ភ្នំពេញៈ កម្មវិធីមហោស្រពភាពយន្តខ្លីចតុមុខបង្កើតឡើងក្នុងគោលបំណងអបអរភាពយន្តខ្លីៗទាំងអស់ពីជុំវិញពិភពលោក និងដើម្បីស្វាគមន៍រដូវកាលថ្មី គឺបើកឱកាសទទួលរឿងប្រកួតពីសមិទ្ធកររឿងខ្លី ខណៈមហោស្រពនេះគឺដើម្បីលើកទឹកចិត្តដល់យុវសមិទ្ធករឲ្យបង្ហាញទេពកោសល្យខ្លួនទៅពិភពលោក។ កម្មវិធីមហោស្រពលើកទី ៨ នេះរៀបចំឡើងដោយក្រុមហ៊ុនភាពយន្តឈូករ័ត្ន (Sunflower Film Alliance-SFA)។
ខណៈកម្មវិធីមហោស្រពភាពយន្តខ្នាតខ្លីចតុមុខឆ្នាំ ២០១៩ ចាប់ផ្តើមទទួលស្នាដៃខ្សែភាពយន្តខ្នាតខ្លីទាំងស្នាដៃរបស់ផលិតករខ្មែរ និងបរទេស តាំងពីដើមខែមីនាមកនោះហាក់ដូចជានៅពុំទាន់មានភាពផុសផុលខ្លាំងពីសំណាក់ផលិតករបញ្ជូនស្នាដៃចូលរួមនៅឡើយទេ តែក៏ជារឿងដែលជាដំណឹងល្អសម្រាប់ក្រុមផលិតករផ្នែកភាពយន្តឯកសារដែរព្រោះថាកម្មវិធីឆ្នាំនេះក៏ទទួលយកស្នាដៃភាពយន្តឯកសារមកប្រកួតផងដែរ។
លោក គាំ វុត្ថា ប្រធានគ្រប់គ្រងផ្នែកព័ត៌មាននៃកម្មវិធីមហោស្រពភាពយន្តខ្នាតខ្លីចតុមុខបានបង្ហើបប្រាប់ភ្នំពេញប៉ុស្តិ៍ឲ្យដឹង ខណៈពេលធ្វើពិធីចាក់បញ្ចាំងខ្សែភាពយន្តខ្លីដែលបានជាប់រង្វាន់កាលពីឆ្នាំ ២០១៨ នៅមហោស្រពភាពយន្តបេតិកភណ្ឌនៅក្នុងក្រុងសៀមរាបកាលពីដើមខែឧសភា ឆ្នាំ ២០១៩ ថា៖ «ដោយសារចង់ពញ្ញាក់អារម្មណ៍មហាជនខ្មែរ និងផលិតករដែលមានបំណងផ្ញើស្នាដៃវីដេអូខ្លួនមកចូលរួមមានចំនួនច្រើនកើនឡើង។
ម្យ៉ាងទៀតចង់បញ្ជ្រាបព័ត៌មានឲ្យកាន់តែច្បាស់ថា មហោស្រពភាពយន្តខ្លីចតុមុខមានលក្ខណៈយ៉ាងណាខ្លះយើងបានរៀបចំកម្មវិធីបញ្ចាំងខ្សែភាពយន្តខ្លីចំនួន ៦ រឿងដែលទទួលបានរង្វាន់ និងជាស្នាដៃល្អកាលពីឆ្នាំមុនមកបញ្ចាំងឲ្យមហាជនទស្សនា និងស្វែងយល់ពីកម្មវិធីបន្ថែមដែរ»។
មហោស្រពភាពយន្តខ្នាតខ្លីចតុមុខឆ្នាំ ២០១៩ នេះបានចាប់ផ្តើមដំណើរការបើកយុទ្ធនាការទទួលភាពយន្តខ្នាតខ្លីជាវណ្ណកម្មរបស់ផលិតករទាំងនៅក្នុងស្រុក និងក្រៅស្រុកសម្រាប់ចូលរួមជាបណ្តើរៗហើយគឺចាប់តាំងពីដើមខែមីនា និងឈប់ទទួលនៅត្រឹមថ្ងៃទី ១២ ខែកក្កដា ឆ្នាំ ២០១៩ ខាងមុខហើយ CSFF នឹងជ្រើសរើសរឿងខ្លីដែលលេចធ្លោនៅក្នុងពាក់កណ្តាលខែកក្កដានេះដែរ ខណៈជយលាភីនឹងត្រូវបែងចែកជា ៤ ប្រភេទគឺទី ១ ភាពយន្តខ្លីឆ្នើមរបស់កម្ពុជាទី ២ ភាពយន្តខ្លីឆ្នើមបន្ទាប់របស់កម្ពុជាទី ៣ រង្វាន់ទស្សនិកជនដល់ភាពយន្តខ្លីក្នុងស្រុក និងទី ៤ រង្វាន់ទស្សនិកជនដល់ភាពយន្តខ្លីអន្តរជាតិ។
លោក គាំ វុត្ថា បញ្ជាក់ប្រាប់ពីចំនួនត្រួសៗនៃការទទួលស្នាដៃខ្សែភាពយន្តខ្នាតខ្លីនានាទាំងខ្មែរ និងបរទេស និងបង្ហើបឲ្យដឹងពីដំណឹងល្អថ្មីមួយសម្រាប់អ្នកផលិតខ្សែភាពយន្តឯកសារដែរថា៖ «គិតត្រឹមខែនេះ យើងទើបទទួលបានរឿងដែលគេបញ្ជូនមកទាំងខ្មែរ និងបរទេសមានចំនួនតែប្រមាណ ៥៦-៥៧ រឿងតែប៉ុណ្ណោះ ខណៈភាពយន្តខ្លីរបស់ខ្មែរមាន ៤ រឿង។ តែបើតាមទម្លាប់នោះគឺនៅក្នុងខែមិថុនានេះ យើងនឹងទទួលបានស្នាដៃដែលបញ្ជូនមកច្រើន ហើយឆ្នាំនេះយើងក៏បានទទួលយកស្នាដៃភាពយន្តឯកសារនៅក្នុងកម្មវិធីផងដែរ»។
មហោស្រពភាពយន្តខ្នាតខ្លីចតុមុខប្រចាំឆ្នាំ ២០១៩ នេះត្រូវលោក គាំ វុត្ថា បន្ថែមឲ្យដឹងថានឹងមានការប្រគល់នូវរង្វាន់ជយលាភីនៃវគ្គផ្តាច់ព្រ័ត្រមានចំណាត់ថ្នាក់ពីលេខ ១ លេខ ២ និងលេខ ៣ វិញហើយសម្រាប់វណ្ណកម្មភាពយន្តខ្មែរ ខណៈវណ្ណកម្មបរទេសគឺមាន ១ រង្វាន់តែប៉ុណ្ណោះ។ ចំពោះកម្មវិធីផ្លូវការចុងក្រោយនៃមហោស្រពភាពយន្តខ្លីចតុមុខឆ្នាំ ២០១៩ នេះនឹងធ្វើនៅថ្ងៃទី ៥ រហូតទៅដល់ថ្ងៃទី ៨ ខែកញ្ញា ឆ្នាំ ២០១៩ ខាងមុខ៕