ភ្នំពេញ៖ អ្នកចូលរួមអាចទទួលបានបទពិសោធថ្មីៗដូចជា ការសម្តែងសិល្បៈ ការប្រគំភ្លេងបុរាណ មហោរី ដែលអមជាមួយនឹងឧបករណ៍ភ្លេងប្រពៃណីកូរ៉េកាយ៉ាគីម គុនតៃក្វាន់ដូ ការសម្តែងគុនល្បុក្កតោខ្មែរ ការប្រគំតន្ត្រី K-pop លេងល្បែងប្រជាប្រិយកូរ៉េ ផាត់មុខបែបកូរ៉េ (K-beauty) ការបង្រៀន និងប្រកួតធ្វើម្ហូបកូរ៉េ នឹងមានក្នុងកម្មវិធីមហោស្រពវប្បធម៌កូរ៉េប្រចាំឆ្នាំ ២០១៩ រយៈពេល ២ ថ្ងៃ។
មជ្ឈមណ្ឌលសហប្រតិបត្តិការកម្ពុជា-កូរ៉េ (CKCC) បានសហការជាមួយនឹងស្ថានទូតសាធារណរដ្ឋកូរ៉េប្រចាំនៅកម្ពុជា បានរៀបចំមហោស្រពវប្បធម៌កូរ៉េលើកទី ៣ នៅឆ្នាំនេះ ដែលប្រារព្ធធ្វើនៅថ្ងៃទី ២៣-២៤ ខែ វិច្ឆិកា ឆ្នាំ ២០១៩។
បើតាមលោក អែល រស្មី ជាបុគ្គលិកផ្នែកទំនាក់ទំនងសាធារណៈនៃមជ្ឈមណ្ឌលសហប្រតិបត្តិការកម្ពុជា-កូរ៉េ បានឲ្យដឹងថា៖ «ជាសក្ខីភាពមហោស្រពវប្បធម៌កូរ៉េនេះ ប្រារព្ធឡើងក្នុងគោលបំណងដើម្បីពាំនាំទស្សនីយភាព និងចែករំលែកបទពិសោធល្អៗ ភាពសប្បាយរីករាយជូនដល់អ្នកចូលរួមទាំងអស់ ធ្វើនៅក្នុងមជ្ឈមណ្ឌលសហប្រតិបត្តិការកម្ពុជា-កូរ៉េ ក្នុងបរិវេណនៃសាកលវិទ្យាល័យភូមិន្ទភ្នំពេញ។
មហោស្រពវប្បធម៌កូរ៉េ ក៏បានក្លាយជាពិធីបុណ្យដ៏ធំជាងគេប្រចាំឆ្នាំរបស់មជ្ឈមណ្ឌលសហប្រតិបត្តិការកម្ពុជា-កូរ៉េ ដោយទទួលបានការគាំទ្រពីអ្នកចូលរួមប្រមាណជាង ៣ ៥០០ នាក់ នា ២ ឆ្នាំកន្លងទៅ។ តាមរយៈភាពជោគជ័យនេះផងដែរ មហោស្រពវប្បធម៌កូរ៉េ នឹងបង្ហាញ ខ្លួនសាជាថ្មីជាលើកទី ៣ ដែលប្រារព្ធនៅថ្ងៃទី ២៣-២៤ ខែ វិច្ឆិកា ឆ្នាំ ២០១៩ ចុងសប្តាហ៍នេះ ដូចអ្វីដែលបានសន្យាជាមួយអ្នកចូលរួមកាល ២ ឆ្នាំកន្លងទៅ។
លោកបានបន្តឲ្យដឹងពីកម្មវិធីត្រួសៗថា៖ «យើងមានកម្មវិធីដូចជាការសម្តែងសិល្បៈ ប្រគំភ្លេងបុរាណមហោរី ការសម្តែងឧបករណ៍ភ្លេងប្រពៃណីកូរ៉េកាយ៉ាគីម គុនតៃក្វាន់ដូ គុនល្បុក្កតោខ្មែរ ប្រគំតន្ត្រី K-pop លេងល្បែងប្រជាប្រិយកូរ៉េ ផាត់មុខបែបកូរ៉េ (K-beauty) ការបង្រៀន និងប្រកួតធ្វើម្ហូបកូរ៉េ។ លើសពីនេះ យើងក៏មានការចែកជូននូវមុខម្ហូបកូរ៉េឆ្ងាញ់ៗដល់អ្នកចូលរួមផងដែរ»៕