.jpg)
ក្នុងឈុតសម្លៀកបំពាក់គេងយប់ កុមារីអាយុ ៨ ឆ្នាំ បង្ហាញស្នាដៃចម្អិនម្ហូប ល្បីពេញបណ្ដាញសង្គម។ រូបថត AFP
ក្រុងយ៉ាំងហ្គោន៖ ចាប់ពីស្ងោរជ្រក់ត្រីអណ្ដែង រហូតដល់ឆាកង្កែបម្រេច កុមារីវ័យ ៨ ឆ្នាំ ក្នុងឈុតគេងយប់ និងពាក់មួកចុងភៅ កំពុងតែចម្អិនម្ហូបមីយ៉ាន់ម៉ា ជាមួយសមត្ថភាពយ៉ាងពិសេសអំឡុងពេលពលរដ្ឋត្រូវបានណែនាំឲ្យស្នាក់នៅក្នុងផ្ទះដោយសារការរីករាលដាលនៃវីរុសកូរ៉ូណា។
អ្នកម្ដាយ មូ មីន ម៉េធូ បានបង្ហោះវីដេអូឃ្លីបមួយលើអនឡាញកាលពីចុងខែមេសា ដោយបង្ហាញពីជំនាញកូនស្រីតូចដែលមានសមត្ថភាពចម្អិនម្ហូបយ៉ាងប៉ិនប្រសប់។
ជាមួយស្នាមញញឹមរំលេចនូវធ្មេញចបកាប់ធំ ២ វីដេអូឃ្លីបបានបង្កការភ្ញាក់ផ្អើលលើបណ្ដាញសង្គម និងធ្វើឲ្យកុមារីតូចនេះ ទទួលបានរហស្សនាមថា «មេចុងភៅតូច»។ ពេលនេះ នាងចាប់ផ្ដើមលក់ម្ហូបកុម្ម៉ង់ និងរកចំណូលបានមួយផ្នែកផងដែរ។
នាងតូចបានប្រាប់ AFP ពីផ្ទះបាយក្នុងផ្ទះល្វែងក្រុងយ៉ាំងហ្គោនថា៖ «ខ្ញុំគ្រាន់តែចូលចិត្ដចម្អិនអាហារ»។
មេចុងភៅតូចនឹងបន្តកិច្ចការចម្អិនម្ហូបម្ហារហូតដល់សាលាបើកទ្វារ។ រូបថត AFP
កុមារីបាននិយាយដោយមានបំណងចង់ឲ្យកុមារភាពរបស់ខ្លួននេះទៅចំណង់អាជីពនៅថ្ងៃអនាគតថា៖ «វាធ្វើឲ្យយើងរីករាយអំឡុងពេលមិនអាចចេញក្រៅនេះ»។
ក្នុងវីដេអូល្បីបំផុតមួយ ដែលមានអ្នកចូលទស្សនាជិត ២០ ម៉ឺនដង តារាតូចពាក់អាវយឺតរូបសក់ដុះស្នែង ខណៈនាងផ្ដល់ការបង្រៀនចម្អិនម្ហូបពេលព្រឹកមីយ៉ាន់ម៉ា ម៉ូហ៊ីងយ៉ា អមជាមួយស្ងោរជ្រក់ត្រីអណ្ដែង។
មូ មីន ម៉េធូ បានបង្រៀនធ្វើម្ហូប ១៥ មុខ រួមទាំង ការីគ្រឿងត្រី ខសាច់ជ្រូក និងឆាកង្កែបគ្រឿងហឹរ។ មុខម្ហូបនីមួយៗដាក់លក់ក្នុងតម្លៃ ១ ម៉ឺនក្យាត (២៩ ០០០ រៀល) និងត្រូវបានដឹកជញ្ជូនដោយសមាជិកគ្រួសារនៅពេលល្ងាច ដោយប្រតិបត្ដិការទាំងស្រុងស្ថិតក្រោមការណែនាំបង្ហាត់បង្ហាញពីអ្នកម្ដាយ ហាន់នី ឆូ។
មុខជំនួញនេះកំពុងទទួលជោគជ័យ។ វីដេអូលើបណ្ដាញសង្គមមួយបានបង្ហាញពីកុមារីកំពុងញាត់ក្រដាសប្រាក់ ១ ម៉ឺនក្យាត ចូលក្នុងប្រអប់កូនជ្រូក ជាប្រាក់ដែលនាងរំពឹងថាសម្រាប់ចិញ្ចឹមកូនឆ្កែ។
អ្នកម្ដាយ មូ មីន ម៉េធូ ណែនាំបង្ហាត់កូនពីការចម្អិន និងគ្រឿងផ្សំនានា។ រូបថត AFP
អ្នកម្ដាយបាននិយាយដោយអះអាងថា កូនរបស់ខ្លួនមានជំនឿចិត្ដយ៉ាងខ្លាំងថា៖ «វាធ្វើឲ្យខ្ញុំរីករាយណាស់ដែលឃើញមនុស្សជាច្រើននៅមីយ៉ាន់ម៉ា និងបណ្ដាប្រទេសដទៃចែករំលែកវីដេអូនេះ»។
កុមារី មូ មីន ម៉េធូ គ្រោងបន្ដចម្អិនម្ហូបទៀតរហូតដល់សាលាបើកទ្វារនៅខែសីហា រយៈពេល ២ ខែក្រោយបិទដោយសារកូរ៉ូណា។
មីយ៉ាន់ម៉ា បានកត់ត្រាអ្នកឆ្លងជំងឺកូវីដ ១៩ ចំនួន ២២៨ នាក់ និង ៦ នាក់ស្លាប់៕ AFP/HR
