The Phnom Penh Post Search

Search form




Logo of Phnom Penh Post newspaper Phnom Penh Post - មហោស្រព​តន្ដ្រី​ខ្មែរ​ បង្ហាញពី​ទេពកោសល្យ​កូន​ខ្មែរ​លើ​លោក

មហោស្រព​តន្ដ្រី​ខ្មែរ​ បង្ហាញពី​ទេពកោសល្យ​កូន​ខ្មែរ​លើ​លោក

មហោស្រព​តន្ដ្រី​ខ្មែរ​ដែល​ត្រូវ​បាន​ប្រារឰ​ឡើង​កាលពី​ឆ្នាំ​មុន​បង្ហាញពី​សម្លៀកបំពាក់​ប្រពៃណី​ខ្មែរ​។
មហោស្រព​តន្ដ្រី​ខ្មែរ​ដែល​ត្រូវ​បាន​ប្រារឰ​ឡើង​កាលពី​ឆ្នាំ​មុន​បង្ហាញពី​សម្លៀកបំពាក់​ប្រពៃណី​ខ្មែរ​។ រូបថត Supplied/Ohn sax

មហោស្រព​តន្ដ្រី​ខ្មែរ​ បង្ហាញពី​ទេពកោសល្យ​កូន​ខ្មែរ​លើ​លោក

ភ្នំពេញ: ក្រុម​សិល្បករ-ការិនី​ខ្មែរ​រស់នៅ​នាយ​សមុទ្រ​បាន​នាំ​គ្នា​ប្រារឰ​មហោស្រព​​តន្ដ្រី​កម្ពុជា​ Cambodian Music Festival (CMF) ក្នុង​តំបន់ អូរ៉េន ខោនធី ភាគ​ខាង​ត្បូង​នៃ​រដ្ឋ​កាលីហ្វ័រនីញ៉ា​សហរដ្ឋអាមេរិក​ដើម្បី​ផ្សព្វផ្សាយ​ពី​ទម្រង់​សិល្បៈ​តន្រ្តី​សម័យ​របស់​ខ្មែរ​ឲ្យ​ពិភពលោក​បាន​ស្គាល់។

មនុស្ស​រាប់​ពាន់​នាក់​បាន​ចូលរួម​ជា​លើក​ទី​ ២ សម្រាប់​មហោស្រព​តន្ដ្រី​កម្ពុជា​ប្រចាំ​ឆ្នាំ​ជា​ការ​សម្ដែង​ពេញ​មួយ​ថ្ងៃ​​ក្នុង​គោលបំណង​បង្ហាញ​ពិភពលោក​​ទាំង​មូល​ឲ្យ​បាន​យល់ដឹង និង​ស្គាល់​នូវ​រប្បធម៌​សិល្បៈ​របស់​ខ្មែរ។

សហស្ថាបនិក​មហោស្រព​អ្នកស្រី សៀក ស្មីត ដែល​មាន​កំណើត​នៅឯ​ជំរំ​ភៀស​ខ្លួន​ថៃ និង​ធំធាត់​ពេញ​វ័យ​ក្នុង​ទីក្រុង​ឡូសអេសជឺលេស​ឲ្យ​ដឹង​ថា៖ «យើង​ពិតជា​ចង់​ឲ្យ​អ្នក​ទាំងអស់​ចងចាំ​នូវ​​មហោស្រព​មួយ​នេះ​ណាស់​ព្រោះ​វា​ជា​ឱកាស​ជួបជុំ​គ្នា​មួយ​របស់​ក្រុម​​សិល្បៈ​ខ្មែរ​រស់នៅ​ឯ​នាយសមុទ្រ​ក្នុង​មួយ​​ឆ្នាំ​ម្តង»។

ក្រុម​សិល្បៈ​មាន​​ទេពកោសល្យ​ចាប់ពី​ចង្វាក់​រ៉េប​រហូត​ដល់​ជំនាញ​លេង​ស្គរ​ និង​​ហ្គីតាបាស​បាន​ខំ​ស្កាត់​មក​ចូលរួម​មហោស្រព​ក្រុង​ឡូសអេនជឺលេស​តាំងពី​ប្រទេស​ក្រិក​។

ក្រុមតន្ដ្រី ឥន្រ្ទទេវី​ សម្ដែង​ចម្រៀង​ខ្មែរ​អម​ដោយ​តន្ដ្រី​សម័យ​។
ក្រុមតន្ដ្រី ឥន្រ្ទទេវី​ សម្ដែង​ចម្រៀង​ខ្មែរ​អម​ដោយ​តន្ដ្រី​សម័យ​។ Supplied/John sax

អ្នក​ចូលរួម​កាលពី​ឆ្នាំ​មុន​និយាយ​ថា​នេះ​ជា​មហោស្រព​ថ្មី​មួយ​បាន​បង្កើត​ឲ្យ​​មាន​ការ​រីក​សាយភាយ​ផ្នែក​វប្បធម៌​ខ្មែរ​នៅលើ​ឆាក​អន្តរជាតិ​។

ដោយឡែក​ក្រុម​តន្រ្តី​ឈ្មោះ​ឥន្រ្ទទេវី (Indradevi) មាន​សមាជិក​បី​នាក់​ដែល​ពាក់​ម៉ាស​មុខ​ចម្លែកៗ និយាយ​ថា​បើ​គ្មាន​ការ​រៀបចំ​លើក​ទី ១ កាល​ឆ្នាំ ២០១៤ ប្រកប​ដោយ​ជោគជ័យ​ទេ​យើង​ក៏​គ្មាន​វត្តមាន​នៅ​ឆ្នាំ​នេះ​ដែរ។

ក្រៅពី​វត្តមាន​នៃ​ក្រុម​សិល្ប​ខ្មែរ​គេ​ក៏​ឃើញ​មាន​ក្រុម​សិល្ប​បរទេស​ចូលរួម​ក្នុង​មហោស្រព​ដែរ​ដូចជា សិល្បករ​កូនកាត់​អាហ្វ្រិក-អាមេរិក លោក មៃឃែល ចាម៉ល់ ចេហ្វើរសុន និង​អង់គ្លេស​លោក ហ្គ្រេនត៍ ម៉ាស៊ី។

អ្នកស្រី ស្មីត បង្ហើប​ឲ្យ​ដឹង​ពី​គម្រោង​ការ​រៀបចំ​មហោស្រព​ឆ្នាំ​ក្រោយ​ថា៖ «យើង​ចង់​បង្ហាញ​ទស្សនិកជន​កម្ពុជា​ថា​ទោះបី​ជា​ប្រជាជន​កម្ពុជា​នៅ​រស់​ដល់​ទីណា​ក៏ដោយ ក៏​យើង​​មើល​ឃើញ​ពី​ទេពកោសល្យ​របស់​កូន​ខ្មែរ​មកពី​បារាំង មកពី​ទីក្រុង​ម៉ុងត្រេអាល់​នៅ​កាណាដា និង​អូស្រ្តាលី​»។

ស្ថាបនិក​ស្រី​រូប​នេះ​បន្ត​ថា៖ «ប្រជាជន​ខ្មែរ​​មាន​ប្រវត្តិ​សិល្បៈ​ និង​តន្រ្តី​ដ៏ល្អ​ផូរផង់​យូរលង់​ណាស់​។ ពេល​នេះ​វា​ដល់​ពេល​​យើង​ជា​ក្រុម​សិល្បៈ​ជំនាន់​ក្រោយ​​ជួយ​ផ្សព្វផ្សាយ​ទម្រង់​សិល្បៈ​ខ្មែរ​ឲ្យ​ពិភពលោក​ស្គាល់​ហើយ»។

មហោស្រព​តន្ដ្រី​កម្ពុជា​បាន​ប្រារឰ​ធ្វើ​កាលពី​ថ្ងៃ​សៅរ៍​ទី​ ២៥ ខែ​កក្កដា ​​កន្លង​ទៅ​នៅ​មហោស្រព​ អេមភី​នៃ​តំបន់​​អាណាហែម។ សំបុត្រ​ទស្សនា​តម្លៃ​ ៧៥ ​ដុល្លារ​ដោយ​មាន​អាហារ​ខ្មែរ​សម្រាប់​ទទួលទាន​៕ PR

អត្ថបទគួរចាប់អារម្មណ៍