The Phnom Penh Post Search

Search form




Logo of Phnom Penh Post newspaper Phnom Penh Post - មាស សុខ សោភា​ នឹង​ចូល​រួម​ក្នុង​ទិវា​​ពន្យារ​កំណើត​ពិភព​លោក​នៅ​កម្ពុជា




មាស សុខ សោភា​ នឹង​ចូល​រួម​ក្នុង​ទិវា​​ពន្យារ​កំណើត​ពិភព​លោក​នៅ​កម្ពុជា

ក្រុម​យុវជន​អង្គ​ការ​ចតុមុខ​ នាពេល​បើក​យុទ្ធ​នាការ​ផ្សព្វផ្សាយ​ទិវា​ពន្យារ​កំណើត​ពិភពលោក​។
ក្រុម​យុវជន​អង្គ​ការ​ចតុមុខ​ នាពេល​បើក​យុទ្ធ​នាការ​ផ្សព្វផ្សាយ​ទិវា​ពន្យារ​កំណើត​ពិភពលោក​។ WCD

មាស សុខ សោភា​ នឹង​ចូល​រួម​ក្នុង​ទិវា​​ពន្យារ​កំណើត​ពិភព​លោក​នៅ​កម្ពុជា

ភ្នំពេញៈ ​ដោយ​មាន​គោល​បំណង​ចង់​លើក​កម្ពស់នូវ​ការ​យល់​​ដឹង​អំពី​សុខ​ភាព​ផ្លូវ​ភេទ ​ទៅ​ដល់​​យុវ​ជន​​កម្ពុជា​​ឲ្យ​​កាន់​តែបាន​ប្រសើរ​ឡើង​​ និង​ដើម្បី​ជួយ​ដោះ​ស្រាយ​នូវ​កង្វះ​ខាត​ការ​យល់​ដឹង​ការពន្យា​រកំណើត​​ និង​ដោះ​ស្រាយ​នូវ​វិសម​ភាព​យេន​ឌ័រ​ ទើបបាន​ក្រុម​យុវជន​ចតុមុខ​ បាន​​រៀបចំ​នូវការ​ប្រគំតន្រ្តីមួយ​នា​​ល្ងាច​ថ្ងៃ​ទី ២៥ ខែ​ធ្នូ​ នៅ​មជ្ឈ​មណ្ឌល​​កោះពេជ្រ និង​​សិក្ខា​សាលា​ស្តីពី​ «​ទិវា​ពន្យារ​កំណើត​ពិភព​លោក» នា​ថ្ងៃទី ៣០ ខែ​ធ្នូ​ខាង​មុខនេះ​​ នៅឯ​មជ្ឈ​មណ្ឌល​សហ​ប្រតិបត្តិ​ការ​កម្ពុជា​​កូរ៉េ (CKCC)​។ ​

នេះ​គឺ​ជា​ព្រឹត្តិ​ការណ៍​រៀបចំ​លើក​ដំបូង​នៅ​កម្ពុជា ដោយ​មាន​ការ​​ទទួល​គាំទ្រ​ពី​ក្រសួង​សុខាភិបាល និង​ឧបត្ថម្ភ​ដោយ​ក្រុម​ហ៊ុន​ Bayer Health Care​ អង្គការ​ USAID អង្គការ​ UNFPA ប្រចាំ​ប្រទេស​កម្ពុជា អង្គ​ការ​ខ្មែរ​បម្រើ​សុខ​ភាពប្រជាជន​ (PSI/PSK) និង​អង្គ​ការ​ម៉ារីស្តុ​ប​អន្ដរជាតិ​កម្ពុជា។ ​

លោក ព្រំ វិចិត្រ ភ្នាក់​ងារ​ទំនាក់​ទំនង​ផ្នែក​ផ្សព្វផ្សាយនៃ​ការ​រៀបចំ​នូវ​ទិវា​ពន្យា​រកំណើត​ពិភព​លោក ​(WCD) បាន​ឲ្យ​ដឹង​ពី​គោល​ដៅ​សំខាន់​​នាពេល​ធ្វើ​សន្និសីទ​សារព័ត៌មាន​កាល​ពី​​រសៀល​ថ្ងៃទី ២២ ខែ​ធ្នូនៅ​ឯ CJCC ថា៖ «នៅ​ថ្ងៃ​ទី ២៥ ខែ​ធ្នូ​ខាង​មុខ​ យើង​មាន​រៀបចំ​ការ​ប្រគំ​តន្រ្តី និង​​ការ​សម្តែង​​នូវ​ទម្រង់​សិល្បៈផ្សេងៗ​​ដូច ​​ល្ខោន​ស្បែក​​តូច​ ល្ខោន​និយាយ​ សម្តែង​សៀក ចាប៉ី​ដង​វែង ​ការ​​សម្តែង​ក្បាច់​គុន​ល្បុក្កតោ​ពិសេសនោះ​ក៏​មាន​ ​ការ​ចូល​រួម​​ពី​សំណាក់​តារា​ចម្រៀងផ​លិ​ត​កម្ម​ថោន​ គឺ​កញ្ញា​ មាស សុខ​សោភា ហើយ​ក៏​​លោក ហេង ពិទូ លោក Jimmy Kiss និង​តារា​ជា​ច្រើន​រូប​ទៀតដើម្បី​ញ៉ាំង​ឲ្យ​កម្ម​វិធី​កាន់​តែមាន​ភាព​អធិក​អធម​។ គោល​បំណង​គឺ​ចង់​ជំរុញ​ និង​លើក​ទឹក​ចិត្ត​ដល់​យុវ​ជន​​ខ្មែរ​យើង​បាន​យល់​ដឹង​ និង​ហ៊ាន​និយាយ​​ទៅ​កាន់​ដៃគូ​​ខ្លួន​អំពី​សុខ​ភាព​បន្ត​ពូជ​ និង​ការ​ពន្យារ​កំណើត​ដោយ​គ្មាន​ការ​ភ័យ​​ខ្លាច​ និង​ដោយ​មាន​សុវត្ថិ​ភាព នៅ​ម៉ោង ៥ ល្ងាច​»។

លោក​បាន​បន្ត​ឲ្យ​ដឹងទៀត​ថា៖ «ចំណែក​ថ្ងៃទី ៣០ ខែ​ធ្នូ​​ យើង​ធ្វើ​​សិក្ខា​សាលា​​ និង​បទ​បង្ហាញ​ស្តី​ពី​ទិវា​ពន្យារកំណើត​​ពិភព​លោក​នេះ​នៅ​ឯ​ CKCC ចាប់​ពីម៉ោង​៧ព្រឹក​ដល់​ម៉ោង ១២ ថ្ងៃត្រង់​ ដែល​នឹង​ពន្យល់​ណែ​នាំ​ពី​ការ​ពន្យា​រកំណើត​នៅ​កម្ពុជា ​ការពិភាក្សា​តុមូល​ និង​ជជែក​​ដេញ​ដោល​រក​វិធីសាស្រ្ត ក៏​ដូចគម្រោង​គ្រួសារ​»។

គួរ​បញ្ជាក់​ដែរ​​​ថា ទិវា​ពន្យារ​កំណើត​​ពិភព​លោក​នេះ​ ​កម្ពុជា​បាន​ប្រារព្ធ​ធ្វើ​ជា​លើក​ដំបូង​​ ខណៈនៅ​ទូទាំង​សកល​​លោក ​​​បាន​ប្រារព្ធ​ធ្វើ​ជា​រៀង​រាល់​ឆ្នាំ​នៅចំ​ថ្ងៃទី ២៦ នា​ខែ​កញ្ញា ដែល​ជា​យុទ្ធនាការ​មួយ​​ផ្តោត​លើ​ចក្ខុវិស័យ​នៃ​​ការ​មាន​ផ្ទៃពោះ​ តាំង​ពី​ឆ្នាំ ២០០៧ មកម៉េ្លះ​ ហើយ​គោល​បំណង​ចម្បង​ជា​បេសកកម្ម​លើកកម្ពស់​ការ​យល់​ដឹង​ពី​ការ​​ពន្យា​រកំណើត​ និង ជួយ​ឲ្យ​យុវជន​មាន​ជម្រើស​លើ​បញ្ហា​សុខ​ភាព​ផ្លូវ​ភេទ និងបន្តពូជ​ ការ​រួម​ភេទ​ដោយ​សុវត្ថិ​ភាព​ និងប​ណ្តុះ​គំនិត​មនុស្ស​ជំនាន់​​ថ្មី​ឲ្យ​ចេះ​សម្រេច​ចិត្ត​​លើ​ការ​មាន​ផ្ទៃពោះ​តាម​គម្រោង​ការ​គិត​មុន មិន​មែន​កើត​​ឡើង​ដោយ​ការ​ចៃដន្យ​នោះឡើយ៕​

អត្ថបទគួរចាប់អារម្មណ៍