ភ្នំពេញ៖ ថ្ម្មីៗនេះបង្កើតភាពភ្ញាក់ផ្អើល និងចាប់អារម្មណ៍សាជាថ្មីលើអតីតតារាចម្រៀងស្រីនៅសាន់ដេ អ្នកនាង ផាន់ ម៉ូនីកា បង្ហោះសារប្រកាសសួររកទិញដី ៥ ហិកតា នៅតំបន់កំពុងអភិវឌ្ឍន៍ទំនប់កប់ស្រូវទោះបីជាតារាចម្រៀងស្រីរូបនេះ ឃ្លាតឆ្ងាយចេញពីសិល្បៈច្រើនឆ្នាំយ៉ាងណាក៏ដោយ។
អតីតតារាចម្រៀងស្រីនៅសាន់ដេ ដែលមានសំណាងម្នាក់អ្នកនាង ផាន់ ម៉ូនីកា បានបង្ហោះសារតាមហ្វេសប៊ុកថា៖ «សួស្តី បងប្អូនទាំងអស់គ្នា ខ្ញុំត្រូវការទិញដី នៅតំបន់ទំនប់កប់ស្រូវ ទំហំ ៥ ហិកតា តម្លៃ ១០០ ដុល្លារចុះ។ បងប្អូនណាមាន ហើយចង់លក់អាចទំនាក់ទំនងមកខ្ញុំបាន»។
រំពេចនោះក៏មានការភ្ញាក់ផ្អើលពីមជ្ឈដ្ឋានមហាជនបានលើកឡើងបែបឆ្ងល់ភ្លាមៗថា៖ «អ៊ីយ៉ា! អ៊ីចឹងបានអ្នកនាង ផាន់ ម៉ូលីកា ត្រូវគេបង្ហើបថា មានឋានៈជាលោកជំទាវ និងកំពុងជោគជ័យខ្លាំងនៅក្នុងមុខជំនួញនាំចូលផលិតផលរក្សាសម្ផស្សបន្ថែមពីលើមុខរបរបើកហាងស៊ុប KAKASUKI & BBQ និងហាងលក់សម្លៀកបំពាក់ ខណៈស្វាមីកំពុងតែកាក់កបរបរអចលនទ្រព្យគម្រោងពុះដីលក់ឡូត៍លក់យូរមកហើយនោះ។ ឥឡូវនេះ អ្នកនាងក៏ប្រកាសរកទិញដីទំហំ ៥ ហិកតា នៅតំបន់ទំនប់កប់ស្រូវ ដែលជាតំបន់កំពុងអភិវឌ្ឍន៍ទៀតផង»។
តែបើតាមការបង្ហើបពីលោក គង់ សុខម៉េង ជាស្វាមីអ្នកនាង ផាន់ ម៉ូនីកា និងជាពាណិជ្ជករមានកេរ្តិ៍ឈ្មោះល្បី ១ រូបក្នុងប្រទេសប្រាប់ភ្នំពេញប៉ុស្តិ៍ថា៖ «នោះគឺគ្រាន់តែជាការប្រកាសរកទិញឲ្យដៃគូរកស៊ីផ្នែកអចលនទ្រព្យខាងទិញលក់ដីប៉ុណ្ណោះ គឺយើងមានដៃគូជាមួយនឹងក្រុមហ៊ុនរបស់ចិន មិនមែនជាគម្រោងពួកយើងឡើយ»។
គួររំឭកដែរថា អតីតតារាចម្រៀងស្រីជ្រកនៅផលិតកម្មសាន់ដេ ជិត ១០ ឆ្នាំ ដោយបានកសាងកេរ្តិ៍ឈ្មោះល្បីតាមរយៈបទចម្រៀងនានា ដូចជាបទ «រំចង់ប្រែខ្លួន» និងបទ «លើកស្នេហ៍ជូនបង» តែនាពេលរៀបការ គឺមិនបានដាក់ឈ្មោះ ផាន់ ម៉ូនីកា នោះទេ គឺនាងបានប្រើឈ្មោះពិតថា មឿន សុខនី និងកូនកំលោះ គង់ សុខម៉េង ដែលបានរៀបការនៅឆ្នាំ ២០១៣ ខណៈនាពេលបច្ចុប្បន្ននេះ ពួកគេមានចំណងស្នេហ៍យ៉ាងរឹងមាំ ដោយមានកូនស្រី ២ នាក់ផងដែរ។
ជាក់ស្តែងនោះអ្នកនាង ផាន់ ម៉ូនីកា និងលោក គង់ សុខម៉េង ជាស្វាមី ដែលត្រូវគេស្គាល់ថា ទើបបានតំណែងជាទីប្រឹក្សាសម្ដេចក្រឡាហោម ស ខេង រមែងបង្ហាញភាពផ្អែមល្ហែមក្នុងដំណើរកម្សាន្តជាលក្ខណៈគ្រួសារមិនសូវដាច់ ដែលមានន័យថា គូស្នេហ៍ ១ គូនេះ នៅតែស្រឡាញ់គ្នារហូតមក មិនបានឃើញកើតមានភាពប្រែប្រួលឡើយនៅក្នុងរយៈពេលជិត ១០ ឆ្នាំកន្លងមកនេះ៕