.jpg)
រូបរបាំងជញ្ជាំងរបងជាព្រំដែនឧបសគ្គបន្ទះដែកនឹងតាំងខាងក្នុងវិចិត្រសាល។ Lim Sokchanlina
ភ្នំពេញៈ សិល្បករជំនាញថតរូបទាំងខ្មែរ និងបរទេសមកពីតំបន់អាស៊ី-អឺរ៉ុប សរុបចំនួន ១៤ រូប និងទីដាក់តាំងផ្សព្វផ្សាយពីស្នាដៃរូបថតចំនួន ៩ កន្លែង នឹងបង្ហាញបណ្តុំស្នាដៃរបស់ខ្លួនក្នុងព្រឹត្តិការណ៍មហោស្រពរូបថតភ្នំពេញលើកទី ៩ ឆ្នាំ ២០១៨ ដែលចាប់ផ្តើមនៅថ្ងៃទី ៥ ខែតុលា ខាងមុខ។
អនុប្រធានសមាគមរូបថតភ្នំពេញ លោក សុវណ្ណ ភីឡុង បានបង្ហើបប្រាប់ភ្នំពេញប៉ុស្តិ៍ត្រួសៗពីការរៀបចំព្រឹត្តិការណ៍មហោស្រពរូបថតភ្នំពេញឆ្នាំនេះថា៖ «ឆ្នាំនេះយើងនឹងដាក់តាំងបង្ហាញស្នាដៃសិល្បៈរូបថត នៅទីតាំងសាធារណៈចំនួន ៩ កន្លែងនៅទីក្រុងភ្នំពេញ ដោយរាប់ចាប់តាំងពីរបងស្ថានទូតបារាំង របងវិទ្យាស្ថានបារាំងនៅកម្ពុជា មជ្ឈមណ្ឌលបុប្ផាណា មជ្ឈមណ្ឌលពិព័រណ៍កោះពេជ្រ និងរបងវិទ្យាល័យព្រះស៊ីសុវត្ថិជាដើម។ ការសម្ពោធពិធីមហោស្រព រូបថត យើងនឹងធ្វើចំនួន ៣ ថ្ងៃពីថ្ងៃទី ៥ ដល់ថ្ងៃទី ៧ ខែតុលា ខណៈការដាក់តាំងពិព័រណ៍រូបថតរបស់សិល្បករទាំងអស់យើងនឹងដាក់ចាប់ពីថ្ងៃទី ៥ ខែតុលា បន្តដល់ថ្ងៃទី ៥ ខែវិច្ឆិកា ឆ្នាំ ២០១៨ គឺរយៈពេល ១ ខែឯណោះ»។
រូបថតនឹងដាក់បង្ហាញខាងក្នុងវិចិត្រសាល។ LY MIN (Lamo)
លោក សុវណ្ណ ភីឡុង បន្តថា៖ «កម្មវិធីសំខាន់ៗនោះមានដូចជាការដាក់តាំងពិព័រណ៍រូបថត ការជួបជាមួយសិល្បករជំនាញថតរូប ការចាក់បញ្ចាំងផ្ទាំងទស្សនីយភាពរូបថត និងការធ្វើសន្និសីទសារព័ត៌មានស្តីពីរូបថត។ ចំនួនសិល្បករចូលរួម នៅក្នុងឆ្នាំនេះចំនួនសិល្បករខ្មែរ និងបរទេសគឺមានចំនួនសរុប ១៤ រូប ហើយការបង្ហាញរូបថតយើងមាន ២ ប្រភេទធំៗគឺការដាក់តាំងនៅខាងក្រៅ និងនៅខាងក្នុងនៃទីកន្លែងពិព័រណ៍ រូបថតរបស់សិល្បករ»។
ដោយឡែកចំនួនសិស្ស និងនិស្សិតស្ម័គ្រចិត្តចូលរួមរៀបចំកម្មវិធីមហោស្រពរូបថតភ្នំពេញនៅឆ្នាំ ២០១៩ នេះហាក់ដូចជាមានការកើនឡើងចំនួនទ្វេដងឯណោះ ក្រោយពីពួកគាត់បានយល់ដឹងពីកម្មវិធីនេះច្រើនឆ្នាំកន្លងមកនោះ។
រូបស្តីពីទីក្រុង Yokainoshima នៅឆ្នាំ ២០១៣-២០១៥។ CHARLES FREGER
លោក សុវណ្ណ ភីឡុង ក៏បានកត់សម្គាល់ដែរថា៖ «សប្បាយចិត្តនឹងចំនួនប្អូនៗ ស្ម័គ្រចិត្តចូលរួមរៀបចំកម្មវិធីនេះ។ បើប្រៀបធៀបឆ្នាំ ២០១៧ ចំនួនយុវជនចូលរួមមានតែប្រមាណជាង ៦០ នាក់ តែប៉ុណ្ណោះ តែឆ្នាំនេះគឺមានចំនួនពួកគាត់ចូលរួមស្ម័គ្រចិត្តជាង ១០០ នាក់ឯណោះ ដើម្បីមករៀបចំនៅក្នុងកម្មវិធីឆ្នាំនេះ»៕
