.jpg)
តារាចម្រៀងលោក ម៉ា ច័ន្ទបញ្ញា និងគូស្នេហ៍កញ្ញា អុីងអុីង កាលពេលនៅត្រូវរ៉ូវគ្នា។ ហុង មិនា
ភ្នំពេញៈ ទោះបីសម្ព័ន្ធស្នេហ៍ដ៏ផ្អែមល្ហែមរវាងតារាចម្រៀងប្រុសអូរីជីណល ចេះនិពន្ធទាំងទំនុកច្រៀង និងភ្លេងខ្លួនឯងលោក ម៉ា ច័ន្ទបញ្ញា និងតារាសម្តែងស្រីសាច់សខ្ចីកូនកាត់ ៣ សាសន៍កញ្ញា អ៊ីងអ៊ីង ត្រូវកាត់ផ្តាច់អស់រយៈពេលប្រមាណ ៧ ខែ ដោយរលកព័ត៌មានលេចឮមិនច្បាស់ថា មានជនទី៣ ជ្រែកស្នេហ៍ ឬយ៉ាងណានោះក្តី តែទឹកចិត្តស្រឡាញ់របស់លោកនៅរារែកហាក់មិនទាន់អស់អាល័យពីគូស្នេហ៍។
នេះបើតាមការបង្ហើបប្រាប់ពីសំណាក់តារាចម្រៀងប្រុសអូរីជីណល់លោក ម៉ា ច័ន្ទបញ្ញា ឲ្យភ្នំពេញប៉ុស្តិ៍បានដឹង នាពេលសួរបញ្ជាក់ពីរឿងសម្ព័ន្ធភាពស្នេហ៍រវាងលោក និងកញ្ញា អ៊ីងអ៊ីង ក្រោយពីឃើញសារបង្ហោះតាមហ្វេសប៊ុករបស់លោកជាចុងក្រោយ ដែលបើកចំហពីរឿងសម្ព័ន្ធភាពស្នេហ៍ត្រូវបានកាត់ផ្តាច់ពិតមែននោះ។
លោក ម៉ា ច័ន្ទបញ្ញា តារាចម្រៀងប្រុសវ័យ ២៨ ឆ្នាំ បានចេញបទថ្មីមានចំណងជើងថា «រាប់អាន» ដែលរងពាក្យចចាមអារ៉ាមថា សម្ព័ន្ធស្នេហ៍ខ្លួនបែកបាក់ម្តងមកហើយ កាលពីប៉ុន្មានខែមុន បានបញ្ជាក់ប្រាប់ភ្នំពេញប៉ុស្តិ៍ទាំងចិត្តនៅរារែកនៅឡើយថា៖ «ជាការពិតទៅ!ខ្ញុំ និងគាត់ [អូន អ៊ីងអ៊ីង] ខានបានជួបគ្នាក្នុងនាមជាគូស្នេហ៍ដូចកាលពីមុនអស់រយៈពេលប្រមាណ ៧ ខែ មកហើយ។ គ្រាន់តែកាលពីប៉ុន្មានខែមុននោះ រូបខ្ញុំផ្ទាល់ ហាក់នៅមិនទាន់ហ៊ានទទួលស្គាល់ខ្លួនឯងថា សម្ព័ន្ធស្នេហ៍យើងទាំង ២ នៅតែមិនទាន់ដាច់ស្រឡះ ឬអាចមានផ្លូវដោះស្រាយបាន។ ប៉ុន្តែពេលវេលារំលងទៅកន្លងប៉ុន្មានខែនេះ ក៏ធ្វើឲ្យខ្ញុំគិតដែរថា ទំនងជាមិនអាចផ្សះផ្សាគ្នាបានទេ ទោះបីជាខ្ញុំខំតាមរកគាត់ដើម្បីបកស្រាយ ឬថ្លែងប្រាប់ពីជម្រៅចិត្តយ៉ាងណាក្តី ក៏គាត់មិនព្រមបង្ហាញវត្តមាន និងមិនចង់ជួបខ្ញុំទេ ដោយសារតែនៅមានភាពអាក់អន់ចិត្តនឹងខ្ញុំ»។
តារាចម្រៀងប្រុសល្បីក្នុងស្រទាប់យុវវ័យ លោក ម៉ា ច័ន្ទបញ្ញា។ហុង មិនា
លោក ម៉ា ច័ន្ទបញ្ញា បានបន្តថា៖ «ថ្មីៗនេះ ខ្ញុំក៏មានការភ្ញាក់ផ្អើលខ្លាំងដែរ ទៅនឹងសារដែលបង្ហាញពីអារម្មណ៍ពិតរបស់ខ្ញុំចំពោះគាត់ នៅតាមបណ្តាញសង្គម ដោយឃើញមានអ្នកគាំទ្រ និងមិត្តភក្តិច្រើនបានជជីកសួរនាំ និងដេញដោលរកមូលហេតុពិតនៃការផ្តាច់ទំនាក់ទំនងគ្នារវាងខ្ញុំ និងគាត់នោះ។
ឆ្លៀតឱកាសខ្ញុំគ្រាន់តែ សូមជម្រាបដល់បងប្អូន ប្រិយមិត្តគាំទ្រ និងមិត្តភក្តិទាំងអស់ថា មូលហេតុរវាងយើងទាំង ២ នាក់ គឺមានច្រើនពិបាកនឹងពណ៌នា ដោយសារតែពួកយើងទាំង ២ គឺសុទ្ធតែបានកសាងកំហុសរៀងៗខ្លួន»។
ទោះបីជាចំណងស្នេហ៍ដ៏ផ្អែមល្ហែមខំបង្កាត់ប្រមាណ ២-៣ ឆ្នាំ រវាងតារាសម្តែងស្រីសាច់សកញ្ញាអ៊ីងអ៊ីង និងតារាចម្រៀងប្រុសអូរីជីណលប្រុស បានមកដល់ផ្លូវបំបែកយ៉ាងណាក្តី តែបើតាមស្តាប់មើលទៅតារាចម្រៀងប្រុស ម៉ា ច័ន្ទបញ្ញា ហាក់នៅមិនទាន់អាចដកចិត្តស្រឡាញ់ដ៏លើសលប់ ចេញពីអតីតគូស្នេហ៍ដែលធ្លាប់សាងភាពផ្អែមល្ហែមរួមគ្នាគឺកញ្ញា អ៊ីងអ៊ីង បានទេ៕
