.jpg)
វិចិត្រករវ័យក្មេងកំពុងផ្ចង់ស្មារតីគូរគំនូរតាមជញ្ជាំងត្រៀមថ្ងៃប្រារព្ធធ្វើមហោស្រពសិល្បៈភូមិនៅត្បូងឃ្មុំ។ សហការី
ខេត្តត្បូងឃ្មុំៈ ដោយមានសំណូមពរពីអ្នកភូមិ និងជាគោលបំណងចង់លើកកម្ពស់វិស័យសិល្បៈឲ្យកាន់តែរីកចម្រើននោះ ក្រុមនិស្សិតអាហារូបករណ៍ទស្សនវប្បធម៌ក៏បានរួមគ្នាបង្កើតជាសិក្ខាសាលា និងមហោស្រពសិល្បៈភូមិដំបូងដែលប្រារព្ធធ្វើនៅបរិវេណវត្តថ្មពេជ្រនៅស្រុកត្បូងឃ្មុំ ខេត្តត្បូងឃ្មុំនាថ្ងៃទី ២៤ ខែកុម្ភៈ ឆ្នាំ ២០១៩ នេះដែលបានរៀបចំដោយអង្គការសិល្បៈខ្មែរអមតៈ (CLA)។
លោក ណាង យ៉ាន់ណា អ្នកសម្របសម្រួលនៃកម្មវិធីអង្គការសិល្បៈខ្មែរអមតៈ បានឲ្យដឹងត្រួសៗពីកម្មវិធីនេះថា៖ «ក្រោយពីក្រុមនិស្សិតអាហារូបករណ៍ទស្សនវប្បធម៌ទទួលបានកញ្ចប់ថវិកាសម្រាប់ការងារសិល្បៈមក និងស្របពេលបងប្អូនអ្នកភូមិមានសំណូមពរចង់ឃើញមានការរៀបចំព្រឹត្តិការណ៍សិល្បៈនៅតំបន់ខ្លួននោះ យើងក៏សម្រេចធ្វើកម្មវិធីមហោស្រពសិល្បៈភូមិនេះ គឺជាលើកដំបូងសម្រាប់គម្រោងរបស់យើងដែលមានទីតាំងស្ថិតនៅវត្តថ្មពេជ្រ ឃុំថ្មពេជ្រ ស្រុក និងខេត្តត្បូងឃ្មុំមានចម្ងាយ ១៥ គីឡូម៉ែត្រពីក្រុងសួង ឬចម្ងាយ ២២ គីឡូម៉ែត្រពីស្ពានទន្លេបិទ។ កម្មវិធីនៅថ្ងៃទី ២៤ ខែកុម្ភៈ ឆ្នាំ ២០១៩ នោះមានកម្មវិធីជាច្រើនដូចជា សិក្ខាសាលាផ្តល់ចំណេះដឹងពីសិល្បៈ ការអាន និងសរសេររឿងនិទាន ការសិក្សាពីចម្លាក់ស្បែក និងល្ខោនស្រមោលស្បែកតូច ការសិក្សាពីតន្ត្រីថូន និងឧបករណ៍បុរាណចាប៉ីដងវែង និង ការគូរគំនូរនានាជាដើម»។
ក្រុមយុវតីហាត់សមរបាំសម្តែងក្នុងមហោស្រពសិល្បៈភូមិចុងសប្តាហ៍នេះ។ រូប សហការី
លោក ណាង យ៉ាន់ណា បន្តឲ្យដឹងទៀតថា៖ «សម្រាប់កម្មវិធីមហោស្រពសិល្បៈភូមិនេះមានការចូលរួមពីសំណាក់ក្រុមសិល្បករ-សិល្បការិនី អាជីព និងមហាជនសរុបប្រមាណ ៥០ នាក់ដោយពួកគាត់នឹងរួមគ្នាបង្កើតនូវបរិយាកាសដ៏មានតម្លៃនៅក្នុងការលើកស្ទួយតម្លៃវប្បធម៌ខ្មែរយើងដល់មហាជនបានចូលទស្សនា និងស្វែងយល់ពីសិល្បៈគ្រប់ទម្រង់ដោយសេរី។ ដោយឡែកប្រសិនបើកម្មវិធីដំបូងនេះនឹងទទួលបានលទ្ធផលល្អនោះសម្រាប់ឆ្នាំក្រោយៗទៅទៀត យើងក៏អាចនឹងមានគម្រោងរៀបចំឲ្យមានជាលក្ខណៈប្រចាំឆ្នាំផងដែរ»។
កម្មវិធីមហោស្រពនេះក៏ទទួលបានការគាំទ្រពីមន្ទីរវប្បធម៌ និងវិចិត្រសិល្បៈនៅខេត្តត្បូងឃ្មុំ ខណៈឧបត្ថម្ភដោយអង្គការសិល្បៈខ្មែរអមតៈ ហើយមានការចូលរួមសហការពីសមាគមសុវណ្ណភូមិ សហគ្រាសសង្គមហ្វារ និងក្រុមរថយន្តតន្ត្រីទិព្វខ្មែរ៕
