.jpg)
សកម្មភាពនាពេលរៀបចំកម្មវិធីនៃមហោស្រពភាពយន្តខ្លីចតុមុខឆ្នាំ ២០១៨ នៅសាលមហោស្រពចតុមុខ។ រូបថត CSFF ហេង ជីវ័ន
ភ្នំពេញៈ ខណៈដែលកម្មវិធីមហោស្រពភាពយន្តខ្នាតខ្លីចតុមុខនាឆ្នាំ ២០១៩ បានចាប់ផ្តើមទទួលនូវខ្សែភាពយន្តខ្នាតខ្លីទាំងស្នាដៃរបស់ផលិតករខ្មែរ និងបរទេសជាបណ្តើរៗតាំងពីដើមខែមីនាមកនោះហាក់ដូចជានៅពុំទាន់មានភាពផុសផុលខ្លាំងពីសំណាក់ផលិតករបញ្ជូនស្នាដៃខ្លួនចូលរួមនៅឡើយទេ។
នេះបើតាមការបង្ហើបឲ្យដឹងពីក្រុមអ្នករៀបចំមហោស្រពភាពយន្តខ្លីចតុមុខឆ្នាំនេះ ខណៈក៏ជាដំណឹងល្អសម្រាប់ក្រុមផលិតករផ្នែកភាពយន្តឯកសារព្រោះកម្មវិធីក៏ទទួលយកស្នាដៃភាពយន្តឯកសារផងដែរ។
លោក គាំ វុត្ថា ប្រធានគ្រប់គ្រងផ្នែកព័ត៌មាននៃកម្មវិធីមហោស្រពភាពយន្តខ្នាតខ្លីចតុមុខបានបង្ហើបប្រាប់ភ្នំពេញប៉ុស្តិ៍ឲ្យដឹង ខណៈពេលធ្វើពិធីចាក់បញ្ចាំងខ្សែភាពយន្តខ្លីដែលបានជាប់រង្វាន់កាលពីឆ្នាំ ២០១៨ នៅមហោស្រពភាពយន្តបេតិកភណ្ឌនៅក្នុងក្រុងសៀមរាបកាលពីថ្ងៃទី ២ ខែឧសភា ឆ្នាំ ២០១៩ ថា៖ «ដោយសារចង់ពញ្ញាក់អារម្មណ៍មហាជនខ្មែរ និងផលិតករដែលមានបំណងផ្ញើស្នាដៃវីដេអូ ខ្លួនមកចូលរួមមានចំនួនច្រើនកើនឡើង។
ម្យ៉ាងទៀតក៏ចង់បញ្ជ្រាបព័ត៌មានឲ្យកាន់តែច្បាស់ថា កម្មវិធីមហាស្រពភាពយន្តខ្លីចតុមុខ យើងមានលក្ខណៈយ៉ាងណាខ្លះនោះក៏បានរៀបចំកម្មវិធីបញ្ចាំង ខ្សែភាពយន្តខ្លីចំនួន ៦ រឿងដែលទទួលបានរង្វាន់ និងមានស្នាដៃល្អកាលពីឆ្នាំមុន (២០១៨) មកចាក់បញ្ចាំងឲ្យមហាជនបានទស្សនា និងស្វែងយល់ពីកម្មវិធីបន្ថែមផងដែរ»។
ឈុតមួយនៃកុនរឿង «ដងរែក» ដែលទទួលចំណាត់ថ្នាក់ឆ្នាំ ២០១៨។ រូបថត CSFF
ខណៈកម្មវិធីមហោស្រពភាពយន្តខ្នាតខ្លីចតុមុខប្រចាំឆ្នាំ ២០១៩ នេះបានចាប់ផ្តើមដំណើរការបើកនូវយុទ្ធនាការទទួលភាពយន្តខ្នាតខ្លីជាវណ្ណកម្មរបស់ផលិតករទាំងនៅក្នុងស្រុក និងក្រៅស្រុកសម្រាប់ចូលរួមជាបណ្តើរៗហើយគឺចាប់តាំងពីដើមខែមីនា និងឈប់ទទួលនៅត្រឹមថ្ងៃទី ១២ ខែកក្កដា ឆ្នាំ ២០១៩ ខាងមុខ។
លោក គាំ វុត្ថា បញ្ជាក់ប្រាប់ពីចំនួនត្រួសៗនៃការទទួលស្នាដៃខ្សែភាពយន្តខ្នាតខ្លីនានាទាំងខ្មែរ និងបរទេស និងបង្ហើបឲ្យដឹងពីដំណឹងល្អថ្មីមួយសម្រាប់អ្នកផលិតខ្សែភាពយន្តឯកសារដែរថា៖ «បើគិតនៅត្រឹមខែនេះ [ឧសភា] យើងទើបទទួលបានរឿងដែលគេបញ្ជូនមកទាំងខ្មែរ និងបរទេសមានចំនួនប្រមាណជា ៥៦-៥៧ រឿង តែប៉ុណ្ណោះ ខណៈភាពយន្តខ្លីរបស់ខ្មែរមាន ៤ រឿង។ តែបើតាមទម្លាប់នោះគឺនៅខែក្រោយ [មិថុនា] យើងនឹងទទួលបានស្នាដៃដែលបញ្ចូនមកច្រើន ហើយឆ្នាំនេះយើងក៏បានទទួលយកស្នាដៃភាពយន្តឯកសារក្នុងកម្មវិធីផងដែរ»។
សូមរំឭកដែរថា ភាពយន្តខ្លីឆ្នើមកាលពីឆ្នាំ ២០១៨ មានចំណងជើងថា «ខ្យល់ខែកុម្ភៈ» ដែលដឹកនាំរឿងដោយលោក មុន្នី កណ្ណដារង្គ ដោយរឿងនេះនិយាយពីបុរសរត់តុកាហ្វេម្នាក់ដែលខំប្រឹងថែរក្សាសម្ព័ន្ធភាពពីចម្ងាយរបស់គាត់ជាមួយនឹងមិត្តនារីគាត់ដែលរៀននៅឯបរទេស។
ដោយឡែកកម្មវិធីមហោស្រពភាពយន្តខ្នាតខ្លីចតុមុខប្រចាំឆ្នាំ ២០១៩ នេះត្រូវលោក គាំ វុត្ថា បន្ថែមឲ្យដឹងថានឹងមានការប្រគល់នូវរង្វាន់ជយលាភីនៃវគ្គផ្តាច់ព្រ័ត្រមានចំណាត់ថ្នាក់ពីលេខ ១ លេខ ២ និងលេខ ៣ វិញហើយសម្រាប់វណ្ណកម្មភាពយន្តខ្មែរ ខណៈវណ្ណកម្មបរទេសមានតែ ១ រង្វាន់ប៉ុណ្ណោះ។ ចំពោះកម្មវិធីផ្លូវការចុងក្រោយនៃមហោស្រពភាពយន្តខ្លីចតុមុខឆ្នាំ ២០១៩ នេះនឹងធ្វើនៅថ្ងៃទី ៥ រហូតដល់ទី ៨ ខែកញ្ញា ឆ្នាំ ២០១៩ ខាងមុខ៕
