ្ញា ណាកាមឹរ៉ា បានឱ្យដឹងទៀតថា៖ «វាអាស្រ័យលើភាពជាក់ស្ដែង ជាទូទៅយើងទទួលអ្នកជំងឺចន្លោះពី ៤០០ ទៅ ៦០០ នាក់ក្នុង ១ ខែ។ ដូច្នេះ ជាមធ្យម មានចំនួនប្រមាណ ១៥ នាក់ ក្នុង ១ ថ្ងៃ»។
ជាមួយគ្រែសម្រាកព្យាបាលចំនួន ៣៩ សម្រាប់អ្នកជំងឺពេញវ័យ ៤៥ គ្រែសម្រាប់កុមារ និង ២៧ គ្រែសម្រាប់កុមារមហារីក មជ្ឈមណ្ឌលមានបុគ្គលិក ៩៥ នាក់ ដោយមានអ្នកជំនាញជនជាតិជប៉ុនជាង ២០ នាក់។
ប្រធានផ្នែកទំនាក់ទំនង និងទីផ្សារ ដែលបញ្ចប់ការសិក្សាមហាវិទ្យាល័យសុខាភិបាលអន្ដរជាតិ នៃសាកលវិទ្យាល័យក្រុងតូក្យូ /យូ តូក្យូ កញ្ញា ណាកាមឹរ៉ា បានបង្ហាញតួលេខថា កុមារមកទទួលសេវាកម្មដែលមិនសម្រាកព្យាបាលមានចំនួនជាង ១៦ ០០០ នាក់ ក្នុង ១ ឆ្នាំ និងសរុបជាង ៥ ម៉ឺននាក់ តាំងពីបើកសម្ពោធ។
កញ្ញាបន្ដថា៖ «អ្នកជំងឺវះកាត់មានចំនួនជាង ១ ៣៨០ ករណី ក្នុង ១ ឆ្នាំ ហើយយើងធ្វើការវះកាត់សរុបទាំងអស់ប្រមាណ ៥ ០០០ ករណី តាំងពីបើកដំណើរការ។ អ្នកជំងឺមហារីកជាង ៩០ នាក់ បានមកទទួលការព្យាបាលតាំងពីយើងបើកទទួលការព្យាបាលក្នុងឆ្នាំ ២០១៨។ ជាង ៧០ ករណី នៃការវះកាត់ត្រូវបានធ្វើឡើងសម្រាប់អ្នកជំងឺមហារីក»។
កញ្ញា ណាកាមឹរ៉ា បានបញ្ជាក់ថា៖ «មជ្ឈមណ្ឌលព្យាបាលកុមារ បេះដូងជប៉ុន អាចព្យាបាលជំងឺមហារីក ដែលមានចាប់ពីមហារីកសរីរៈក្នុងពោះ។ មហារីកប្រភេទនេះ តែងតែតម្រូវឱ្យមានការវះកាត់ ដែលមន្ទីរពេទ្យផ្ដល់សេវាកម្មជំនាញ»។
លោកវេជ្ជបណ្ឌិត យ៉ូស៊ីអូកា បានឱ្យដឹងថា៖ «ការព្យាបាលជំងឺផ្សេងៗ ដូចជាការវះកាត់ដុំសាច់គួរតែធ្វើឡើងដោយអ្នកជំនាញជនជាតិជប៉ុន»។
បញ្ហាប្រឈមសម្រាប់មជ្ឈមណ្ឌល
ទោះមានបញ្ហាមូលនិធិមិនខុសទៅនឹងមន្ទីរពេទ្យសប្បុរសធម៌ទូទៅក្ដី ក៏មន្ទីរពេទ្យនៅប្រឈមនឹងបញ្ហារនាំងរារាំងឪពុកម្ដាយក្នុងការនាំកូនមកទទួលការព្យាបាលឱ្យបានឆាប់បំផុតនៅដំណាក់កាលដំបូង។
ប្រធានផ្នែកទំនាក់ទំនង និងទីផ្សារ កញ្ញា ណាកាមឹរ៉ា បានឱ្យដឹងថា៖ «ឧបសគ្គដំបូង គឺលុយ។ មន្ទីរពេទ្យភាគច្រើន ដែលព្យាបាលជំងឺធ្ងន់ៗ ដូចជា មហារីក ត្រូវការចំណាយប្រាក់ខ្ពស់។ នេះជាមូលហេតុដែលមន្ទីរពេទ្យព្យាបាលដោយឥតគិតថ្លៃ។ ទោះជាយ៉ាងនេះ ឱ្យពួកគេនាំកូនមកព្យាបាលនៅតែលំបាក»។
ស្ថាបនិកអង្គការបេះដូងជប៉ុនបានលើកឡើងថា ឪពុក ឬម្ដាយត្រូវរង់ចាំថែទាំកូនក្នុងការទទួលការព្យាបាលរយៈពេលយូរដែលធ្វើឱ្យពួកគេបាត់បង់ចំណូលផ្គត់ផ្គង់គ្រួសារ និងបីបាច់កូនៗដទៃទៀត។ ម្យ៉ាងវិញទៀត ការផ្សព្វផ្សាយឱ្យពលរដ្ឋបានស្គាល់មជ្ឈមណ្ឌលក៏ជាឧបសគ្គ។
កញ្ញាបានឱ្យដឹងថា៖ «យើងពឹងអាស្រ័យទាំងស្រុងលើការប្រាប់តៗគ្នា បណ្ដាញសង្គមទំនាក់ទំនងជាមួយមន្ទីរពេទ្យដទៃ និងម្ដងម្កាលមានការផ្សាយក្នុងវិទ្យុ ក៏ដូចជាទូរទស្សន៍ ដើម្បីឱ្យពលរដ្ឋបានស្គាល់មជ្ឈមណ្ឌល»។
ជាមួយក្ដីរំពឹងមានការផ្សព្វផ្សាយទូលំទូលាយ កញ្ញាលើកឡើងថា៖ «អ្នកមានឥទ្ធិពល ដូចជា ព្រះសង្ឃ និងអ្នកជំនួញពិតជាមានសារៈសំខាន់ណាស់ក្នុងការជួយជំរុញពលរដ្ឋខ្មែរឱ្យជឿជាក់លើមន្ទីរពេទ្យ»។
ចុងក្រោយបញ្ហាកង្វះការអប់រំអំពីរោគសញ្ញានៃជំងឺនានា រួមទាំងមហារីក។ ខណៈអត្រារស់មានខ្ពស់ចំពោះការរកឃើញជំងឺឱ្យបានឆាប់ ដោយដឹងថា កុមារម្នាក់មិនស្រួលខ្លួន និងមានវិធានការនាំពួកគេទៅកាន់មន្ទីរពេទ្យភ្លាមៗពិតជាសំខាន់។
ប្រធានផ្នែកទំនាក់ទំនងរូបនេះបញ្ជាក់ថា៖ «យើងរំពឹងថា នៅពេលអនាគតពលរដ្ឋកម្ពុជានឹងមានភាពជឿជាក់ក្នុងការនាំកូនៗមកកាន់មន្ទីរពេទ្យ ដើម្បីសង្គ្រោះជីវិត»។
ការព្យាបាលកុមារ និងមនុស្សចាស់
ក្រៅពីជំងឺមហារីកកុមារ ដែលជាគោលដៅចម្បងរបស់មន្ទីរពេទ្យ លោកវេជ្ជបណ្ឌិតជប៉ុន យ៉ូស៊ីអូកា ក៏ទទួលព្យាបាលជំងឺទូទៅដទៃទៀត ជាពិសេស អ្នកជំងឺចាំបាច់ត្រូវការការវះកាត់ តែពួកគាត់ក្រីក្រ។
លោកមើលឃើញថា ប្រជាពលរដ្ឋគ្រប់ប្រទេសរមែងមានការភ័យខ្លាចពេទ្យ ទើបលោកបង្កើតមន្ទីរពេទ្យមួយ ដែលអ្នកជំងឺមិនមានការខ្លាចរអារ នឹងទទួលបានភាពកក់ក្ដៅពីគ្រូពេទ្យ។
លោកនិយាយថា៖ «ក្រៅពីបច្ចេកវិទ្យា និងទិចនិកនៃការព្យាបាល យើងចង់បង្កើតឱ្យមានទំនាក់ទំនងផ្លូវចិត្ដរវាងអ្នកជំងឺ និងក្រុមគ្រូពេទ្យក្នុងមន្ទីរពេទ្យ។ ក្រុមគ្រូពេទ្យមើលថែទាំកុមារមានជំងឺដូចជាកូនរបស់ខ្លួនឯង»។
សេវាកម្មថែទាំសុខភាពទាំងកុមារ និងមនុស្សពេញវ័យ គឺមិនត្រូវបានគិតប្រាក់នោះទេ។ សម្រាប់ការវះកាត់លើកុមារ មានដូចជា ដុំសាច់ក្នុងពោះ ក្លនលូន ខូចទ្រង់ទ្រាយប្រដាប់បន្ដពូជ រន្ធគូទខុសប្រក្រតី និងថង់ទឹកប្រមាត់រួមតូច។ រីឯការវះកាត់មនុស្សពេញវ័យ រួមមាន ពកក ដុំក្នុងអូវែរ ដុំដោះ បូសអន្ទង់ និងក្លនលូនជាដើម។
សេវាកម្មថែទាំសុខភាពមាតា និងទារក អង្គការយកចិត្ដទុកដាក់ចំពោះម្ដាយ និងទារកអំឡុងពេលសម្រាល និងក្រោយសម្រាលថែមទៀត។
ក្រុមគ្រូពេទ្យរបស់មជ្ឈមណ្ឌលក៏បានផ្ដល់សេវាកម្មចល័តទៅតាមតំបន់ជនបទ និងតាមមន្ទីរពេទ្យនានា ដើម្បីផ្ដល់ការព្យាបាល រួមទាំងការវះកាត់ឥតគិតថ្លៃរៀងរាល់ ២ ខែម្ដង។
ថ្មីៗនេះ អង្គការ បេះដូងជប៉ុន បានបញ្ជូនក្រុមគ្រូពេទ្យស្ម័គ្រចិត្តទៅកាន់ខេត្តពោធិ៍សាត់ ជាកន្លែងដែលប្រជាជនក្នុងតំបន់ជាច្រើនកំពុងរងផលប៉ះពាល់ដោយគ្រោះមហន្តរាយ ដែលបង្កឡើងដោយទឹកជំនន់។
ការទ្រទ្រង់មូលនិធិរបស់អង្គការបេះដូងជប៉ុន
ដោយសារបេះដូងជប៉ុនជាអង្គការរបស់ជប៉ុន ស្ទើរតែការឧបត្ថម្ភជាប្រាក់ និងសម្ភារបរិក្ខារបានមកពីសប្បុរសជន និងក្រុមហ៊ុនជប៉ុន។ ប៉ុន្ដែ ឆ្នាំនេះ អង្គការចាប់ផ្ដើមទទួលការឧបត្ថម្ភបន្ថែមពីសប្បុរសជនកម្ពុជា។
កញ្ញា ណាកាមឹរ៉ា ឱ្យដឹងថា៖ «សប្បុរសជន និងក្រុមហ៊ុនកម្ពុជាជួនកាលក៏បាននាំយកបរិក្ខារផ្សេងៗមកកាន់មន្ទីរពេទ្យយើង។ ខណៈទឹកប្រាក់បរិច្ចាគនៅតិចតួចស្ដួចស្ដើង យើងក៏កក់ក្ដៅដែលបានឃើញពលរដ្ឋកម្ពុជាកំពុងតែបន្ដជួយអ្នកជំងឺ»។
ជាមួយយុទ្ធនាការប្រាក់ ១ ម៉ឺនរៀលភ្ជាប់នឹងគណនីធនាគារមួយចំនួនពលរដ្ឋកម្ពុជាអាចបរិច្ចាគ សង្គ្រោះជីវិតកុមារមហារីកទូទាំងប្រទេស។
លើសពីនេះ កញ្ញា ណាកាមឹរ៉ា បានបន្ដថា៖ «ពេលនេះ សប្បុរសជន និងក្រុមហ៊ុនមកផ្ដល់ជំនួយដល់មន្ទីរពេទ្យយើងដោយផ្ទាល់ ហើយយើងបានដាក់ប្រអប់បរិច្ចាគនៅតាមទីតាំងជាច្រើនក្នុងរាជធានីភ្នំពេញ»។
មជ្ឈមណ្ឌលព្យាបាលកុមារ បេះដូងជប៉ុន បើកទ្វារម៉ោង ៨:៣០ ព្រឹក ដល់ម៉ោង ៥:០០ ល្ងាច ពីថ្ងៃចន្ទ ដល់ សុក្រ ដែលមានទីតាំងនៅក្នុងមន្ទីរពេទ្យបង្អែកពញាឮ ខេត្ដកណ្ដាល។
សម្រាប់ព័ត៌មានលម្អិត សុំចូលទៅកាន់វេបសាយ https://www.japanheart.org/en/ហ្វេសប៊ុក @japanheart.hospital ឬទូរស័ព្ទ ០៧៧ ៩៥ ៩៤ ៧១៕
វីដេអូ៖