.jpg)
សត្វក្រៀល ដែលស្ថិតនៅតំបន់ការពាទេសភាពបឹងព្រែកល្ពៅ។ រូបថត សហការី
ភ្នំពេញ៖ រយពេល ១ ថ្ងៃពេញ នៅថ្ងៃទី ៧ ខែ ធ្នូ ឆ្នាំ ២០១៩ ខាងមុខនេះ មានការសហការគ្នារវាង អគ្គនាយកដ្ឋានរដ្ឋបាលការពារ និងអភិរក្សធម្មជាតិនៃក្រសួងបរិស្ថាន អង្គការជីវិតធម្មជាតិនៅកម្ពុជា អង្គការជីវិតសត្វស្លាបអន្តរជាតិ កម្មវិធីប្រចាំកម្ពុជា និងសាកលវិទ្យាល័យភូមិន្ទភ្នំពេញរៀបចំមហោស្រពសត្វស្លាប និងធម្មជាតិ លើកដំបូង នៅក្នុងបរិវេណនៃសាកលវិទ្យាល័យភូមិន្ទភ្នំពេញ។
លោក ប៊ូ វរសក្ស ជានាយកកម្មវិធីនៃអង្គការ Bird Life International Cambodia Programme បានបង្ហើបឲ្យដឹងពីគោលបំណង និងកម្មវិធីត្រួសៗនៃមហោស្រពនេះថា៖ «យើងចង់បង្កើតការយល់ដឹងពីការអភិរក្សលើសត្វស្លាបទៅដល់សាធារណជន អប់រំឲ្យបានយល់ពីការអភិរក្សទៅដល់យុវជន អំពីសត្វស្លាប ដែលជិតផុតពូជ តាមរយៈការធ្វើសិក្ខាសាលា នៃបទបង្ហាញពីអ្នកជំនាញ។ ជាពិសេសជំរុញលើកទឹកចិត្តឲ្យសាធារណជន និងយុវជនឲ្យមានការចាប់អារម្មណ៍ និងផ្តើមមានការស្រឡាញ់ដល់សត្វស្លាប ធម្មជាតិ និងបរិស្ថាន តាមរយៈចូលរួមនៃសកម្មភាពអប់រំពីបញ្ហាទាំងនេះ។
លោក ប៊ូ វរសក្ស បន្តថា៖ «គោលបំណងនៃកម្មវិធីនេះ គឺយើងចង់ធ្វើការផ្សព្វផ្សាយ បង្កើនការយល់ដឹង អំពីការងារ អភិរក្សសត្វស្លាប និងធម្មជាតិដល់សាធារណជន និងលើកកម្ពស់ការចូលរួម ក្នុងកិច្ចការពារ និងអភិរក្ស តាមរយៈការធ្វើបទបង្ហាញអំពីអ្នកជំនាញ ការសម្តែង ការតាំងពិព័រណ៍ ល្បែងអប់រំ ប្រកួតថតរូបរបស់កុមារ និងការសិក្សាពីជីវចម្រុះជាដើម។ សាធារណជនទូទៅ ក៏អាចអញ្ចើញចូលរួមដោយសេរីបាន គឺចាប់ពីម៉ោង ៨ ព្រឹក ដល់ ៥ ល្ងាច។ គោលដៅនៃការផ្សព្វផ្សាយលើកនេះ យើងសម្រេចយកទីតាំងសាកលវិទ្យាល័យភូមិន្ទភ្នំពេញ ដោយសារនៅទីនេះ ក៏មានផ្នែកមួយ ដែលផ្តោតលើបញ្ហាជីវចម្រុះផងដែរ សម្រាប់សាកលវិទ្យាល័យភូមិន្ទភ្នំពេញ។ ក្រៅពីនេះ យើងក៏មាន Booth ចំនួន ២០ សម្រាប់ធ្វើការសម្តែងសិល្បៈ ដែលមានឈុតឆាកបរិយាយស្តីពីក្រុមសត្វស្លាប នាវេលាពេលព្រឹក និងពេលថ្ងៃយើងមានកម្មសិក្ខាសាលាស្តីពីការអភិរក្ស និងយល់ដឹងពីសត្វស្លាប»។
ក្រុមអ្នកចូលរួមពិព័រណ៍សត្វត្មាតកន្លងមក និងក្រុមឧទ្យានុរក្សនៃក្រសួងបរិស្ថានពេលបំពេញការងាររបស់ខ្លួន។ រូបថត សហការី
បើយោងតាមអនុក្រឹត្យលេខ ០៤ អនក្រ.បក ចុះថ្ងៃទី ៥ មករា ឆ្នាំ ២០១៧ បានបែងចែកតំបន់គ្រប់គ្រងក្នុងដែនជម្រកសត្វព្រៃលំផាត់ជា ៤ តំបន់ គឺតំបន់ស្នូល តំបន់អភិរក្ស តំបន់ប្រើប្រាស់ដោយចីរភាព និងតំបន់សហគមន៍។ តំបន់ស្នូល និងតំបន់អភិរក្ស គឺជាតំបន់ដែលមានសារៈសំខាន់ជាអន្តរជាតិផ្នែកជីវចម្រុះពោល គឺទីតាំងដែលគាំទ្រការរស់រានមានជីវិតសត្វព្រៃជិតផុតពូជបំផុតនៅក្នុងពិភពលោកច្រើនប្រភេទ រួមទាំងសត្វត្រយងយក្ស ដែលជានិមិត្តសញ្ញាបក្សីជាតិកម្ពុជា។ ហើយយោងតាមច្បាប់ស្តីពីតំបន់ការពារធម្មជាតិតំបន់ស្នូល និងតំបន់អភិរក្ស ជាតំបន់ដែលត្រូវការពារហ្មត់ចត់បំផុត និងមិនអនុញ្ញាតឲ្យមានការអភិវឌ្ឍឡើយ។
នាយកកម្មវិធីនៃអង្គការរូបនេះ ក៏បានបន្ថែមទៀតថា៖ «ក្នុងមហោស្រពសត្វស្លាប និងធម្មជាតិ២០១៩ នេះដែរ គឺជាឱកាសពិសេស ដែលលោកលោកស្រី ជាពិសេសប្អូនៗ សិស្ស និស្សិត អាចសិក្សា និងបានជួបក្រុមអ្នកជំនាញ ដែលពួកគាត់នឹងពិភាក្សាអំពីការងារស្រាវជ្រាវ និងអភិរក្សសត្វស្លាប បញ្ហាជីវចម្រុះ និងធនធានធម្មជាតិ នៃអង្គភាពទាំងនេះ នៅតាមស្តង់ពិព័រណ៍របស់ពួកគាត់ ដែលដាក់នៅតាម Booth»៕
