The Phnom Penh Post Search

Search form




Logo of Phnom Penh Post newspaper Phnom Penh Post - ម៉ៃយ៉ា តារាម៉ូដែលខ្មែរ​អាល្លឺម៉ង់ ទម្លាយ​មូលហេតុ​មិន​ទាន់​ថត​កុន




ម៉ៃយ៉ា តារាម៉ូដែលខ្មែរ​អាល្លឺម៉ង់ ទម្លាយ​មូលហេតុ​មិន​ទាន់​ថត​កុន

Content image - Phnom Penh Post
តារា​ម៉ូដែល ម៉ៃយ៉ា ក្នុង​ឈុត​ថត​ផ្សាយ​ពាណិជ្ជកម្ម និង​សម្អាង​ការ​។ រូប សហការី

ម៉ៃយ៉ា តារាម៉ូដែលខ្មែរ​អាល្លឺម៉ង់ ទម្លាយ​មូលហេតុ​មិន​ទាន់​ថត​កុន

ភ្នំពេញៈ ជា​មួយនឹង​រូប​ឆោមលោម​ពណ៌​សម្បុរ​ល្អ​ រូប​ស្រស់​សោភា ខ្ទង់​ច្រមុះ​ស្រួច​ ផែន​មុខ​ស្អាត​ កញ្ញា​កូន​កាត់​ខ្មែរ​អាល្លឺម៉ង់វ័យ ២០ ឆ្នាំ ខាហ្គឺ​ម៉ៃយ៉ា សូរ៉ៃយ៉ា​ម៉ាថា ហៅ ម៉ៃយ៉ា បាន​ឆក់​យក​ឱកាស​ប្រឡូក​​ក្នុង​វិស័យ​សិល្បៈ​តាំង​ពីឆ្នាំ ២០១៤ មក​នោះ កំពុង​តែ​ត្រូវ​ប៉ាន់​នឹង​ការងារ​ថត​វីដេអូពាណិជ្ជកម្ម ​ខ្លីៗ​ឲ្យ​​ផលិត​ផល​គ្រឿង​សម្អាង ភេសជ្ជៈ​ និង​ថត​សម្អាង​ការ​នានា​យ៉ាង​ច្រើន​ស្អេកស្កះតាម​រាសី​ឡើង​ស្រឺតៗ​តែ​ម្ដង​។

នា​ពេល​ថ្មីៗ​នេះ ខណៈ​ដែល​មាន​ក្រុម​ហ៊ុន​ផលិត​កម្ម​នានា​ចង់​បាន​កញ្ញាដ៏​ស្រស់​សោភា ​​ដើម្បី​ថត​សម្តែង​នូវ​ចម្រៀង​ខារ៉ាអូខេ និង​ខ្សែ​ភាព​យន្ដ​ ​ស្រាប់​តែ​ ម៉ៃយ៉ា បដិសេធ​មិន​ទទួល​យក​នូវ​សំណើ​ទាំង​នោះ​​ ដែលស្តាប់​ទៅ​មាន​លក្ខណៈ​ខុស​ប្លែក​ពី​​តារា​វ័យ​ក្មេង​ស្របាលៗ​នាង ដែលតែង​តែ​ប្រាថ្នា​ចង់​ក្តាប់​យក​ឱកាស​មាស​នេះណាស់​ តែ​មិន​បានដូច​ក្ដីស្រេមៃ​។

តារាស្រី​កូន​កាត់​ មាន​ឪពុក​ជាតិ​អាល្លឺម៉ង់ ​ម្តាយ​ខ្មែរ និង​សព្វ​ថ្ងៃ​ជា​និស្សិតរៀន​ឆ្នាំ​ទី ២ ផ្នែក Decor Designer ​នៅ​សាកល​វិទ្យា​ល័យភូមិន្ទ​​វិចិត្រ​សិល្បៈ បាន​បង្ហើប​ឲ្យ​ដឹងពី​មូល​ហេតុ​ ដែល​ច្រាន​ចោលនូវ​ឱកាស​ថត​កុននោះថាមាន​កត្តា​ពីរ​បី​យ៉ាង​ដែល​នាង​មាន​ចិត្ត​រារែក។

កញ្ញា ម៉ៃយ៉ា បន្ដ​ថា​៖ «​ទី​មួយ​ដោយសារ​នាង​ខ្ញុំ​គិត​ថា បទ​ពិសោធ​របស់​ខ្លួន​នៅ​ក្នុង​វិស័យ​សិល្បៈ​នា​ពេល​នេះ​ហាក់​នៅ​ក្មេង​ខ្ចី​ណាស់​ ពុំ​ទាន់​ហ៊ាន​នឹក​គិត​ ឬ​ប្រាថ្នា​ទៅ​​ប្រឡូកក្នុង​វិស័យ​ភាពយន្ដ​​នៅ​ឡើយ​នោះ​ទេ»។ ​

ម៉ៃយ៉ា

គេ​សង្កេត​ឃើញ​ថា​នៅ​ក្នុង​ពិភព​ថត​ខ្សែ​ភាព​យន្ដ​នាសម័យ​ទំនើប​នេះ តារា​ស្រី​ខ្មែរ​ភាគ​ច្រើន​បាន​ប្រើ​រូប​សម្ផស្ស​ដង​ខ្លួន ជា​ពិសេស​ផ្នែក​ល្វែង​លើធ្វើ​ជា​ទុន​ដើម្បី​ទាញ​យក​ប្រជា​ប្រិយ​ភាព​​ពី​អ្នក​ទស្សនា​ និង​ទាញ​យកចំណាប់​អារម្មណ៍​ផលិត​ករ​ភាព​យន្ដ​នានា​ដូច​ជា កញ្ញា បេននី យ៉ាំង តារា​សិច​ស៊ី សេង សូណា និង​កញ្ញា ដេននី ជា​ដើម។

តែ​ភាព​លេច​ធ្លោ​នេះ​មិន​មែ​ន​ជាចំណូល​ចិត្ដ​ ឬ​ជា​វិធី​ទាក់ទាញ​របស់​តារា​ម៉ូដែល​ស្រី​ ម៉ៃយ៉ា​ ឡើយ​ ដោយ​នាង​បាន​បញ្ជាក់​ដែរ​ថា៖ «​មូលហេតុ​ទី ២ គឺ​ខ្ញុំ​​មិន​ចូល​ចិត្ត​ការ​ថត​ភាព​យន្ដ ដែល​តម្រូវ​ឲ្យ​បង្ហាញ​នូវ​ភាព​សិចស៊ី​ ទោះ​បី​ជា​រូប​នាង​ខ្ញុំ​ជា​កូនខ្មែរ​កាត់​អឺរ៉ុបក្តី ​តែ​ឈាម​ជ័រ​ជា​ខ្មែរ​ស្រឡាញ់​វប្បធម៌​ប្រពៃណី​ខ្លួន​របស់​នាង​ខ្ញុំ​នៅ​មាន ខណៈ​ចំណុច​ថត​បែបនេះ​ក៏​មិន​ត្រូវ​នឹង​ចំណូល​ចិត្ដ​របស់​ម្តាយ​នាង​ខ្ញុំ​ដែរ»។

កញ្ញា ម៉ៃយ៉ា ក៏​បាន​បង្ហើប​ឲ្យ​ដឹង​ពី​ចំណូល​ចិត្ត្​​ និងចំណាប់​អារម្មណ៍ខ្លួន ដែល​ធ្វើ​ឲ្យ​នាង​សម្រេច​ចិត្ដ​ឈាន​ទៅ​ក្នុង​វិស័យ​សិល្បៈ​នេះដែរ​ថា​៖ «ចំពោះ​វិស័យ​តារា​ម៉ូដែល​នេះ ខ្ញុំ​ចូល​ចិត្ត​តាំង​ពីពេល​នៅវ័យក្មេង​ម្ល៉េះ។ តែ​សម្រាប់​វិស័យ​ថត​ស្ប៉ត​ពាណិជ្ជកម្មវិញកាន់​តែ​ពេញ​ចិត្ដ​​ ហើយ​នា​ពេល​នេះ​នាង​ខ្ញំ​កំពុង​តែ​សម្រេច​នូវក្តីសុបិន​របស់​ខ្លួន​ជាបណ្តើរៗហើយ»។​

នៅ​ក្នុង​សង្គ​មគ្រួសារ​កញ្ញា​ដូច​ជា​មិន​មាន​ប៉ាម៉ាក់​ ឬសាច់​ញាតិ​ណា​ធ្លាប់​ជា​អ្នក​សិល្បៈ​ឡើយ ទើប​តែជំនាន់​​កញ្ញា​​ប៉ុណ្ណោះ​ដែល​ផ្តើម​នូវ​ពន្លក​សិល្បៈ​នេះឡើង ហើយ​ជា​សំណាង​​ល្អណាស់​ដែល​ កញ្ញា ម៉ៃយ៉ា ​​មានការ​លើក​ទឹក​ចិត្ត​​ពី​សំណាក់​ឪពុក​ម្ដាយ​ឲ្យ​កញ្ញា​សម្រេច​ក្តីប្រាថ្នា និង​ធ្វើ​កិច្ចការ​តាម​ចំណូល​ចិត្ត​របស់ខ្លួន​។​

ពាក់​ព័ន្ធវេលា​នឹង​ចូល​ប្រឡូក​វិស័យ​ថត​ភាពយន្ដ​នា​ពេល​អនាគត តារាស្រី​កូនកាត់​ខ្មែរ​អាល្លឺម៉ង់វ័យ ២០ ឆ្នាំ​ កញ្ញា ខាហ្គឺ​ម៉ៃយ៉ា សូរ៉ៃយ៉ា​ម៉ាថា ដែល​មាន​ចំណេះ​ដឹង​ផ្នែក​ភាសា​ដល់​ទៅ​បី​ គឺខ្មែរ អង់គ្លេស និង​ថៃ​នោះ​ ហាក់​ដូច​ជា​នៅ​ទ្រឹង​សញ្ជឹង​គិត​មាន​ភាព​រារែក​ក្នុង​ការឆ្លើយ​តប​ភ្លាមៗ តែ​មួយ​ស្របក់​​មក​ក៏​ឆ្លើយ​ថា​៖​«គ្រួសារខ្ញុំ ជា​ពិសេស​ម៉ាក់​គាត់​មិន​ពេញ​ចិត្ត​ព្រោះ​ខ្លាច​មាន​ឈុត​សិច​ស៊ី​អី​នឹង ហើយខ្លួន​ខ្ញុំ​ផ្ទាល់​ក៏​អត់​ចូលចិត្ត​បែប​នោះ​ដែ​រ​»។

នាង​និយាយ​ទៀត​ថា៖ «ចំពោះខ្សែ​ភាព​យន្ដ​ជា​ប្រភេទ រឿងដុំខ្ញុំក៏អត់​ទទួល​ដែរ តែ​​បើ​ជា​រឿង​ចាក់​តាម​កុន​អាហ្នឹង​ខ្ញុំ​ប្រហែល​ជា​ទទួ​ល​ថត​បាន​។ ប្រសិន​បើ​មានផលិត​កម្ម​ណា​ហ៊ាន​ឲ្យ​ថ្លៃ​ខ្ពស់​មែន ខ្ញុំ​ត្រូវពិចារណា​ជាមួយ​អ្នក​ផ្ទះ​សិនដែរ ណា​មួយ​ខ្ញុំ​ជាប់​សិក្សា​អត់​សូវមាន​ពេល​គ្រប់គ្រាន់​សម្រាប់​ថតទេ​។ ម្យ៉ាង​វិញ​ទៀត​ខ្ញុំ​ជាប់​ការ​ងារ​ក្រៅ​ផ្សេង​ទៀត ហើយ​នឹង​​ជាប់​ថត​ឲ្យ​សម្អាង​ការ​ច្រើន​ផង​ដែរ»៕

អត្ថបទគួរចាប់អារម្មណ៍