ក្រុងអាសហ្គាបាត: ក្រុមមន្ដ្រីគ្រងឈុតកីឡារាប់ពាន់នាក់នៅប្រទេសតួម៉េនីស្ថាន បាននាំគ្នាជិះកង់កាលពីថ្ងៃពុធ ខណៈមេដឹកនាំដ៏ចម្លែកខុសគេ លោកប្រធានាធិបតី Gurbanguly Berdymukhamedov បានដឹកនាំក្បួនជិះកង់ ដើម្បីប្រារឰទិវាជិះកង់ពិភពលោក។
តួម៉េនីស្ថាន ជាប្រទេសមួយក្នុងចំណោមប្រទេសដ៏កម្រ ដែលមិនបានរាយការណ៍ពីជំងឺឆ្លងផ្លូវដង្ហើមកូរ៉ូណាថ្មីសូម្បីតែមួយករណី មិនសូវគិតពីបញ្ហាគម្លាតសុវត្ថិភាពក្នុងរយៈពេលប៉ុន្មានខែចុងក្រោយ ដោយការប្រារឰកម្មវិធីពិសេសផ្សេងៗទៅតាមប្រតិទិនជាតិជាមួយវត្ដមានមនុស្សច្រើនកុះកុញ។
ទិវាជិះកង់ពិភពលោក ជាឱកាសដែលអង្គការសហប្រជាជាតិ ទទួលស្គាល់ក្នុងឆ្នាំ២០១៨ ដោយទទួលការស្នើសុំពីប្រទេសតួម៉េនីស្ថាន មានការចូលរួមពីមន្ដ្រីកាន់អំណាចដ៏ច្រើន ដែលបានជិះជាមួយលោក Berdymukhamedov ក្នុងទីក្រុងអាសហ្គាបាត ដែលដងវិថីនានាត្រូវបានបិទចរាចរណ៍។
ទូរទស្សន៍រដ្ឋ បានរាយការណ៍ថា អ្នកជិះកង់ ៧ ៥០០ នាក់បានចូលរួមទិវានេះ ហើយតំបន់នៅក្រៅក្រុងបានរៀបចំព្រឹត្ដិការណ៍តូចៗជាច្រើនទៀត។
មុនពេលចាប់ផ្ដើម លោកប្រធានាធិបតី Berdymukhamedov អាយុ ៦២ ឆ្នាំ បានបង្ហាញវិមានកង់កិត្ដិយសកម្ពស់ ៣០ ម៉ែត្រ ដែលបានក្លាយជាសមាធាតុផ្សព្វផ្សាយរបៀបរបបរស់នៅប្រកបដោយសុខុមាលភាពដ៏សំខាន់។
ខណៈក្រុមមន្ដ្រីលើកឡើងថា ប្រទេសឯកោដែលមានប្រជាជន ៦ លាននាក់ អត់មានអ្នកជំងឺកូវីដ ១៩ សូម្បីតែម្នាក់ កាលពីខែមុន លោក Berdymukhamedov បានចុះហត្ថលេខាលើផែនការរបស់រដ្ឋាភិបាលដើម្បីឆ្លងតបនឹងករណីអាសន្នផ្សេងៗ។
មន្ដ្រីការទូត ស្ថិតក្នុងចំណោមអ្នកជិះកង់ទាំងនេះ ដែលត្រូវបានផ្ដល់ទឹកថ្នាំបាញ់លាងសម្អាតដៃដោយបុគ្គលិករដ្ឋាភិបាល ខណៈពួកគេមកចូលរួមកម្មវិធីជួបជុំនេះផងដែរ។
យ៉ាងណាមិញ អត់មាននរណាពាក់ម៉ាស ទោះជាផ្ទុយនឹងបម្រាមរដ្ឋាភិបាលយ៉ាងណាក៏ដោយ៕ AFP/HR