ក្រុងឡុងដ៍៖ កសិករអង់គ្លេសម្នាក់បាននឹកឃើញគំនិតប្លែកមួយក្នុងការជួលពពែដើម្បីបង្កើនភាពទាក់ទាញក្នុងពិធីប្រជុំតាមរយៈវីដេអូ និងបានរកឃើញប្រភពចំណូលពីបម្រាមបិទប្រទេសដ៏មិនគួរឱ្យស្មានដល់។
ពពែត្រចៀកវែងឈរមើលក្នុងក្រសែភ្នែកងឿងឆ្ងល់ ពេលកសិករ Dot McCarthy កាន់ទូរស័ព្ទដៃថតសកម្មភាពពួកវាកំពុងស៊ីស្មៅ និងដើរជុំវិញជង្រុកស្មៅ។
វីដេអូហ្វូងពពែបង្ហាញកាយលើ Zoom ខណៈអ្នកចូលរួម ៣នាក់ទៀតបង្ហាញស្នាមញញឹម ហើយអ្នកស្រី McCarthy ប្រាប់ណែនាំឈ្មោះពពែឱ្យស្ដាប់។
ស្របពេលនោះ បុគ្គលិកកសិដ្ឋានម្នាក់ក៏កំពុងថតសកម្មភាពពពែក្នុងទម្រង់ជំនួបវីដេអូខលស្រដៀងគ្នានេះដែរ។
កសិដ្ឋាន Cronkshaw Fold នៅ Lancashire ភាគពាយព្យប្រទេសអង់គ្លេស បានបង្ហាញមុខ ៥ នាទី នូវវត្ដមានពពែលើវេទិការវីដេអូខល មានតម្លៃ ៧ ដុល្លារ។
អតិថិជនអាចជ្រើសរើសយកសត្វពពែ ៧ ប្រភេទ នៅលើវេបសាយរបស់កសិដ្ឋាន ចាប់ពីពពែម៉ាហ្គារ៉េតលំដាប់ខ្ពស់បំផុតរហូតដល់ពពែសម្បុរត្នោត លាយសឈ្មោះ កូន លូលូ។
អ្នកស្រី McCarthy បានបន្ដថា៖ «ចង់និយាយថា យើងកំពុងតែនិយាយគ្នាលើវីដេអូខលពីប្រធានបទជំនួញផ្សេងៗ ឬប្រហែលជំនួបគ្រួសាររយៈពេលយូរ ដែលធ្វើឱ្យយើងធុញទ្រាន់»។
ស្ដ្រីវ័យ ៣២ ឆ្នាំបន្ថែមថា៖ «លោកអ្នកអាចកក់យកពពែមួយក្បាលមកចូលរួមក្នុងកិច្ចសន្ននារបស់អ្នក ហើយចូរសង្ខេតមើលថា តើសហការីណាខ្លះនាំគ្នាកត់សម្គាល់សកម្មភាពរបស់វា។ សំខាន់ជំនួបមុខជំនួញកាន់តែរស់រវើក»។
ដោយសារវាចាប់ផ្ដើមផ្ដល់សេវាកម្មជិតមួយឆ្នាំ កសិដ្ឋានរកចំណូលបានជិត ៧ ម៉ឺនដុល្លារ ដែលវាពិតជាគួរឱ្យអស់សំណើចមែន»។
កសិដ្ឋានគ្រួសារតូចនេះ ក៏ប្រើសត្វចៀម និងមាន់ផងដែរ។ ប្រជាប្រិយភាពសត្វពពែលើ Zoom បានអនុញ្ញាតឱ្យពួកគេងាយស្រួលធ្វើការជជែក និងផ្ដល់កិច្ចការបន្ថែមសម្រាប់សហគមន៍ក្នុងស្រុក និងសារសំខាន់ក្នុងតំបន់ជនបទ។
ជាមួយគ្នានេះ អ្នកស្រីមិនជ្រួលជ្រើមចំពោះភាពជោគជ័យនូវអ្វីដែលអ្នកស្រីបានហៅថា «រលកនៃកម្មវិធីហៅទូរស័ព្ទតាមរយៈវីដេអូជាមួយសត្វពពែ» នោះទេ។
អ្នកស្រី បាននិយាយទាំងអស់សំណើចថា៖ «ខ្ញុំបាននិយាយពាក្យនេះតាំងពីចាប់ផ្ដើមដាក់បម្រាមប្រទេសដំបូង តែខ្ញុំពិតជាគិតថា នេះគ្រាន់តែចំណូលបន្ទាប់បន្សំ។ ច្បាស់ណាស់ យើងនៅតែបន្ដផ្ដល់សេវាកម្មនេះ ដរាបណាមនុស្សត្រូវការពពែ យើងនៅតែនាំសត្វពពែជួបពួកគេ»៕ AFP/HR