The Phnom Penh Post Search

Search form




Logo of Phnom Penh Post newspaper Phnom Penh Post - មហោស្រព​ចាប៉ីដង​វែង​រំឭក​ខួប ២ ឆ្នាំ​នៃ​ការ​ចូល​ជា​បេតិកភណ្ឌ

មហោស្រព​ចាប៉ីដង​វែង​រំឭក​ខួប ២ ឆ្នាំ​នៃ​ការ​ចូល​ជា​បេតិកភណ្ឌ

Content image - Phnom Penh Post
ក្រុម​យុវជនខ្មែរ​​នៃ​សហ​គមន៍​ចាប៉ីអមតៈ​នា​ពេល​ចូលរួម​អប​អរសាទរ​ពិធី​មហោស្រព​ចាប៉ីដង​វែង​កន្លងមក​​​។ សហការី

មហោស្រព​ចាប៉ីដង​វែង​រំឭក​ខួប ២ ឆ្នាំ​នៃ​ការ​ចូល​ជា​បេតិកភណ្ឌ

ក្រុង​សៀមរាបៈ ដើម្បី​ជា​កិច្ច​អបអរសាទរ​នៃ​ការបញ្ចូល​ចាប៉ី​ដង​វែង​ខ្មែរ ឲ្យ​ចូល​ជា​សម្បត្តិ​បេតិកភណ្ឌ​អរូបី​នៃ​មនុស្ស​ជាតិ​របស់​អង្គការ​យូណេស្កូ នៅ​ក្នុង​ខួប​រយៈពេល ២ ឆ្នាំ​នោះ​នឹង​មាន​ការ​រៀបចំ​មហោស្រព​ចាប៉ី​ដង​វែង​ធ្វើ​នៅ​ទីតាំង​មជ្ឈមណ្ឌល​បេតិកភណ្ឌ​របស់​អង្គការ​សិល្បៈ​ខ្មែរ​អមតៈ ក្នុង​បរិវេណ​វត្ត​រាជ​បូណ៌ ក្រុង​សៀមរាប រយៈពេល ៣ ថ្ងៃ គឺ​នៅ​ថ្ងៃ​ទី ៣០ ខែ វិច្ឆិកា ដល់​ថ្ងៃ​ទី ២ ខែ​ធ្នូ ឆ្នាំ ២០១៨ ខាង​មុខ​នេះ។

ក្រោម​គម្រោង​មូលនិធិ​នៃ​ក្រសួងវប្បធម៌ និង​វិចិត្រសិល្បៈ​តាមរយៈ​ផ្នែក​បេតិកភណ្ឌ​វប្បធម៌​អរូបី​នៃ​អង្គការ​យូណេស្កូ និង​សហការ​រៀបចំ​ដោយ អង្គការ​សិល្បៈ​ខ្មែរ​អមតៈ រថយន្ត​តន្ត្រី​ទិព្វ​ខ្មែរ សហគមន៍​ចាប៉ី​អមតៈ និង​បណ្ដា​ដៃគូ សិល្បករ​ក្នុង​ស្រុក​នានា នឹង​នាំមក​ជូន​នូវ​ផ្ទាំង​ទស្សនីយ​ភាព​នៃ​ចម្រៀង និង​តន្ត្រី​ក្នុង​ទម្រង់​សិល្បៈ​ចាប៉ី​ដង​វែង និង​ការ​សម្ដែង​សិល្បៈ​នានា ជា​ពិសេស​គឺ​ការ​សម្ដែង​ចម្រៀង​ចាប៉ី ៥ នាក់ ដោយ​មាន​ព្រឹទ្ធាចារ្យ​ចាប៉ី​ដង​វែង​ដែល​ជា​តំណាង​ឲ្យ​ខេត្ត​នីមួយៗ និង​ការ​សម្ដែង​ចាប៉ី​ទាំង ២ ជំនាន់​ផង​ដែរ។

លោក សុង សេង នាយក​នៃ​ម​ជ្ឈមណ្ឌល​បេតិកភណ្ឌ​នៃ​អង្គការ​សិល្បៈ​ខ្មែរ​អមតៈ​ឲ្យ​ដឹង​ថា៖ «មហោ​ស្រព​ចាប៉ី​ដង​វែង​នេះ គឺជា​ព្រឹត្តិការណ៍​ជា​ប្រវត្តិសាស្ត្រ​សម្រាប់​កម្ពុជា និង​ពិភពលោក​ដោយ​មូលនិធិ និង​ការ​សហការ​ពី​ក្រសួង​វប្បធម៌ និង​វិចិត្រ​សិល្បៈ ផ្នែក​បេតិកភណ្ឌ​អរូបី​នៃ​អង្គការ​យូណេស្កូ សហគមន៍​សិល្បៈ ក្រុម​សិល្បករ និង​ដៃគូ​នានា។ យើង​ពិត​ជា​ចង់​ឲ្យ​មាន​ទស្សនិកជន​កាន់​តែ​ច្រើន មក​ចូលរួម និង​បាន​ស្វែង​យល់​អំពី​តម្លៃ​ទម្រង់​សិល្បៈ​ចាប៉ី​ដង​វែង»។

Content image - Phnom Penh Post
ព្រឹទ្ធាចារ្យ​ចាប៉ីដងវែង​លោក​តា គង់ ណៃ ពេល​លេង​ចាប៉ី​ដងវែង​។ ភ្នំពេញ ប៉ុស្តិ៍

លោក​បន្តថា៖ «មហោស្រព​នេះ​ធ្វើ​ដើម្បី​អបអរសាទរ​ការដាក់​បញ្ចូល​ចាប៉ីដងវែង​ជា​សម្បត្តិ​បេតិកភណ្ឌ​អរូបី​នៃ​មនុស្ស​ជាតិ​ដោយ​អង្គការ​យូណេស្កូ កាល​ពី​ថ្ងៃ​ទី ៣០ ខែ វិច្ឆិកា ឆ្នាំ ២០១៦ ក៏​ដូចជា​ការ​ផ្ដល់​ឱកាស​ដល់​សិល្បករ​ចាប៉ី និង​សិល្បករ​នានា អាច​ភ្ជាប់​ទំនាក់​ទំនង​ជាមួយ​ទស្ស​និកជន និង​ក្នុង​ចំណោម​អ្នក​អាជីព​ដូច​គ្នា​បាន​កាន់​តែ​ច្រើន​ឡើង​ផង​ដែរ»។

លោក ពេជ្រ សា​រ៉ា​ត ប្រធាន​សហគម​ន៍​ចាប៉ី​អមតៈ ក៏បាន​បញ្ជាក់​ពី​កម្មវិធី​សំខាន់​ខ្លះ​ថា៖ «កម្មវិធី​យើង​នឹង​មាន​រៀបចំ ៣ ថ្ងៃ​ឯណោះ។ ហើយ​បើ​គិត​ត្រឹម​ឆ្នាំ ២០១៨ នេះ​គឺមាន​រយៈពេល ២ ឆ្នាំ នៃ​ការ​ដា​ក់បញ្ចូល​ចាប៉ី​ខ្មែរ​ពី​អង្គការ​យូណេស្កូ។ ដូច្នេះ​ក្រុម​ការងារ​រៀបចំ​ជា​មហោស្រព​នេះ​ឡើង ដើម្បី​អបអរ​សាទរ និង​ចែក​រំលែក​ពី​សិល្បៈ​ផ្នែក​តន្ត្រី​បុរាណ​ខ្មែរ​នេះ​ដល់​កូន​ចៅ​ជំនាន់​ក្រោយ និង​ជន​បរទេស​ឲ្យ​បាន​ស្វែង​យល់​បន្ថែម»៕

អត្ថបទគួរចាប់អារម្មណ៍