ក្រុងបាត់ដំបង៖ ដោយសារសេចក្តីស្រឡាញ់នឹងទម្រង់របាំបុរាណនោះ ទោះបីមិនសូវមានពេលទំនេរច្រើនមែនក្តី ក៏ក្រុមយុវតី ៣ រូប ដែលកំពុងតែរៀននៅថ្នាក់ទី ១២ នៃឆ្នាំសិក្សា ឆ្នាំ ២០១៩-២០២០ នៅតែអាចឆ្លៀតពេលមកហ្វឹកហាត់របាំបុរាណឈ្មោះ «រស្មីដួងចន្ទ» ជាកេរដំណែលវប្បធម៌ខ្មែរតាំងពីបុរាណ ហើយក៏ជ្រើសយកទៅសម្តែងជាទស្សនីយភាពនៅកម្មវិធីពិព័រណ៍សិល្បៈចម្រុះក្រោមប្រធានបទរួមថា «ជំនោរ ART» នាពេលកន្លងមកទទួលបានការកោតសរសើរពីមហាជនផងដែរថា មានលក្ខណៈស៊ីគ្នានឹងបរិយាកាសពេលរាត្រី។
យុវតី ៣ រូប ដែលកំពុងតែសិក្សាថ្នាក់ទី ១២ នៅឯវិទ្យាល័យមួយក្នុងខេត្តបាត់ដំបង មានកញ្ញា ម៉ៅ រស្ម៊ី កញ្ញា យ៉ន់ ស្រីយ៉ឺន និងកញ្ញា ហៃ នីសា បានជ្រើសយកនូវរបាំ «រស្មីដួងចន្ទ» សម្តែងតាមលំនាំនៃចម្រៀងមហោរីក្លាយ បានស្រូបចំណាប់អារម្មណ៍ពីមហាជនចូលទស្សនាក្នុងកម្មវិធីពិព័រណ៍សិល្បៈចម្រុះ ក្រោមប្រធានបទរួមថា «ជំនោរ- ART» ដែលបានប្រារព្ធធ្វើនៅលើកំណាត់នៃដងផ្លូវលេខ ២.៥ ស្ថិតនៅក្នុងក្រុងបាត់ដំបង ខេត្តបាត់ដំបង កាលពីថ្ងៃទី ២១-២២ ខែ ធ្នូ ឆ្នាំ ២០១៩ កន្លងមកនោះគួរឲ្យកត់សម្គាល់។
អ្នកគ្រូ ចាន់ ស្រីរឿន បច្ចុប្បន្នជាគ្រូបង្រៀនរបាំបុរាណ និងរបាំប្រពៃណីនៅសាលាហ្វារពន្លឺសិល្បៈខេត្តបាត់ដំបងរយៈពេលជិត ៣ ឆ្នាំ និងធ្លាប់រៀនសិល្បៈរបាំនេះនៅស្រុកកំណើតខេត្តកំពង់ចាមចំនួន ១០ ឆ្នាំផងដែរ ហើយក៏បានចូលរួមជួយសម្រួលកិច្ចការខ្លះនៃក្រុមរបាំយុវតី ៣ រូបនោះ បានបង្ហើបឲ្យដឹងពីគោលបំណងនៃការនាំយកទម្រង់របាំបុរាណនេះទៅសម្តែងថា៖ «របាំនេះ ដឹកនាំសម្ដែងដោយកញ្ញា ម៉ៅ រស្ម៊ី និងជាតួឯកក្នុងរបាំផងដែរ និងមិត្តភក្តិគាត់ ២ នាក់ទៀត គឺ យ៉ន់ ស្រីយ៉ឺន និង ហៃ នីសា ដែលពួកគេគឺសុទ្ធតែជាសិស្សកំពុងតែសិក្សាចំណេះដឹងទូទៅកម្រិតវិទ្យាល័យនៅបាត់ដំបង ។ ទោះបីជាជាប់រវល់រៀនពេញម៉ោងយ៉ាងណាក្តី ដោយសារពួកគេស្រឡាញ់ទម្រង់របាំ «រស្មីដួងចន្ទ» នេះ ហើយបានឆ្លៀតពេលរៀនយូរឆ្នាំមកហើយជាមួយនឹងគ្រូរបាំពីមុនរបស់ពួកគេ តែមួយរយៈនេះ នាងខ្ញុំក៏ទទួលបន្ទុកបណ្តោះអាសន្នជាមួយពួកគេដែរ ដោយសារគ្រូមុនគាត់ឈប់។ ការសម្តែងនាសប្តាហ៍មុននេះ នាងខ្ញុំគ្រាន់តែជួយសម្រួលផ្នែកខ្លះរបស់ពួកគេតែប៉ុណ្ណោះ ហើយការហាត់សមមុនសម្តែង គឺជាការខំប្រឹងរបស់ពួកគេ ដោយមាន ម៉ៅ រស្ម៊ី ជាអ្នកដឹកនាំ»។
បើតាមអ្នកគ្រូ ចាន់ ស្រីរឿន ឲ្យដឹងថា ផ្នែករបាំមួយ គឺមានចំនួនច្រើនបែបច្រើនទម្រង់ថែមទៀត ដែលយើងអាចឃើញការសម្ដែងនូវរបាំនីមួយៗក្នុងកម្មវិធីផ្សេងៗ ប៉ុន្តែដោយមានរបាំខ្លះ គឺត្រូវបានសម្ដែងតែនៅក្នុងឱកាសពិសេស ឬសម្រាប់តែសម្ដែងជូនដល់ព្រះមហាក្សត្រ ទ្រង់ទតតែប៉ុណ្ណោះ ទើបយើងជាប្រជាពលរដ្ឋកម្របានឃើញរបាំទាំងនោះផ្ទាល់។
អ្នកគ្រូ ចាន់ ស្រីរឿន បន្តថា៖ «តាមពិតទៅរបាំរស្មីដួងចន្ទនេះជាទម្រង់របាំបុរាណមានយូរយារណាស់មកហើយ និងជារបាំមួយប្រភេទមានលក្ខណៈទន់ភ្លន់ សុភាពរាបសា និងរេរាំទៅតាមចង្វាក់នៃបទភ្លេងគួរឲ្យចង់គយគន់ និងជាពិសេស ការសម្តែងមានភ្លើងទៀនបំភ្លឺ។ តួយ៉ាងដូចជា នៅពេលសម្តែងលើកំណាត់ផ្លូវ ២.៥ កាលពីថ្ងៃទី ២១-២២ ខែធ្នូ កន្លងមកនោះ ប្អូនស្រី ម៉ៅ រស្ម៊ី ក៏បានបញ្ជាក់ប្រាប់ពីមូលហេតុនៃការសម្រេចចិត្តជ្រើសរើសរបាំនេះទៅសម្តែងពេលយប់ដែរ។ ប្អូនស្រីថា ដោយសាររបាំនេះសម្តែងមានភ្លើងទៀន ហើយការសម្តែងនៅពេលយប់ វាមានលក្ខណៈស៊ីគ្នាទៅនឹងបរិយាកាសនៃភ្លើងទៀននេះណាស់ ទើបសម្រេចយក។ របាំនេះ គេអាចសម្តែងជាក្រុមមានច្រើនទម្រង់ គឺអាចមានសមាជិក ៣ នាក់ អាច ៥ នាក់ និងចំនួន ៧ នាក់»។
បណ្តុំទស្សនីយភាពនៃការសម្តែងសិល្បៈរបាំ សម្តែងសៀក ដើរបង្ហាញម៉ូដ តាំងបង្ហាញស្នាដៃសិល្បៈនានា ដែលរៀបចំឡើងជាលើកដំបូង ដោយក្រុមអ្នកសិល្បៈចម្រុះជំនាញ កាលពីចុងសប្តាហ៍កន្លងមកចំនួន ២ ថ្ងៃ នៅលើកំណាត់ផ្លូវ ២.៥ ក្រុងបាត់ដំបង ខេត្តបាត់ដំបងនោះ មិនត្រឹមតែទទួលបានលទ្ធផលជោគជ័យខ្លាំង និងថែម-ទាំងត្រូវបានមជ្ឈដ្ឋានមហាជន និងអាជ្ញាធរតំបន់ មូលមតិស្នើឲ្យមានការរៀបចំប្រចាំឆ្នាំទៀតផង៕