.jpg)
តារាចម្រៀងស្រីនៅថោន មាស សុខសោភា ផ្ញើសារលើកទឹកចិត្តតារាសម្តែងស្រីថៃដែលឆ្លងកីវីដ១៩។ រូបថត អុីនស្តាក្រាម
ភ្នំពេញ៖ ក្រៅពីមានទឹកចិត្តល្អ ចេញទៅជួយលើកទឹកចិត្តសហគមន៍ពលរដ្ឋខ្មែរ ដែលមានសមាជិកគ្រួសារឆ្លងជំងឺកូរ៉ូណា ឬកូវីដ ១៩ កន្លងមកថ្មីៗនោះ តារាចម្រៀងស្រីល្បី និងឈរជើងទ្រនំថោនបានយូរកញ្ញា មាស សុខសោភា មានទឹកចិត្តប្រពៃ មិនបានគិតប្រកាន់ជាតិសាសន៍ដទៃ ក៏បានផ្ញើសារលើកទឹកចិត្តតារាសម្តែងស្រីថៃឈ្មោះ លីឌីយ៉ា ដែលឆ្លងកូវីដ ១៩ ពីស្វាមី ក្រោយពីធ្វើតេស្តរកមេរោគនោះមក។
តាមរយៈសារតារាសម្តែងស្រីថៃឈ្មោះ លីឌីយ៉ា (Lydia) ដែលបង្ហើរតាមបណ្តាញសង្គមអ៊ីនស្តាក្រាម នាពេលថ្មីៗនោះ ដែលប្រែសម្រួលជាខ្មែរថា៖ «កូវីដ! យើងត្រូវតែរស់! ការព្យាយាមពង្រឹងខ្លួនយើង ពេលខ្លះវាពិបាក។ ពេលស្រែកចេញវាមានអារម្មណ៍ល្អប្រសើរជាងមុន។ គ្រាន់តែយល់ថា ការយំជួយឲ្យខ្ញុំមានអារម្មណ៍ធូរស្បើយ។ ការយំវាពិតជាធ្វើឲ្យខ្ញុំស្ងប់ចិត្ត»។
នេះ គឺជាសារចុងក្រោយដែលនាង Lydia បានបង្ហោះក្រោយពីនាងបានធ្វើតេស្តឃើញឆ្លងវីរុសកូវីដ ១៩ ពីស្វាមីរបស់នាង Matthew ហើយពួកគេត្រូវបែកពីកូនៗ និងក៏ត្រូវបានដាក់ឲ្យនៅដាច់ដោយឡែកពីគ្នានៅក្នុងមន្ទីរពេទ្យនោះ។
បន្ទាប់ពីបានឃើញនូវសារនោះ និងដឹងពីអារម្មណ៍ទុក្ខលំបាករបស់នាង Lydia តាមរយៈសារនេះក៏ធ្វើឲ្យអ្នកគាំទ្រ និងមិត្តសិល្បៈជាច្រើន នាំគ្នាចូល Comment លើកទឹកចិត្តដល់តារាស្រីខាងលើ ក្នុងនោះគេក៏ឃើញមានតារាចម្រៀងស្រីខ្មែរចំនួន ២ រូបដែរ គឺតារាចម្រៀងស្រីល្បីឈ្មោះនៅថោនកញ្ញា មាស សុខសោភា និងអតីតចម្រៀង ស្រីនៅផលិតកម្មភ្លេងរីខតកញ្ញា សុខ ចិន្តា ហៅ វ៉ាន់ នីឡា។
យ៉ាងណាតារាចម្រៀងស្រីថោន កញ្ញា មាស សុខសោភា និងតារាសស្រីថៃនាង លីឌីយ៉ា មានទំនាក់ទំនងគ្នាកម្រិត ឬហេតុផលអ្វីបានតារាខ្មែរ ២ រូប បានផ្ញើសារលើកទឹកចិត្តដល់តារាថៃនោះ ក៏មិនត្រូវបានបកស្រាយលម្អិតនោះឡើយ ដោយសារតែប្រព័ន្ធទូរស័ព្ទ មាស សុខសោភា បានតេចូលតែគ្មានអ្នកលើក។
ការពិតទៅ នេះគឺជារឿងមួយគួរឲ្យសរសើរ ដែលអ្នកសិល្បៈមិនបានប្រកាន់ថា ជាតិសាសន៍ណា ឬប្រទេសណាក្រោយពីបានឃើញថា នាង Lydia បង្ហាញក្ដីទុក្ខសោកដូច្នេះ ទោះបីជាមិនមានអ្វីច្រើន តែតារាចម្រៀងខ្មែរនៅលើទ្រនំថោនកញ្ញា មាស សុខសោភា ក៏បានចូលសរសេរលើកទឹកចិត្តថា៖ «ស៊ូ ស៊ូ!» ចំណែកឯកញ្ញា វ៉ាន់ នីឡា វិញបានសរសេរថា៖ «យើងកំពុងរង់ចាំ អ្នកទាំង ២ នឹងត្រឡប់មកវិញ»៕
