ភ្នំពេញៈ បន្ទាប់ពីទទួលបានប្រាក់ឧបត្ថម្ភពីលោកនាយករដ្ឋមន្ត្រី ហ៊ុន សែន ចំនួន ១ ម៉ឺនដុល្លារ និងពីតារាចម្រៀងប្រុសទ្រនំធំហង្សមាសលោក ខេមរៈ សិរីមន្ត ១ ពាន់ដុល្លារ ព្រមទាំងសប្បុរសជនទាំងក្រៅ និងក្នុងសិល្បៈជាហូរហែដើម្បីសម្រួលការលំបាក និងអាចមានប្រាក់ព្យាបាលជំងឺបាននោះ តារាចម្រៀងវ័យ ៤០ ឆ្នាំ លោក ចាន់ សម័យ សន្យាយ៉ាងមុតមាំថានឹងវិលទៅបំពេអារម្មណ៍បងប្អូនវិញ។
ដំណឹងវិលត្រឡប់មកប្រឡូកក្នុងសិល្បៈចម្រៀងពេញមុខពេញមាត់សាជាថ្មីម្តងទៀតរបស់លោក ចាន់ សម័យ នេះ ក៏ទទួលបាននូវចំណាប់អារម្មណ៍ និងការសាទរពីសំណាក់ប្រិយមិត្តយ៉ាងខ្លាំងតែម្តង ក្រោយខានស្តាប់សំនៀងដ៏ក្រអួនក្រអៅមានទឹកដម និងច្រៀងបទចម្រៀងបានគ្រប់ទម្រង់របស់លោកច្រើនជាង ១០ ឆ្នាំ ដែលបិទបាំងនូវជីវភាពដ៏កម្សត់លំបាក និងបៀមទុក្ខសោកដោយជំងឺប្រចាំកាយរបេងឆ្អឹងយូរឆ្នាំ តែខំប្រឹងតស៊ូរួមរស់ជាមួយប្រពន្ធ និងកូនប្រុសស្រីទាំង ៥ មកនោះ។
គេឃើញមានមហាជនសឹងតែគ្រប់ស្រទាប់តែម្តងចូលទៅ Comment លើកទឹកចិត្ត និងគាំទ្រដល់លោក ចាន់ សម័យ ពេលបានដឹងថា លោក នឹងវិលមកបំពេអារម្មណ៍ប្រិយមិត្តវិញ ដោយបើកចំហនោះ។ ដោយមានអ្នកខ្លះសរសេរលើកទឹកចិត្តថា៖ «គាត់អាចក្រោកឡើងម្តងទៀត ព្រោះមានកម្លាំងលើកទឹកចិត្ត និងការផ្តល់តម្លៃនៃសមត្ថភាពរបស់គាត់ពីពុកម៉ែបងប្អូនទាំងអស់។ ប្រឹងឡើងប្អូនប្រុស បងនៅតែចង់ស្តាប់សំឡេងប្អូនជានិច្ច (សំឡេងប្អូនធ្ងន់ល្អ ហើយច្បាស់ៗមិនរ៉ែ មិនង៉ុល ស្រែកបានខ្លាំងល្អសូមសរសើរ ចូលចិត្តស្តាប់ជានិច្ច។ មិនដូចជា អ្នកចម្រៀងខ្លះស្រែកលំៗ តាមតែភ្លេងហើយចេះតែល្បីទៅរួចដែរ។ ជូនពរប្អូនឆាប់ជាពីជំងឺ និងបានច្រៀងឲ្យបានល្បីដូចជាកាលពីមុន សូមខំតស៊ូឡើងៗប្អូន!» និងសារខ្លះថា៖ «ខំប្រឹងឡើងវិញបង កុំអស់សង្ឃឹម បងប្អូននៅតែគ្រាំទ្រ និងលើកទឹកចិត្តបងជានិច្ច។ ល្អណាស់បង បើមានឱកាសហើយត្រូវតែងើបឡើងក្តោបវាឲ្យជាប់កុំឲ្យវារបូតម្តងទៀតណា!»។
ក្រៅពីនេះមានសារជូនពរពីប្រិយមិត្តគាំទ្រផងដែរថា៖ «សូមជូនពរបងទទួលបានជោគជ័យសាជាថ្មីព្រមទាំងឆាប់ជាសះស្បើយពីជំងឺមិនល្អទាំងឡាយផងដែរ ស៊ូៗណាបង គឺមានមនុស្សជាច្រើនចាំផ្តល់កម្លាំងចិត្តដល់បង។ បងប្រុសទឹកដមសំឡេងល្អណាស់បងអាចបន្តការងារសិល្បៈដូចដើម គាំទ្រសិល្បៈខ្មែរយើងជានិច្ច។ ខ្ញុំសង្ឃឹមថា នឹងបានស្តាប់បទចម្រៀងបងសាជាថ្មីទៀត Idol ខ្ញុំ»។
លោក ចាន់ សម័យ ជាតារាចម្រៀងប្រុសល្បីនៅផលិតកម្មព្រះវិហារ នាឆ្នាំ ២០០០-២០០១ ម្ចាស់បទចម្រៀងនានាមានបទ «អ្នកតាចង់មេមាន់» បទ «អូនសាវា» បទ «គិតយ៉ាងណា» បទ «ស្តាយក្រោយ» បទ «ចាញ់ទាំងអស់» និងបទចម្រៀងក្នុងកុនចិន តៃវ៉ាន់រឿង «ស្នេហា F4» ជាដើមនោះក្តី ក្រោយពីលេចដំណឹងជួបទុក្ខលំបាកក្នុងជីវភាពមក ក៏ឃើញតារាចម្រៀងចំណូលថ្មីនៃហង្សមាសលោក ខេមរៈ សិរីមន្ត បានប្រគល់ភារកិច្ចទៅឲ្យបងប្រុសបង្កើតគឺលោក ខេមរៈ ភារុណ នាំយកថវិកា ១ ពាន់ ដុល្លារ ទៅជូនលោក ចាន់ សម័យ ដោយសារលោកជាប់រវល់ចេញទៅប្រទេសថៃ បន្ទាប់ពីតារាចម្រៀងស្រីអ្នកនាង ស៊ិន ឧត្តមផល្លា បាននាំអំណោយផ្ទាល់ជាគ្រឿងបរិភោគ និងប្រាក់ ១០០ ដុល្លារមកនោះ។
លោក ចាន់ សម័យ ក៏បានសន្យាយ៉ាងមុតមាំពីការវិលវិញរបស់ខ្លួនដែរថា៖ «ខ្ញុំសូមសន្យាថា នឹងវិលទៅបំពេអារម្មណ៍បងប្អូនវិញដូចពីមុន»៕