ភ្នំពេញ : បច្ចុប្បន្នរ៉ឺម៉កម៉ូតូជាច្រើនកំពុងតែចរាចរណ៍ទូទំាងប្រទេសមិនថា នៅទីក្រុង ឬក៏តាមបណ្តាខេត្តនានានោះ។ ទន្ទឹមនឹងនោះដែរ ម្ចាស់រ៉ឺម៉កម៉ូតូទាំងឡាយតែងតែមានការរចនាយានជំនិះដែលជាឆ្នាំងបាយរបស់ខ្លួននោះខុសៗគ្នា ដូចជាការដាក់ផ្កាអមសងខាង ឬការលាបពណ៌ស្រស់ៗដើម្បីទាក់ទាញភ្ញៀវឲ្យជិះ។
ទោះជាយ៉ាងណាក្ដី ការតុបតែងបន្ថែមទាំងនេះនៅមិនអាចមានភាព លេចធ្លោដូចរទេះរ៉ឺម៉កម៉ូតូរូបផ្លែល្ពៅដែលធ្វើឲ្យយើងនឹកឃើញដល់ យានជំនិះព្រះនាងស៊ីនដឺរឺឡាក្នុងរឿងព្រេងនិទានបរទេះនោះឡើយ។
រ៉ឺម៉ក ម៉ូតូរូបផ្លែល្ពៅ និងសិប្បកម្មកែច្នៃរទេះម៉ូដប្លែកៗដទៃទៀតនោះជាគំនិតផ្ដួចផ្ដើម របស់លោក ហៀង ប៉ុននី ជាម្ចាស់ក្រុមហ៊ុនរទេះស៊ីនដឺរីឡា។
ស្ថាបនិក វ័យ២៦ឆ្នាំរូបនេះថ្លែងថា៖ «ដោយសង្កេតឃើញថារ៉ឺម៉កម៉ូតូនៅស្រុកយើងបង្កើតតំាងពី ឆ្នាំ២០០២មកនោះគឺវាមានភាពសុំាដដែល អ៊ីចឹងហើយខ្ញុំចង់ធ្វើអ្វីមួយបន្ថែមឲ្យវាប្លែកថ្មី ហើយទាក់ទាញភ្ញៀវជាតិ និងអន្តរជាតិកាន់តែច្រើន»។
លោកបាន រំឭកថា៖ «បន្ទាប់ពីខ្ញុំបានទៅលេងប្រទេសគេឃើញរទេះកង់បីគឺគេប្រើសេះ ហើយមានកង់ធំៗនិងមានរូបភាពទាក់ទាញ ហើយក៏ធ្វើឲ្យខ្ញុំមានគំនិតចង់ច្នៃម៉ូដរបៀបនេះមកធ្វើជារទេះ រ៉ឺម៉កម៉ូតូដែលមានរូបរាងប្លែក និងទាក់ទាញ»។
លោក ហៀង ប៉ុននី មានគំនិតធ្វើរទេះនេះតំាងពីដើមឆ្នាំ២០១៣ មកម្ល៉េះ។ មុនពេលដែលលោកសម្រេចចិត្តបង្កើតរទេះនេះឡើង លោកបានចំណាយពេលជាច្រើនខែស្វែងរកអ្នកជំនាញមានបទពិសោធធ្លាប់ ធ្វើរ៉ឺម៉កម៉ូតូ១០ឆ្នាំមក។ លោកបានពិភាក្សាជាមួយអ្នកជំនាញនោះ និងបង្កើតជាម៉ូដរទេះផ្លែល្ពៅ ឆៃកែវចិន និងម៉ូដប្លែកៗជាច្រើនទៀត។ នៅដើមឆ្នាំ២០១៤ លោកក៏រំលេចគម្រោងនេះចេញជារូបរាងដោយបង្កើតបានរទេះម៉ូតូចំនួន ៨ម៉ូដខុសៗគ្នា ហើយក្នុងម៉ូដនីមួយៗលោកចំណាយពេលពី៤ទៅ៥ថ្ងៃក្នុងការផលិត។ ប៉ុន្តែនៅថ្ងៃអនាគតទៅ នៅពេលដែលចង្វាក់ផលិតកម្មរត់ដៃ លោករំពឹងថាការផលិតរទេះមួយគ្រឿងនឹងចំណាយពេលប្រហែលជា៣ថ្ងៃ ប៉ុណ្ណោះ។
លោក ហៀង ប៉ុននី បានបន្តថា៖ «សម្រាប់ការចំណាយទុនក្នុងការបើកសិប្បកម្មរទេះរ៉ឺម៉កម៉ូតូនេះគឺ ចំណាយដើមទុនអស់១៦០០០ដុល្លារ ប៉ុន្តែយើងមានទុនសម្រាប់បង្វិលហ្នឹងគឺ១ម៉ឺនដុល្លារទៀតសម្រាប់ បម្រុង»។
ទាក់ទិននឹងតម្លៃ លោកក៏បានបង្ហើបឲ្យដឹងថា៖ «តួរទេះរ៉ឺម៉កម៉ូតូនេះគឺខ្ញុំបានដាក់លក់ដោយផ្តល់ជូនតម្លៃ ពិសេសក្នុងមួយគ្រឿង៩៩៩ដុល្លារ។ តម្លៃនៅថ្ងៃអនាគតទៅនឹងមានការប្រែប្រួល។ តម្លៃឥឡូវគឺមើលទៅវាថ្លៃសម្រាប់អ្នករត់រ៉ឺម៉កម៉ូតូហើយ ឥឡូវនេះខ្ញុំខំព្យាយាមទាក់ទងខាងមីក្រូហិរញ្ញវត្ថុ ឬក៏ធនាគារដើម្បីសហការសម្រួលដល់អ្នកទិញជាមួយនឹងការបង់ រំលស់ផងដែរ»។
ក្រៅពីកែច្នៃម៉ូដរ៉ឺម៉កប្លែកៗនេះក្រុមហ៊ុន រទេះស៊ីនដឺរីឡាក៏មានសេវាជួសជុលរ៉ឺម៉កបាក់បែកឲ្យថ្មី កែឡើងស៊េរី បាញ់ថ្នាំ និងទទួលទិញរ៉ឺម៉កចាស់ដូរថែមយករ៉ឺម៉កម៉ូតូថ្មីផងដែរ។ សិប្បកម្មមានលេខទូរស័ព្ទ០១០៥១០៤០៤និង០៨៨៥៥៥៥៣៦៩៕
