.jpg)
សន្និសីទសារព័ត៌មានស្តីពីការប្រកាសកម្មវិធីមហោស្រពសិល្បៈដើម្បីសន្តិភាព។ រូបថត អង្គការសិល្បៈខ្មែរអមតៈ
ភ្នំពេញ៖ កម្មវិធីមហោស្រពប្រចាំឆ្នាំដ៏ធំមួយ ជាមោទនភាពនៅលើវិស័យសិល្បៈ និងវប្បធម៌ មានឈ្មោះថា «សិល្បៈដើម្បីសន្តិភាព» នឹងប្រារព្ធធ្វើចាប់ពីថ្ងៃទី ១៤ ដល់ទី ២៤ ខែ វិចិ្ឆកា ឆ្នាំ ២០១៩ ដែលរៀបចំដោយអង្គការសិល្បៈខ្មែរអមតៈ និងរំឭកខួបចំនួន ៤០ ឆ្នាំ ដែលកម្ពុជាឆ្លងផុតពីរបបខ្មែរក្រហម និងខួប ២០ ឆ្នាំ របស់អង្គការសិល្បៈខ្មែរអមតៈបានចាប់ផ្តើមបេសកកម្មធ្វើឲ្យរស់ឡើងវិញនៃសិល្បៈវប្បធម៌នៅកម្ពុជា។
បើតាមលោក គាត សុគីម ជាបុគ្គលិកផ្នែកទំនាក់ទំនងព័ត៌មាននៃអង្គការសិល្បៈខ្មែរអមតៈបានឲ្យដឹងពីគោលបំណង និងកម្មវិធីនានានៃការប្រារព្ធមហោស្រពសិល្បៈនេះថា៖ «មហោស្រពសិល្បៈដើម្បីសន្តិភាព» គឺជាមហោស្រពសិល្បៈធំដំបូងគេ មានរយៈពេល ១០ ថ្ងៃ ធ្វើនៅរាជធានីភ្នំពេញ ក្នុងគោលបំណងអបអរសាទរ និងផ្សព្វផ្សាយអំពីគុណតម្លៃនៃសិល្បៈ និងវប្បធម៌ក្នុងការរួមចំណែកអភិវឌ្ឍសង្គមកម្ពុជាក្រោយពីការដួលរលំរបបខ្មែរក្រហមចំនួន ៤០ ឆ្នាំ និងដើម្បីអបអរសាទរខួបទី ២០ ឆ្នាំ របស់អង្គការសិល្បៈខ្មែរអមតៈ (CLA) ទៀតផង។
ពិតណាស់ សមិទ្ធផលសិល្បៈ ដែលកម្ពុជាមាននៅក្នុងថ្ងៃនេះ គឺមិនអាចកើតឡើងបាននោះទេ ប្រសិនបើគ្មានក្តីស្រលាញ់ ដែលផុសចេញពីបេះដូង ការលះបង់ដ៏ធំធេង ក្នុងការថែរក្សា អភិរក្ស និងការអភិវឌ្ឍរបស់ព្រឹទ្ធាចារ្យសិល្បៈ និងសិល្បករកម្ពុជា។ ដូចនេះ មហោស្រពនេះជាការសម្ដែងការដឹងគុណដល់ការខិតខំប្រឹងប្រែងរបស់សិល្បករ ព្រឹទ្ធាចារ្យសិល្បៈ លោកគ្រូ-អ្នកគ្រូ និងសិស្សានុសិស្ស នៅក្នុងការស្ដារឡើងវិញនូវទម្រង់សិល្បៈដែលរងគ្រោះទាំងឡាយ និងបន្តឲ្យបានរស់រានឡើងវិញ មានរយៈពេលជាយូរឆ្នាំមកហើយនេះ»។
លោក គាត សុគីម បន្តថា៖ «កម្មវិធីរយៈពេល ១០ ថ្ងៃ នេះ រួមមានការប្រគំតន្ត្រី ទស្សនីយភាពល្ខោន របាំ សិក្ខាសាលាសិល្បៈ ពិព័រណ៍ កិច្ចពិភាក្សា និងកម្មវិធីផ្សេងៗទៀត ប្រារព្ធធ្វើឡើងនៅទីតាំងនានា រួមមាន វិទ្យាស្ថានភាសាបរទេស (IFL) នៅមជ្ឈមណ្ឌលកិច្ចសហប្រតិបត្តិការកម្ពុជា-ជប៉ុន (CJCC) នៅសាលសន្និសីទចតុមុខ និងវិទ្យាស្ថានបារាំង។
ដោយឡែកសម្រាប់កម្មវិធីសម្ដែងនានាមួយចំនួននៃមហោស្រពសិល្បៈ ដើម្បីសន្តិភាពនេះ ក៏តម្រូវឲ្យមានការទិញសំបុត្រដើម្បីចូលទស្សនាផងដែរ។ ចំពោះថវិកា ដែលប្រមូលពីការលក់សំបុត្រនេះ គឺសម្រាប់ប្រើប្រាស់នៅក្នុងគម្រោងនានា ដែលជួយជំរុញដល់វិស័យសិល្បៈ និងវប្បធម៌នៅកម្ពុជា ដែលក្នុងនោះរួមមានបៀវត្សរ៍ព្រឹទ្ធាចារ្យសិល្បៈ កម្មវិធីអាហារូបករណ៍ កម្មវិធីបណ្ដុះបណ្ដាលអភិវឌ្ឍន៍អាជីព និងគម្រោងសិល្បៈនានា ដែលជួយទៅដល់សិល្បករជំនាន់ថ្មី ក៏ដូចជាការពង្រឹងនិរន្តរភាពទៅលើវិស័យសិល្បៈ និងវប្បធម៌នៅប្រទេស កម្ពុជា ផងដែរ»។
គួរកត់សម្គាល់ដែរថា ចាប់ពីថ្ងៃទី ១៤-២៤ ខែវិច្ឆិកា ឆ្នាំ ២០១៩ ក៏មានរៀបចំកម្មវិធីពិព័រណ៍ស្នាដៃរបស់សិល្បកររូបថត និងវីរជនជាសិល្បករលាក់មុខ ដែលត្រូវបានគេអញ្ជើញមកពីចំនួន ២៥ ខេត្ត-ក្រុង-រាជធានី ផងដែរ ដោយគោលបំណងនៃការរៀបចំនេះ គឺចង់បង្ហាញពីភាពខ្លាំងនៃការបញ្ចេញគំនិតនៅកម្ពុជាតាមរយៈរូបភាព និងសមត្ថភាពនៃចំណេះដឹងផ្នែកសិល្បៈនានារបស់វីរជន នានានៅតាមខេត្តដោយសារពួកគាត់មិនត្រូវបានមហាជនស្គាល់ ឬខ្វះការគាំទ្រ៕
