ក្រុងសៀមរាបៈ នៅថ្ងៃទី ៣ ខែសីហាខាងមុខនេះនឹងមានពិធីប្រកាសបើកមហោស្រពតន្ត្រីបុរាណថ្មី ឬគេហៅថា «បុណ្យរួម» លើកទី២ នៅលើទឹកដីខេត្តសៀមរាបដែលនឹងប្រព្រឹត្តទៅនៅខែ កញ្ញា ឆ្នាំ ២០១៩ មានចំនួន ៦ ថ្ងៃ ដោយមានបណ្តាប្រទេសសមាជិកនៃតំបន់ទន្លេមេគង្គ និងជប៉ុនចូលរួមផងដែរ។
«បុណ្យរួម» ដែលជាមហោស្រពតន្ត្រីបុរាណថ្មីនៃតំបន់ទន្លេមេគង្គ និងជប៉ុននឹងប្រារព្ធធ្វើនៅខេត្តសៀមរាបក្នុងខែកញ្ញាខាងមុខនេះ និងជាលើកទី២ ផងដែរសម្រាប់មជ្ឈមណ្ឌលបេតិកភណ្ឌរបស់អង្គការសិល្បៈខ្មែរអមតៈ ដែលមានមូលដ្ឋាននៅឯក្រុងសៀមរាប ខេត្តសៀមរាបបានរៀបចំមហោស្រពតន្ត្រីបុរាណថ្មីនៃតំបន់ទន្លេមេគង្គ និងជប៉ុនដែលមានការចូលរួមពីក្រុមតន្ត្រីមកពីប្រទេសទាំង ៦ នៅក្នុងតំបន់ទន្លេមេគង្គ និងជប៉ុន។
លោក សុង សេង នាយកមជ្ឈមណ្ឌលបេតិកភណ្ឌបានប្រាប់ឲ្យដឹងថា៖ «បុណ្យរួមនឹងរៀបចំឡើងរយៈពេល ៦ ថ្ងៃ មានកម្មវិធីច្រើនដូចជា ការប្រគំតន្ត្រី សិក្ខាសាលា វេទិកាពិភាក្សា និងការផ្លាស់ប្តូរបទពិសោធនានាពីបណ្តាប្រទេសជាសមាជិកចូលរួម។ បុណ្យរួមនេះរៀបចំឡើងដោយមជ្ឈមណ្ឌលបេតិកភណ្ឌរបស់អង្គការសិល្បៈខ្មែរអមតៈដោយមានការគាំទ្រពីខាងមូលនិធិជប៉ុនប្រចាំនៅអាស៊ីពីក្រុមហ៊ុនផាទីក និងសណ្ឋាគារទ្រីឡាញ និងដៃគូសហការជាច្រើនទៀតមានដូចជា បេមប៊ូស្តេក សហគ្រាសសង្គមហ្វារ សាកលវិទ្យាល័យបញ្ញាសាស្ត្រនៅខេត្តសៀមរាប សាកលវិទ្យាល័យសៅស៍អ៊ីសថ៍អេយសៀ សមាគមសម្ព័ន្ធភាពបារាំង និងហាងកាហ្វេហាតរ៉ក់អង្គរ។ លើសពីនេះបុណ្យរួមក៏ជាការជួបជុំរវាងសិល្បករកម្ពុជា និងសិល្បករជាច្រើននាក់ទៀតមកពីជុំវិញតំបន់មេគង្គ និងប្រទេសជប៉ុនទៀតផង»។
លោក សុង សេង បន្តថា៖ «កម្មវិធីបុណ្យរួមនេះមិនគ្រាន់តែក្លាយទៅជាវេទិកាសម្រាប់ផ្សព្វផ្សាយអំពីសិល្បៈតន្ត្រីនៃតំបន់ទន្លេមេគង្គ និងប្រទេសជប៉ុនប៉ុណ្ណោះទេ តែវាជាវេទិកាមួយដ៏សំខាន់នៅក្នុងការធ្វើឲ្យសិល្បករក៏ដូចជាប្រជាជនដែលមានវប្បធម៌ប្រហាក់ប្រហែល ឬផ្សេងគ្នាដោយបានបង្កើតចំណងមិត្តភាព ឬបង្កើតនូវភាតរភាពដោយពុំគិតអំពីបញ្ហាជាតិសាសន៍ ឬប្រកាន់ពណ៌សម្បុរនោះឡើយ។ ពួកគេនឹងចែករំលែកបទពិសោធជុំវិញការច្នៃប្រឌិតនៃតន្ត្រីប្រពៃណីរបស់ពួកគេនៅកម្មវិធីបុណ្យរួម ខណៈបុណ្យនេះមានគោលបំណងលើកទឹកចិត្តសិល្បករនៅក្នុងការយកតន្ត្រីជាគោលក្នុងការចែករំលែកវប្បធម៌ បង្កើតជាទំនាក់ទំនងរវាងគ្នា និងគ្នា និងបង្កើតតន្ត្រីបែបច្នៃប្រឌិតរួមគ្នា។ ក្រៅពីនេះក៏ជាឱកាសសម្រាប់សិល្បករទាំងអស់ដែលចូលរួមអាចផ្លាស់ប្តូរនូវបទពិសោធគ្នាទៅវិញទៅមកបានតាមរយៈតន្ត្រី ព្រមទាំងបង្កើតឱកាសទៅឲ្យពួកគាត់អាចសម្តែងរួមគ្នាបានទៀតផង»។
កម្មវិធី «បុណ្យរួម» នឹងរៀបចំឡើងចាប់ពីថ្ងៃទី ៣ ដល់ ទី ៨ ខែ កញ្ញា ឆ្នាំ ២០១៩ នៅក្រុងសៀមរាប ខណៈពេល ៣ ថ្ងៃ ដំបូងជាកម្មវិធីផ្លាស់ប្តូរនូវបទពិសោធគ្នាទៅវិញទៅមករវាងតន្ត្រីករ ហើយពីថ្ងៃទី ៥ ដល់ទី ៨ ជាកម្មវិធីសម្រាប់សាធារណជនចូលរួមជាមួយសិល្បករនៅក្នុងវេទិកាសិក្ខាសាលាពិភាក្សាគ្នា និងការប្រគំតន្ត្រីផ្សេងៗ៕