The Phnom Penh Post Search

Search form




Logo of Phnom Penh Post newspaper Phnom Penh Post - មូលនិធិ​​ផ្កាយ​សមុទ្រ​ឥណ្ឌូចិន​បន្ដ​ដំណើរការ​ថ្នាក់​រៀន​តាម​អនឡាញ ខណៈ​រង់ចាំ​ភ្លើង​បៃតង​ពី​ក្រសួង​អប់រំ​




មូលនិធិ​​ផ្កាយ​សមុទ្រ​ឥណ្ឌូចិន​បន្ដ​ដំណើរការ​ថ្នាក់​រៀន​តាម​អនឡាញ ខណៈ​រង់ចាំ​ភ្លើង​បៃតង​ពី​ក្រសួង​អប់រំ​

Content image - Phnom Penh Post
កម្មវិធី​សិក្សា​ក៏​មាន​មេរៀន​ថត​ទុក​អាច​ទស្សនា​នៅពេល​ណា​ក៏បាន​​។ រូបថត សហ​ការី

មូលនិធិ​​ផ្កាយ​សមុទ្រ​ឥណ្ឌូចិន​បន្ដ​ដំណើរការ​ថ្នាក់​រៀន​តាម​អនឡាញ ខណៈ​រង់ចាំ​ភ្លើង​បៃតង​ពី​ក្រសួង​អប់រំ​

ភ្នំពេញ៖ ខណៈ​សាលា​រដ្ឋ និង​សាលា​ឯកជន​ជា​ច្រើន​បាន​ដំណើរការ​ឡើង​វិញ​ អង្គការ​មូលនិធិ​ផ្កាយ​សមុទ្រ​ឥណ្ឌូចិន (ISF) បាន​និង​កំពុង​តែ​បន្ដ​ដំណើរ​ការ​ថ្នាក់​រៀន​អនឡាញ​តាមរយៈ Zoom (ហ្សូម) សម្រាប់​អ្នក​ខកខាន​ចូល​សាលា​ជា​ច្រើន​ខែ។​

អ្នកស្រី ឈួប វិច្ឆិកា នាយិកា​គ្រប់គ្រង​ប្រចាំ​ប្រទេស​របស់​អង្គការ ISF បាន​ឲ្យ​ដឹង​ថា​៖ «​សាលា​រៀន​ខ្លះ​កំពុង​តែ​បើក​ដំណើរការ​ តែ​ខ្លះ​ទៀត​នឹង​រង់ចាំ​ពេល​វេលា​បន្ដិច​ទៀត​។ សំណាង​ណាស់​កុមារ​នៅ​តែ​អាច​ទទួល​បាន​ការ​អប់រំ​តាមរយៈ​ការ​រៀបចំ​របស់​អង្គការ​នានា​ ក៏​ដូចជា​រាជរដ្ឋាភិបាល​បន្ដ​បង្រៀន​សិស្ស​ជាប់​ជានិច្ច​»។

ជាមួយ​សិស្ស​ចន្លោះ​ពី ១០​ ទៅ ២០ ​នាក់ ក្នុង​ការ​បង្រៀន​ម្ដង យុវជន ឈុន បញ្ញា បាន​រៀន​ភាសា​អង់គ្លេស​ ដែល​រៀបចំ​ឡើង​ដោយ ISF ពី​គ្រូ​បង្រៀន​ឈ្មោះ Joshua Kauffman រយៈពេល ៤៥ នាទី​។ ពួក​គេ​ភាគ​ច្រើន​នៅ​ភ្នំពេញ តែ​ខ្លះ​ក៏​ទៅ​តាម​បណ្ដា​ខេត្ដ ដូចជា​លោក បញ្ញា ជា​ដើម​។

បញ្ញា អាយុ ១៨ ​ឆ្នាំ ជា​សិស្ស​ថ្នាក់​ភាសា​អង់គ្លេស​ដ៏​មាន​ការ​តាំង​ចិត្ដ​ខ្ពស់​ម្នាក់​បាន​និយាយ​ថា​៖ «​ដោយសារ​ខ្ញុំ​យក​ចិត្ដ​ទុក​ដាក់​ចំពោះ​ការ​អប់រំ​ ជាពិសេស ទើប​ខ្ញុំ​នៅ​តែ​ពុះពារ​។ ខ្ញុំ​គិត​ថា ភាសា​អង់គ្លេស​មាន​សារៈសំខាន់​សម្រាប់​កុមារ​កម្ពុជា ពី​ព្រោះ​វា​អាច​ជួយ​ការ​សិក្សា​បាន​ច្រើន​»។​

ជា​លទ្ធផល បញ្ញា តែងតែ​ចូល​រៀន​ជា​ទៀង​ទាត់​លើ​កម្មវិធី​ហ្សូម ជាមួយ​លោក​គ្រូ​របស់​ខ្លួន​។ រូប​គេ​នៅ​តែ​អាច​សម្រប​ខ្លួន​បាន បើ​ទោះបី​ជា​ត្រូវ​ជួយ​កិច្ចការ​ស្រែ​ចម្ការ​របស់​គ្រួសារ​។

Content image - Phnom Penh Post
អង្គការ​​​រំពឹ​ងថា​ សិស្ស​​នៅតែ​ទទួល​​បាន​ការ​អប់រំ​អនឡាញ​ដ៏​សមស្រប​​។ រូបថត សហ​ការី

អ្នកស្រី វិច្ឆិកា បាន​បន្ដ​ថា​៖ «​ទោះ​ជួយ​កិច្ចការ​ភ្ជួរ​រាស់ ចិញ្ចឹម​សត្វ និង​ដាំ​ដំណាំ​ផ្សេង​ៗ​ បញ្ញា នៅ​តែ​បន្ដ​ការ​សិក្សា​គ្រប់​មេរៀន​លើ​អនឡាញ​របស់​អង្គការ ​ISF»។

លោក ទេព សុធារិទ្ធិ ប្រធាន​ផ្នែក​កម្មវិធី​សិក្សា​ភាសា​អង់គ្លេស​របស់ ISF បាន​ឲ្យ​ដឹង​ថា ហ្សូម​ពិត​ជា​សំខាន់​អំឡុង​ពេល​វេលា​ដ៏​លំបាក​នេះ​ នៅ​ពេល​សិស្ស​មិន​អាច​មក​សាលា​រៀន​ ហើយ​ពួក​គេ​ជា​ច្រើន​បាន​វិល​ទៅ​ខេត្ដ​វិញ​។

លោក​និយាយ​ថា​៖ «​បច្ចេកវិទ្យា​ជួយ​ឲ្យ​គ្រូ​ផ្សារ​ទំនាក់ទំនង​ជាមួយ​សិស្ស​។ មុខ​ងារ​ជា​ច្រើន​របស់​វា​បាន​ផ្ដល់​ភាព​ងាយ​ស្រួល​ដល់​គ្រូ​ក្នុង​ការ​ប្រើ​ប្រាស់ ដូចជា​ការ​ចូលរួម​ជា​ច្រើន​នាក់​ក្នុង​ពេល​តែមួយ​។ លើស​ពី​នេះ សិស្ស​អាច​មើល​មុខ​គ្នា​ ដូច​ថ្នាក់​រៀន​ពិត​ៗ​ ហើយ​ពួក​គេ​អាច​បង្កើន​លទ្ធភាព​ជំនាញ​ស្ដាប់ និង​និយាយ​ជា​ភាសា​អង់គ្លេស​តាមរយៈ​ការ​ប្រាស្រ័យ​ទាក់ទង​»។

ការ​បង្រៀន​អនឡាញ​មាន ​២ ប្រភេទ​ គឺ​វីដេអូ​ថត​ទុក និង​ការ​បង្រៀន​ភ្លាមៗ​លើ​កម្មវិធី ហ្សូម​ដែល​អនុញ្ញាត​ឲ្យ​មាន​សកម្មភាព​ខ្លះ​ដូច​នឹង​ការ​បង្រៀន​ផ្ទាល់​ផង​ដែរ​។

លោក សុធារិទ្ធិ បន្ដ​ថា​៖ «​មេរៀន​ថត​ទុក​អាច​ទស្សនា​នៅ​ពេល​ណា​ក៏​បាន ដោយ​គ្រូ​ប្រើ​ Projector ក្ដារ​ខៀន និង​បច្ចេកទេស​ប្លែកៗ​មួយ​ចំនួន​ដើម្បី​ផ្ដល់​ភាព​ងាយ​ស្រួល​។ វីដេអូ​ខ្លះ​ថត​ពី​ផ្ទះ ខ្លះ​នៅ​អង្គការ ហើយ​ករណី​​មួយ​ គ្រូ​បាន​ទៅ​បង្រៀន​សិស្ស​តាម​ខេត្ដ​ដោយ​ការ​ខ្ចី​ថ្នាក់​រៀន​ទីនោះ​»។

សិស្ស​សរុប​ដែល​បាន​​រៀន​តាម​អនឡាញ​មាន​ចំនួន ៥៧២ ​នាក់​ ដោយ​គិត​លើ​គ្រប់​វិជ្ជមាន​ រួម​ទាំង​ការ​សិក្សា​អនឡាញ​ការ​ធ្វើ​លំហាត់​រៀង​រាល់​សប្ដាហ៍។

អ្នកស្រី វិច្ឆិកា បាន​ឲ្យ​ដឹង​ថា​៖ «យើង​ក៏​បាន​បង្ហោះ​វីដេអូ​របស់​ក្រសួង​អប់រំ​រៀង​រាល់​សប្ដាហ៍ រួម​ទាំង​គ្រូ​បង្រៀន​នៅ ISF និង​ក្រុម​ក្នុង​ហ្វេសប៊ុក ​របស់​អង្គការ​ថែម​ទៀត​»។

យ៉ាងណា​មិញ ពួក​គេ​ក៏​ជួប​ការ​លំបាក​ខ្លះៗ​ ដោយសារ​សិស្សានុសិស្ស​នៅ​ផ្ទះ ជាពិសេស​ពួក​គេ​រស់នៅ​ទី​ជនបទ​ដែល​មិន​សូវ​មាន​សេវា​អ៊ីនធឺណិត​។

លោក​ សុធារិទ្ធិ បាន​និយាយ​ថា​៖ «​សេវា​អ៊ីនធឺណិត​ខ្សោយ​ ហើយ​ជួន​កាល​ពួក​គេ​អត់​មាន​ទូរស័ព្ទ​ល្អ​ប្រើ​ ដែល​ធ្វើ​ឲ្យ​គុណភាព​សេវា​កាន់​តែ​យ៉ាប់​។ យ៉ាង​ណា វា​ប្រសើរ​ជាង​អត់​អី​សោះ​»។

បញ្ញា បាន​ដឹង​ថា កុមារ​ខ្លះ​បាន​រើ​ទៅ​នៅ​តាម​ខេត្ដ​ជាមួយ​សាច់​ញាតិ​ ហើយ​រូប​គេ​ក៏​បាន​សម្រេច​ចិត្ដ​បង្កើត​ថ្នាក់​រៀន​ភាសា​អង់គ្លេស​មួយ​នៅ​ផ្ទះ​។ បញ្ញា បាន​បង្រៀន​ក្មេងស្រី​ ៦ ​នាក់ ​ពេញ ១​ ​សប្ដាហ៍​ទៀង​ទាត់ ខណៈ​រូប​គេ​ក៏​នៅ​បន្ដ​សិក្សា​តាម​កម្មវិធី​ហ្សូម​ផង​ដែរ​។

Content image - Phnom Penh Post
បញ្ញា អាយុ ១៨ឆ្នាំ ជា​សិស្ស​ថ្នាក់ភាសាអង់គ្លេស​ ដែល​បន្ត​ផ្ទេរ​ចំណេះ​ដឹង​ភាសា​អង់គ្លេស​ដល់​កុមារ​​​នៅ​ផ្ទះ​។ រូបថត សហ​ការី

បញ្ញា ដែល​មក​ពី​ខេត្ដ​ព្រៃវែង​បាន​និយាយ​ថា​៖ «​រឿង​គួរ​ឲ្យ​អស់​សំណើច​នោះ ​​គឺ​ថា ខ្ញុំ​មិន​ចូលចិត្ដ​ក្មេងៗ​ទេ​។ ដូច្នេះ មិន​ដឹង​ម៉េច​បាន​ខ្ញុំ​មក​បង្រៀន​បែប​នេះ​ តែ​ខ្ញុំ​ពិត​ជា​រីករាយ​ដែល​បាន​ជួយ​បង្រៀន​ក្មេង​ៗ​។ ខ្ញុំ​ពិត​ជា​ដឹង​គុណ​ចំពោះ ISF និង​ចំពោះ​លោក​គ្រូ អ្នក​គ្រូ​របស់​ខ្ញុំ​។ ដូច្នេះ ខ្ញុំ​ក៏​បន្ដ​ចែក​រំលែក​ចំណេះដឹង​នេះដល់​អ្នក​ដទៃ​​ផង​ដែរ​»។

នៅ​ថ្ងៃ​អនាគត បញ្ញា ចង់​ធ្វើ​ជា​អ្នក​ជំនួញ និង​កសិករ​ ដែល​ជួយ​ជំរុញ​ការ​អភិវឌ្ឍ​ប្រទេស​ជាតិ​។

អង្គការ ISF ដែល​ប្រើប្រាស់​ការ​អប់រំ និង​កីឡា​ជា​យាន​ផ្លាស់​ប្ដូរ​ជីវិត​ កំពុង​ធ្វើ​ការ​ជាមួយ​ក្រសួង​អប់រំ យុជន និង​កីឡា ក្នុង​ការ​កំណត់​ពេល​វេលា​បើក​ទ្វារ​សាលារៀន​ឡើង​វិញ​ ដោយ​ធានា​ថា កុមារ​នឹង​ត្រូវបាន​ការពារ និង​មាន​សុវត្ថិភាព​។

អ្នកស្រី វិច្ឆិកា បាន​បន្ថែម​ថា​៖ «​កាល​បរិច្ឆេទ​បើក​ដំណើរការ​ឡើង​វិញ​នៅ​មិន​ទាន់​កំណត់​ទេ​ តែ​ស្រប​ពេល​នេះ យើង​នឹង​ធានា​ថា សិស្ស​របស់​យើង​នៅ​តែ​ទទួល​បាន​ការ​អប់រំ​ដែល​ពួក​គេ​សម​នឹង​ទទួល​តាម​រយៈ ហ្សូម និង​តិចនិក​អនឡាញ​ដទៃ​ទៀត​។ ​​នេះ​រួម​ទាំង​សិស្ស ដែល​នៅ​ខេត្ដ និង​រង់ចាំ​ការ​វិល​មក​ថ្នាក់​រៀន​វិញ​»។

សម្រាប់​ព័ត៌មាន​លម្អិត​អំពី​អង្គការ​មូលនិធិ​ផ្កាយ​សមុទ្រ​ឥណ្ឌូចិន​ (ISF) អ្នក​អាច​ចូល​ទៅ​កាន់​ https://isfcambodia.org/  ឬ​ទំព័រ​ហ្វេសប៊ុក @isf.cambodia៕

អត្ថបទគួរចាប់អារម្មណ៍

  • ភ្នំពេញ៖ រដ្ឋមន្ត្រី​ក្រសួង​យុត្តិធម៌​លោក​ កើត ​រិទ្ធ​ បាន​ប្រាប់​ឯកអគ្គ​រាជទូត​អូស្ត្រាលី​លោក ​Pablo​ Kang ​នៅ​ក្នុង​ជំនួប​កាល​ពី​ថ្ងៃ​អង្គារ នៅ​ក្រសួង​យុត្តិធម៌​ថា​ ការ​ចាប់​ខ្លួន​បុគ្គល​ណា​មួយ​ដោយ​សមត្ថកិច្ច គឺ​ធ្វើ​ទ្បើង​ដោយ​អនុលោម​តាម​ច្បាប់​​កម្ពុជា។​

  • ភ្នំពេញ៖ ដោយ​សង្កេត​ឃើញ​ពី​ការ​ប្រឈម​របស់​​ប្រជាកសិករ​កម្ពុជា​​មួយ​ចំនួន​ ជាពិសេស​អ្នក​នៅ​ទី​ដាច់​ស្រយាល​ ដែល​បាត់បង់​ទីផ្សារ​​​​ព្រោះ​តែ​វិបត្តិ​កូវីដ យុវជន ​១ ក្រុម ​បាន​រួមគ្នា​បង្កើត​គម្រោង​ COVID Farmer Hacker ដើម្បី​ជួយ​​អ្នក​ខិតខំ​ដាំដុះ​តែ​ត្រូវ​រងគ្រោះ​ពី​ការ​រំខាន​ដល់​​​សេដ្ឋកិច្ច​​បង្ក​ដោយ​វីរុស​កូរ៉ូណា។​

  • ភ្នំពេញ៖ គ្រឹះស្ថាន​មីក្រូហិរញ្ញវត្ថុ ប្រាសាក់ ​​ដែល​ចុះ​បញ្ជី​សញ្ញាប័ណ្ណ​សាជីវកម្ម​នៅ​ផ្សារ​មូលបត្រ​កម្ពុជា ​(CSX) បាន​រាយការណ៍​អំពី​ប្រតិបត្តិការ​អាជីវកម្ម​ដ៏​ល្អ​ប្រសើរ​នៅ​ត្រីមាស​ទី​២ ​ឆ្នាំ​នេះ ទោះបី​ជា​​ខ្លួន​ទទួល​រង​នូវ​សម្ពាធ​ខ្លះៗ​ពី​ការ​រីក​រាលដាល​ជំងឺ​កូវីដ ​១៩ ​ដែល​បណ្ដាល​ឱ្យ​សេដ្ឋកិច្ច​របស់​កម្ពុជា មាន​ការ​ធ្លាក់ចុះ​ក៏​ដោយ​។​

  • ភ្នំពេញ៖ ​លោកស្រី​ ​ភឿង​ សកុណា ​រដ្ឋមន្រ្តី​ក្រសួង​វប្បធម៌​ និង​វិចិត្រ​សិល្បៈ​បាន​ចេញ​សេចក្ដី​ណែនាំ​ដល់​គ្រប់​អង្គភាព​ពាក់ព័ន្ធ​ក្រោម​ឱវាទ​ក្រសួង​វប្បធម៌ ​និង​គ្រប់​រដ្ឋបាល​ថ្នាក់​ក្រោម​ជាតិ ​អនុវត្ត​នីតិវិធី​ និង​ទម្រង់​បែបបទ​នៃ​ការ​គ្រប់គ្រង​អាជីវកម្ម​កាត់សក់​ ​អ៊ុត​សក់​ និង​លម្អ​ក្រចក

  • ភ្នំពេញ៖ ​រដ្ឋមន្រ្តី​ក្រសួង​សុខាភិបាល​លោក ​ម៉ម​ ប៊ុន​ហេង បាន​ជំរុញ​ឱ្យ​គ្រប់​ភាគី​ពាក់ព័ន្ធ​ទាំង​អស់​ ដែល​ធ្វើ​ការ​ផ្នែក​គាំពារ​មាតា​ និង​ទារក​ ត្រូវ​​បង្កើន​យុទ្ធនាការ​អប់រំ​ផ្សព្វផ្សាយ​អំពី​សារៈសំខាន់​នៃ​ការ​បំបៅ​កូន​ដោយ​ទឹក​ដោះ​ម្តាយ​ និង​ហានិភ័យ​ពី​ការ​បំបៅ​កូន​ដោយ​ទឹក​ដោះ​គោ​ម្សៅ​ផ្សំ​តាម​រូបមន្ត​ទាំង​នៅ​ថ្នាក់​ជាតិ​ និង​ថ្នាក់​ក្រោម​ជាតិ។

  • មណ្ឌលគិរី៖ សាលា​ដំបូង​ខេត្ត​មណ្ឌលគិរី ពី​ម្សិលមិញ​បាន​សម្រេច​ឃុំ​ខ្លួន​ចាងហ្វាង​សារព័ត៌មាន​អនឡាញ​ម្នាក់​នៅ​ពន្ធនាគារ​​ខេត្ត​ក្រោម​បទ​ចោទ ​«ឈូស​ឆាយ​ដី​ព្រៃ​ដោយ​គ្មាន​ការ​អនុញ្ញាត​» បន្ទាប់​ពី​សមត្ថកិច្ច​ឃាត់​ខ្លួន​កាល​ពី​​ថ្ងៃទី ២២ កញ្ញា ​តាម​ដីកា​តុលាការ​ពាក់ព័ន្ធ​ការ​ឈូស​ឆាយ​ដី​ព្រៃ ​និង​ប្រើប្រាស់​សារធាតុ​ញៀន។