ក្រុងបាងកក៖ នៅអារាមព្រះពុទ្ធផ្ទំ ក្នុងក្រុងបាងកក លោក ក្រៃរ៉ាត់ ចាន់ត្រាស្រ៊ី បានឲ្យដឹងថា លោកជាអ្នកថែរក្សាប្រពៃណីចាប់សរសៃអាយុកាល ជាង ២ ពាន់ឆ្នាំ បានយ៉ាងល្អ នោះគឺជាទិចនិកម៉ាស្សាកាច់ដៃជើង និងឈ្លីកែងដៃ ដែលសប្ដាហ៍នេះអាចត្រូវបានបន្ថែមចូលបញ្ជីបេតិកភណ្ឌរបស់អង្គការ UNESCO។
ចាប់ពីទីក្រុងបាងកកដ៏មមាញឹករហូតដល់ទីក្រុងឆ្នេរភូកេត នៅតាមហាងជាប់ដងវិថីនានា «nuad Thai» ឬម៉ាស្សាថៃ ត្រូវបានមើលឃើញមាននៅគ្រប់ទីកន្លែងក្នុងប្រទេស ថៃ ដែលសេវាកម្មម៉ាស្សា ១ ម៉ោង មានតម្លៃត្រឹមតែ ៥ ដុល្លារ។
សប្ដាហ៍នេះ វាអាចត្រូវបានបន្ថែមចូលទៅក្នុងបញ្ជីបេតិកភណ្ឌវប្បធម៌អរូបីពិភពលោករបស់អង្គការ UNESCO ពេលអង្គការនេះបានជួបប្រជុំក្នុងទីក្រុងបូហ្គូតា ប្រទេស កូឡុំប៊ី ចាប់ពីថ្ងៃទី ៩ ដល់ថ្ងៃទី ១៤ ខែធ្នូ។
លោក ក្រៃរ៉ាត់ ដែលបង្រៀននៅសាលាបាលីព្រះពុទ្ធផ្ទំ នៃអារាមវត្ដផូ បានជួយសិស្សថៃ និងបរទេសរាប់ពាន់នាក់ ដែលបានមករៀននៅមជ្ឈមណ្ឌលនេះទទួលបានជំនាញពិតប្រាកដក្នុង ១ ឆ្នាំៗ។
ជាអ្នកស្នងជំនាញម៉ាស្សា លោកបានប្រើប្រាស់ចំណេះដឹងនេះមកចែករំលែកដល់សិស្សដែលមានបំណងបន្ដវេន និងទទួលយកវិញ្ញាបនបត្រសិក្សា ដើម្បីដាក់តាំងបញ្ជាក់ក្នុងហាងរបស់ខ្លួន។
បុរសអាយុ ៤០ ឆ្នាំ លោក ក្រៃរ៉ាត់ ចាន់ត្រាស្រ៊ី បានប្រាប់ AFP ថា៖ «ខ្ញុំជាអ្នកស្នងចំណេះដឹងម៉ាស្សា និងបន្ដវេនដល់ក្មេងជំនាន់ក្រោយ»។
នៅបរិវេណវត្ដផូ អ្នករៀនម៉ាស្សាសិក្សាពីប្រភេទចលនាដោយផ្ដោតសំខាន់ទៅលើចំណុចសរសៃម្ជុរវិទ្យាសាស្ដ្រជាមួយមេដៃ កែងដៃ ជង្គង់ និងប្រអប់ជើង រួមទាំងការកាច់ដៃជើង និងដងខ្លួនផងដែរ។
ដោយមានប្រភពពីប្រទេស ឥណ្ឌា វេជ្ជបណ្ឌិត និងព្រះសង្ឃត្រូវបានគេយល់ថា ពួកគេជាតួអង្គនាំយកវិធីសាស្ដ្រម៉ាស្សាមកកាន់ប្រទេស ថៃ តាំងពី ២ ៥០០ ឆ្នាំមុន ដោយឆ្លងកាត់ពីគ្រូដល់សិស្សក្នុងអារាម និងក្រុមគ្រួសារ។
ស្ថិតក្រោមរជ្ជកាលស្ដេចរាមាទី ៣ ក្នុងសតវត្សរ៍ទី ១៩ អ្នកប្រាជ្ញស្រេកឃ្លានចំណេះដឹងម៉ាស្សា បាននាំគ្នាសម្រុកមករៀនជំនាញនេះនៅវត្ដផូ។ ប៉ុន្ដែការអនុវត្ដជាក់ស្ដែងទើបតែធ្វើឡើងក្នុងឆ្នាំ ១៩៦២ ដោយសារមានការបង្រៀននៅសាលារៀន ដែលបានបណ្ដុះបណ្ដាលសិស្សជាង ២០ ម៉ឺននាក់ ក្នុង ១៤៥ ប្រទេស។ សេវាកម្មម៉ាស្សានេះ បានផ្ដល់ការងារដល់ជនជាតិថៃរាប់សែននាក់។
បច្ចុប្បន្នអ្នកជំនាញចាប់សរសៃនៅហាងស្ប៉ាប្រណីតនានាក្នុងប្រទេស ថៃ គិតថ្លៃពីភ្ញៀវរហូតដល់ប្រមាណ ១០០ ដុល្លារ ១ ម៉ោង ហើយតម្លៃនេះមានការកើនឡើងលើសពី ២ ទៅ ៣ ដង នៅទីក្រុងឡុងដ៍ ញូវយ៉ក ឬហុងកុង ជាទីដែលយីហោម៉ាស្សាថៃកំពុងតែពេញនិយម។
ការសិក្សាជាច្រើននៅលើសកលលោកបានបង្ហាញថា វាបានជួយសម្រួលការឈឺចាប់ឆ្អឹងខ្នង ឈឺក្បាល ដេកមិនលក់ និងថែទាំអារម្មណ៍ក្រេវក្រោធថែមទៀត។
សម្រាប់លោក Matthieu Rochefolle គិលានុបដ្ឋាកដែលមកទីក្រុងលីយ៉ុង ប្រទេស បារាំង ការបន្ថែមទិចនិកម៉ាស្សាថៃក្នុងជំនាញរបស់លោក អាចជួយអ្នកជំងឺវ័យចំណាស់បន្ថយអាការឈឺចាប់នានា។
លោក Matthieu Rochefolle បាននិយាយថា៖ «វាក៏អាចអនុញ្ញាតឲ្យខ្ញុំរកប្រាក់កម្រៃបន្ថែមផងដែរ»៕ AFP/HR