ភ្នំពេញ៖ ខណៈជិតដល់ថ្ងៃប្រារព្ធទិវារត់ប្រណាំងមួយឈ្មោះថា «Women Run 10K» ដែលគ្រោងរៀបចំនៅថ្ងៃទី ៨ ខែ មីនា ឆ្នាំ ២០២០ ខាងមុខនេះ ស្រាប់តែតារាសម្តែង និងម៉ូដែល រាងខ្ពស់ស្រឡះ ធ្មេញច្រពើស កញ្ញា មាន សូនីតា មានសំណូមពរឲ្យមហាជន ជាពិសេសស្រ្តីខ្មែរឲ្យចូលរួមគាំទ្រ ឲ្យបានផុសផុល និងចង់ប្រែក្លាយជាទិវាមួយ ដើម្បីពង្រឹងស្មារតីស្រ្តីខ្មែរឲ្យរឹងមាំក្នុងសង្គម។
កញ្ញា មាន សូនីតា ជាតារាសម្តែងស្រី ដែលទទួលបានងារពីមហាជន «រាជិនីក្រមា» ដែលកំពុងតែឡើងកូដសាជាថ្មី ក្រោយពីស្ងប់ទីផ្សារមួយរយៈខ្លី ជាមួយនឹងការទទួលបានតំណែងជាទូតសុឆន្ទៈតំណាងឲ្យផលិតផលសាំសុងដើមឆ្នាំ ២០២០ នេះ និងរថយន្តរបស់ក្រុមហ៊ុនតូយ៉ូតា នៅចុងឆ្នាំ ២០១៩ និងក្លាយជាថៅកែស្រីទាំងវ័យក្មេងជាមួយនឹងរបរអាជីវកម្មហាងលក់ផលិតផលពីក្រមា។
ហេតុផលយ៉ាងណាបានជាតារាស្រីរូបនេះខំបំផុសស្រ្តីខ្មែរឲ្យចូលរួមច្រើនកុះករ និងមានតួនាទីសំខាន់អ្វីដែរនៅក្នុងកម្មវិធីរត់ប្រណាំង «Women Run 10K» នោះ មិនត្រូវបានកញ្ញា មាន សូនីតា ផ្តល់ការលម្អិតនោះឡើយដល់ភ្នំពេញប៉ុស្តិ៍ ខណៈប្រព័ន្ធទូរស័ព្ទធ្លាប់ទំនាក់ទំនងពីមុនមក មិនអាចទាក់ទងបាននាពេលនេះ។
តែតារាម៉ូដែល និងជាតារាសម្តែងស្រីរូបស្រស់ទឹកមុខក្រមិចក្រមើមគួរឲ្យស្រឡាញ់ កញ្ញា មាន សូនីតា ដែរ ដោយសារថ្មីៗនេះនាងបានធ្វើការឡាយវីដេអូ ដើម្បីបង្ហាញពីដំណឹងមួយដល់ស្ត្រីៗចូលរួមក្នុងកម្មវិធីរត់ប្រណាំងស្ត្រីចម្ងាយ ១០ គីឡូម៉ែត្រ ដែលនឹងធ្វើឡើងចំថ្ងៃទី ៨ មីនា ឆ្នាំ ២០២០ ខាងមុខនេះ នៅសួនច្បារវត្តបទុមវតី។
តារាស្រីកញ្ញា មាន សូនីតា ក៏បង្ហាញពីគោលបំណងខ្លួនតាមរយៈការឡាយវីដេអូហ្វេសប៊ុកថា៖ «នាងខ្ញុំចង់ឲ្យមិត្តនារីទាំងឡាយក្នុងន័យលើកទឹកចិត្តឲ្យមានភាពក្លាហានក្នុងសង្គម ជឿជាក់នឹងអ្វីដែលខ្លួនធ្វើ ជាពិសេសមានភាពស្មើគ្នាជាមួយនឹងបុរសក្នុងកិច្ចការងារនានា។ ត្រូវចេះពង្រឹងសមត្ថភាព ដើម្បីឲ្យជឿជាក់ថា នារីខ្លួនឯងត្រូវធ្វើឲ្យបាន។ នេះជាការលើកទឹកចិត្តដល់ស្ត្រីគ្រប់រូបឲ្យមានភាពក្លាហាន ដើម្បីគាំទ្រស្រ្តីបំបែកឯតទគ្គកម្ម និងអបអរសាទរទិវាសិទ្ធិនារីអន្ដរជាតិ ៨ មីនា ទាំងអស់គ្នា។ ជាក់ស្តែង Women Run 10K បើនារីខ្លួនឯងគិតថា ធ្វើមិនបាន គិតថាការរត់បែបនេះ មានតែមនុស្សប្រុស គឺខ្លួននៅតែជាស្រ្តីមិនអាចធ្វើបាន។ ផ្ទុយទៅវិញ ប្រសិនបើនារី មានការជម្នះនោះ យើងពិតជាអាចធ្វើបាន និងរឹងមាំជាមិនខាននោះទេ»៕