The Phnom Penh Post Search

Search form




Logo of Phnom Penh Post newspaper Phnom Penh Post - មហោ​ស្រព​សិល្បៈ​សៀក​អន្តរជាតិ​លើក​ទី ១០ ប្រារព្ធ​ចុង​ខែ​នេះ




មហោ​ស្រព​សិល្បៈ​សៀក​អន្តរជាតិ​លើក​ទី ១០ ប្រារព្ធ​ចុង​ខែ​នេះ

Content image - Phnom Penh Post
ក្រុម​សិល្បករ-ការិនី សម្តែង​សៀក​ក្នុង​កម្ម​វិធី​មហោស្រព​សិល្បៈ​សៀក​អន្ដរជាតិ​កាលពី​ឆ្នាំទៅ​។ រូប សហការី

មហោ​ស្រព​សិល្បៈ​សៀក​អន្តរជាតិ​លើក​ទី ១០ ប្រារព្ធ​ចុង​ខែ​នេះ

ភ្នំពេញៈ ព្រឹត្តិ​ការណ៍ខួប​លើក​ទី ១០ នៃ​កម្មវិធី​មហោស្រព​សិល្បៈ​សៀក​អន្តរជាតិ​នៅឆ្នាំ ២០១៦ នឹងចាប់​ផ្តើម​សម្តែង​នៅ​ថ្ងៃទី ២៨ ខែ​មេសា​ខាងមុខ​នេះ​ហើយ មាន​ក្រុម​សិល្បករ​សិល្បការិនី​សម្តែង​សៀក​ចំនួន​សរុប​ ៤០ រូប ​ដែលមក​ពីប្រាំ​មួយប្រទេស​ និង​ការ​សម្តែង​ធ្វើ​នៅបី​កន្លែង​ធំៗ​ក្នុង​ប្រទេស​កម្ពុជា។

លោក ទូច វ៉ាន់ឌី ជា​បុគ្គលិក​ផ្នែក​សេវាកម្ម​ភ្ញៀវរបស់​កម្មវិធី​មហោ​ស្រពសិល្បៈ​សៀក​អន្តរជាតិ​ឆ្នាំ ២០១៦ ប្រចាំការ​នៅក្នុង​ខេត្តបាត់ដំបង​ បានបង្ហើប​ឲ្យ​ដឹងថា៖ «ឆ្នាំ​នេះ​យើង​មាន​ក្រុម​សិល្បករការិនី​ ដែលជា​អ្នក​សម្តែង​សៀក​មាន​ចំនួន ៤០ រូប និង​មានចំនួន​ប្រាំមួយ​ប្រទេស​នឹងមក​សម្តែង​សិល្បៈ​សៀកជា​លក្ខណៈ​អន្តរជាតិ​។ ប្រទេស​ទាំង​នោះមាន​ កម្ពុជា បារាំង កាណាដា​ អូស្ត្រាលី នេប៉ាល់ និង​ឥណ្ឌូនេស៊ី។ យើងមាន​ការ​សម្តែង​ចំនួនបី​កន្លែង​ធំៗ ហើយ​សម្រាប់​ថ្ងៃទី ២៨​-៣០​ ខែ​មេសា និងថ្ងៃ​ទី ១ ខែ​ឧសភា​ឆ្នាំ ២០១៦ ខាងមុខ​នេះ នឹងត្រូវ​សម្តែង​នៅឯ​មជ្ឈមណ្ឌល​មហោ​ស្រព​វប្បធម៌​ចេនឡា​ក្នុងរាជ​ធានី​ភ្នំពេញ​។ ចំណែក​ឯ​ថ្ងៃទី ៣-៦​ ខែ​ឧសភា​ឆ្នាំ ២០១៦ សម្តែងនៅ​សាលា​ហ្វារ​ពន្លឺ​សិល្បៈ​ខេត្ត​បាត់ដំបង និង​នៅ​ថ្ងៃ​ទី ៨-១០​ ខែឧសភា សម្តែង​នៅ​ឯខេត្ត​សៀមរាប»។

Content image - Phnom Penh Post
សកម្ម​ភាព​សម្តែង​របស់​ក្រុម​សៀក​សាលា​ហ្វារ​ពន្លឺសិល្បៈ។ រូប សហការី

មហោ​ស្រពសម្តែង​សិល្បៈ​សៀក​អន្តរជាតិ​នេះ ត្រូវ​រៀបចំ​ឡើងនៅ​ក្នុង​គោល​បំណង​ចង់​បង្ហាញ​អំពី​ទម្រង់​សិល្បៈសៀក សហ​សម័យ ជា​ច្រើនប្រភេទ​ ដែលមាន​លក្ខណៈ​ជា​សកលលោក​ និងមាន​ម្ចាស់​ឧបត្ថម្ភដូច​ជា​ក្រុមហ៊ុន​អាកាស​ចរណ៍ Cambodia Airports​ ក្រុមហ៊ុន​ Smart Axiata ក្រុមហ៊ុន Total Cambodge សណ្ឋាគារ Shinta Mani សណ្ឋាគារ​សូហ្វី​តែល​ភោគី​ត្រា អាំងទែ​រកុង​ទីណង់តាល់ សណ្ឋាគារ​អង្គរភូមិ ក្រុមហ៊ុន Krispy Kreme Cambodia ហាងកាហ្វេ Costa Coffee Cambodia ធនាគារ ​Canadia Bank និង​អ្នក​គាំទ្រ​ជាច្រើន​រួមមាន​ក្រសួង​វប្បធម៌ និង​វិចិត្រសិល្បៈ ខាង​ស្ថាន​ទូត​អូស្រ្តាលី​ប្រចាំ​កម្ពុជា​ វិទ្យាស្ថាន​បារាំង​ អង្គការ​សហភាព​អឺរ៉ុប និង​អង្គការ​យូណេស្កូ​ ដែល​ប្រចាំ​នៅ​កម្ពុជា។

លោក ទូច វ៉ាន់ឌី បន្តឲ្យ​ដឹងនូវ​ក្រុម​សម្តែង​សៀក​មួយ​ចំនួន​ដែរ​ថា៖ «សម្រាប់​កម្ពុជា​យើង​មាន​ក្រុម​សៀក​របស់​សាលា​ហ្វារ​ពន្លឺ​សិល្បៈ (Phare Ponleu Selpak) ក្រុម​សៀក​ឈ្មោះ​ Phare The Cambodian Circus និងក្រុម​សៀក​សាលាជាតិ​នៃ​ព្រះ​រាជា​ណាចក្រ​កម្ពុជា (NCSOC Circus Troupe)។ ចំណែក​ឯ​ប្រទេស​អូស្រ្តាលី​មាន​ក្រុមសៀក​ឈ្មោះ​ Flying Fruit Fly Circus ប្រទេស​បារាំង​ឈ្មោះ Collectif Open Ticket និង​ប្រទេស​កាណាដា​ឈ្មោះ​ Cause &Effect Circus ជាដើម​»។

ចំពោះ​សំបុត្រ​សម្រាប់​ការចូលរួម​ទស្សនា​នូវការ​សម្តែង​សិល្បៈ​សៀក​អន្តរជាតិ​លើកទី ១០ នៅឆ្នាំ ២០១៦ នេះ​ មានបី​ប្រភេទទៅ​តាម​កៅអី​អង្គុយ​ទស្សនា​គឺប្រភេទ A​B​ និង​C។ ហើយ​លោក​អ្នក​អាចនឹង​រក​ជាវ​សំបុត្រ​បានទី ១ នៅ​មជ្ឈ​មណ្ឌល​មហោស្រព​វប្បធម៌​ចេនឡា​សម្រាប់​នៅ​រាជធានី​ភ្នំពេញ​ ទី ២ នៅ​សាលា​ហ្វារពន្លឺ​សិល្បៈ​សម្រាប់​ខេត្ត​បាត់ដំបង និងទី ៣ នៅឯ ​Phare The Cambodian Circus សម្រាប់​ខេត្ត​សៀមរាប ខណៈ​តម្លៃ​គឺលោក​អ្នក​គ្រាន់​តែចូល​គេហទំព័រ​ http://tinitinou.com/purchase-tickets/

អត្ថបទគួរចាប់អារម្មណ៍