.jpg)
ក្រុមយុវសមិទ្ធករ និងអ្នកចូលរួមមហោស្រពភាពយន្តខ្លីចតុមុខឆ្នាំមុន។ រូបថត សហការី
ភ្នំពេញ៖ រាល់សា្នដៃភាពយន្តខ្លីរបស់សមិទ្ធករវ័យក្មេងនៅតែបន្តទទួលយកមកចូលរួមប្រកួតក្នុងកម្មវិធីមហោស្រពភាពយន្តខ្លីចតុមុខលើកទី ៩ ដដែល បើទោះជានៅពេលនេះមានការរំខាន និងកំពុងតែបង្កពីជំងឺកូវីដ ១៩ យ៉ាងណាក្តី ខណៈមហោស្រពនៅតែរាប់បញ្ចូលនូវភាពយន្តខ្លីកម្ពុជា ដើម្បីលើកទឹកចិត្តទៅដល់ក្រុមអ្នកផលិតក្មេងៗ ឲ្យមានឱកាសបង្ហាញទេពកោសល្យរបស់ខ្លួន ដែលនឹងបន្តរហូតទៅដល់ចុងខែឧសភា ឆ្នាំ ២០២០ ខាងមុខនេះ។
បើតាមសេចក្តីប្រកាសព័ត៌មានពីអ្នករៀបចំកម្មវិធីមហោស្រពភាពយន្តខ្លីចតុមុខនៅតាមគេហទំព័រផ្លូវការខ្លួននោះបានឲ្យដឹងថា៖ «មហោស្រពភាពយន្តខ្លីចតុមុខ (CSFF) នៅតែទទួលប្រកួតស្នាដៃរឿងខ្លី រហូតដល់ចុងខែឧសភា ឆ្នាំ ២០២០ ទោះបីជាជំងឺកូវីដ ១៩ កំពុងរីករាលដាលក្តី ហើយគណៈកម្មការមហោស្រពយើង នៅបន្តទទួលយករឿងមកប្រកួតសម្រាប់ឆ្នាំ ២០២០ ជាធម្មតាតាមការគ្រោងទុកដដែល។ ក៏ប៉ុន្តែមហោស្រពភាពយន្តខ្លីចតុមុខ មិនអាចរៀបចំកម្មវិធីស្វែងយល់កុនខ្លីចតុមុខបានទេនៅក្នុងស្ថានភាពនេះ»។
ប្រភពដដែលបន្តថា៖ «មហោស្រពភាពយន្តខ្លីចតុមុខ (CSFF) ត្រូវបានចាប់បដិសន្ធិឡើង ដើម្បីអបអរទៅដល់ភាពយន្តខ្លីមកពីជុំវិញពិភពលោក និងស្វាគមន៍រដូវកាលថ្មីការបើកប្រកាសទទួលយករឿងប្រកួតដល់សមិទ្ធកររឿងខ្លី ចាប់តាំងពីដើមខែ មីនា ឆ្នាំ ២០២០ មក និងបន្តដល់ថ្ងៃទី ៣១ ខែ ឧសភា ឆ្នាំ ២០២០ ខាងមុខ ហើយមហោស្រពឆ្នាំនេះរៀបចំដោយអង្គការភាពយន្តឈូករ័ត្ន ឬ Sunflower Film Organization [SFO])។ មហោស្រពភាពយន្តខ្លីចតុមុខ នឹងជ្រើសរើសភាពយន្តខ្លី ដែលលេចធ្លោនៅពាក់កណ្តាលខែកក្កដា ឆ្នាំ ២០២០ ខាងមុខ។
ការបិទកម្មវិធីមហោស្រពភាពយន្តខ្លីចតុមុខលើកទី ៨ កាលពីឆ្នាំ ២០១៩ កន្លងមក។ រូបថត សហការី
ចំពោះជយលាភីនឹងត្រូវបែងចែកយ៉ាងហោចជា ៤ ប្រភេទនៃរង្វាន់ដែរ គឺប្រភេទភាពយន្តខ្លីឆ្នើមរបស់កម្ពុជា ប្រភេទភាពយន្តខ្លីឆ្នើមបន្ទាប់របស់កម្ពុជា រង្វាន់ទស្សនិកជនដល់ភាពយន្តខ្លីក្នុងស្រុក និងរង្វាន់ទស្សនិកជនដល់ភាពយន្តខ្លីអន្តរជាតិ»។
ចំពោះកម្មវិធីមហោស្រពធំ គ្រោងនឹងប្រព្រឹត្តទៅនៅដើមខែកញ្ញា ឆ្នាំ ២០២០ ខាងមុខ បន្ទាប់ពីកម្មវិធីមានប្រយោជន៍ជាបន្តបន្ទាប់រួមមានដូចជា «ការយល់ដឹងពីកុនចតុមុខ Chaktomuk Film Insight» កម្មវិធី «ជំរំភាពយន្តឈូករ័ត្ន SunflowerFilm Camp» ដែលជាយុទ្ធនាការផ្សព្វផ្សាយនៅតាមសាលារៀន និងការធ្វើសន្និសីទសារព័ត៌មាន។
លោក ស៊ុំ ស៊ីថែន ដែលជាប្រធានមហោស្រពភាពយន្តខ្លីចតុមុខលើកទី ៩ ឆ្នាំ ២០២០ នេះ បានថ្លែងដែរថា៖ «ឆ្នាំ ២០២០ គឺជាឆ្នាំ ដែលយើងចង់បន្តលើកទឹកចិត្តយុវជនកម្ពុជាឲ្យបានចូលរួមចែករំលែកនូវរឿងរ៉ាវជីវិតតាមរយៈស្នាដៃភាពយន្តខ្លីៗ របស់ពួកគេតែម្តង» ខណៈប្រធានមហោស្រពឆ្នាំទី ៩ រូបនេះក៏បានបន្តទៀតដែរថា៖ «ហេតុដូច្នេះហើយបានជាយើងបង្កើតពាក្យស្លោកមួយថា «ប្រាប់រឿងរបស់អ្នកឲ្យយើងដឹងផង-Bring Along Your Story» សម្រាប់កម្មវិធីមហោស្រពឆ្នាំ ២០២០ នេះ»។
អ្វីគួរឲ្យកត់សម្គាល់ និងមានសារៈសំខាន់ដល់យុវសមិទ្ធករ ជាពិសេសនោះគឺសម្រាប់ជយលាភីក្នុងកម្មវិធីមហោស្រព ដោយស្នាដៃពួកគេនឹងត្រូវបានយកទៅចាក់បញ្ចាំងនៅក្នុងកម្មវិធីមហោស្រពជាដៃគូក្រៅស្រុកដែរ ដូចជាកម្មវិធី Busan Arthouse International Film Festival និង Asia for Peace Film Festival ជាដើម។ សម្រាប់សមិទ្ធករវ័យក្មេងៗដែលចង់ចូលរួមក៏ដូចជាផ្សារភ្ជាប់រឿងរបស់អ្នកជាមួយទស្សនិកជនឲ្យបានច្រើនអាចផ្ញើរឿងខ្លីរបស់អ្នកមកយើងតាម https://filmfreeway.com/CSFF ឬតាម http://csff.co/submission/៕
