ភ្នំពេញៈ ខណៈមានការកត់សម្គាល់ថារាសីរបស់កញ្ញា ខាហ្គឺម៉ៃយ៉ា សូរ៉ៃយ៉ាម៉ាថា ហៅកញ្ញា ម៉ៃយ៉ា កំពុងតែឡើងក្រឺតៗ បន្ទាប់ពីនាងក្តាប់បានតំណែងជាតួឯកស្រីក្នុងកុនភាគរឿង «ហង្សបាក់ស្លាប» ក្រោយមកក៏បានតំណែងជាតួឯកស្រីក្នុងរឿងដុំថ្មី «ទាយាទអាគម» និងកុនភាគរឿង «កញ្ញាអម្ពិលផ្អែម» នោះ ក៏ស្រាប់តែលេចឮថា នាងចង់ឈប់ពីសិល្បៈ ដើម្បីទៅរស់នៅអាល្លឺម៉ង់ ជាស្រុកកំណើតឪពុកបង្កការភ្ញាក់ផ្អើលដល់មហាជន។
អ្វីកាន់តែធ្វើឲ្យមហាជនជឿថា តារាស្រីកូនកាត់អាស៊ី-អឺរ៉ុប វ័យ ២២ ឆ្នាំ រូបនេះ ពិតជាចង់ឈប់ពីសិល្បៈមែននោះគឺគេបានឃើញនាងបង្ហោះសារតាមបណ្តាញសង្គមហ្វេសប៊ុកថា៖ «បន្តិចទៀតនេះ លាសិល្បៈស្រុកខ្មែរដែរ! នាងខ្ញុំស្រឡាញ់ណាស់អាល្លឺម៉ង់ជួបគ្នាឆាប់»។
តែពេលកញ្ញាជាពិធីការិនីទូរទស្សន៍ CNC ដែលជាតារាសម្តែងទើបតែបានរះថ្មីនៅលើវិថីសិល្បៈភាពយន្តនារយៈពេល ២-៣ ឆ្នាំរូបនេះ បង្ហើបប្រាប់ ភ្នំពេញប៉ុស្តិ៍ ឲ្យដឹងទាំងខុសពីសេចក្តីនៅក្នុងសារខាងលើវិញថា៖ «នាងខ្ញុំនឹងមិនឈប់សិល្បៈទេបង!កាលពីដំបូងនាងខ្ញុំចង់ទៅរស់នៅទឹកដីនៃទីក្រុងមុយនិច ប្រទេសអាល្លឺម៉ង់មែន តែពេលនេះបានសម្រេចចិត្តរួចហើយថា អត់ទៅទីនោះទេ។ ហេតុផលមិនមានអ្វីធំដុំទេ គឺគ្រាន់តែចិត្តខ្ញុំមិនទាន់ចង់ទៅរស់នៅទីនោះតែប៉ុណ្ណោះ»។
តារាសម្តែងស្រី ម៉ូដែល និងពិធីការិនីទូរទស្សន៍ CNC វ័យ ២២ ឆ្នាំ មានរូបឆោមល្អ សាច់សខ្ចី ទម្រង់មុខស្អាត កូនកាត់ជាតិសាសន៍អាស៊ី-អឺរ៉ុប កញ្ញា ម៉ៃយ៉ា និងល្បីថា សម្បូរក្រុមកន្លង់ចោមរោមតាមសុំស្នេហ៍មិនតិច លំដាប់ពីអ្នកមានទ្រព្យស្តុកស្តម្ភទៅដល់ឋានៈឧកញ៉ានោះក៏បានបន្តថា៖ «ម្យ៉ាងទៀត ការងារសិល្បៈរបស់នាងខ្ញុំនាពេលនេះ កំពុងតែមមាញឹកខ្លាំងផងដែរ ទាំងការងារនៅប៉ុស្តិ៍ទូរទស្សន៍ ទាំងការងារសម្តែងភាពយន្ត និងថតស្ប៉តនានាតែម្តង។ ដូច្នេះសេចក្តីប្រាថ្នាចង់ទៅរស់នៅស្រុកកំណើតប៉ានៅប្រទេសអាល្លឺម៉ង់នោះមិនទាន់មានចិត្តចង់ទេ តែការទៅលេងកម្សាន្តអាចនឹងមាន»។
ស្រីស្រស់សម្តីផ្អែមឈាមខ្មែរកាត់អាល្លឺម៉ង់រូបនេះក៏បង្ហើបប្រាប់ដែរថា៖ «ភាពយន្តភាគរឿង កញ្ញាអម្ពិលផ្អែម របស់ខ្ញុំកំពុងតែចាក់បញ្ចាំងនៅកញ្ចក់ទូរទស្សន៍បាយ័ន និងរឿងភាគមួយទៀតនាងខ្ញុំមិនបានចាំទេ។ តែចំពោះកុនភាគរឿង ហង្សបាក់ស្លាប ដែលធ្វើក្រុងពាលីកាលពីថ្ងៃទី ១៧ ខែមីនា ឆ្នាំនេះ គឺនាងខ្ញុំទើបតែបានថតចប់ថ្មីៗនេះដែរ។ បើគិតមកទល់នឹងពេលនេះ មានកុនចំនួន ៤ សម្រាប់នាងខ្ញុំដែលកំពុងតែថត និងមិនទាន់បានថតនៅឡើយ ដោយមានរឿងភាគ ៣ និងរឿងដុំ ១។ សម្រាប់រឿងដុំទាយាទអាគមរបស់ផលិតកម្ម AD Music នាងខ្ញុំជាតួឯកស្រីជាកូនដែលស្នងទាយាទពីអ្នកម្តាយ សម្តែងដោយបងស្រីអ៊ិន វល័ក្ខ ទេពី ហើយត្រូវថតចំនួន ១២ ថ្ងៃ»។
ពេលដំបូង កញ្ញា ខាហ្គឺម៉ៃយ៉ា សូរ៉ៃយ៉ាម៉ាថា ហៅ ម៉ៃយ៉ា ធ្លាប់បានឲ្យដឹងថា មិនចង់ទទួលការថតកុនអ្វីឡើយ តែចាប់ពីនាងតោងឱកាសធ្វើជាពិធីការិនីផ្សាយបន្ដផ្ទាល់កម្មវិធីកំពូលតន្ត្រីប៉ូការី ស្វេត របស់ស្ថានីយទូរទស្សន៍ ស៊ីអិនស៊ី ទាំងមិនធ្លាប់មានបទពិសោធពីមុននោះ ស្រាប់តែគេឃើញនាងបានទទួល ការថតកុនទាំងដុំ និងភាគជាប់គ្នាឲ្យរដឹកត្រូវហុងស៊ុយឆ្នាំថ្មីតែ ម្តងហើយ។
ស្រីស្រស់សម្រស់បែបជាកូនកាត់រាងរៅតូចច្រឡឹងរូបនេះ ធ្លាប់បានបកស្រាយថា៖ «គិតថា នេះជាឱកាសល្អបានមកដល់សម្រាប់នាងខ្ញុំ ហើយក៏យល់ថា មុន ឬក្រោយក៏គង់តែខ្លួននឹងប្រឡូកក្នុងពិភពថតភាពយន្តដដែលនោះ ទើបនាងខ្ញុំក៏សម្រេចចិត្តភ្លាម ខណៈខាងប៉ាម៉ាក់ក៏ពួកគាត់មិនថាអ្វីដែរ»។
ទំនងជាមានទេពកោសល្យរួមផ្សំនឹងចំណូលចិត្ត និងភាពស៊ាំឆ្លងកាត់ការថតស្ប៉តពាណិជ្ជកម្ម ជាច្រើនឲ្យក្រុមហ៊ុនភេសជ្ជៈ និងផលិតផលថែរក្សាសម្ផស្សនានានោះហើយ ដែលរុញច្រានឲ្យតារាស្រីវ័យ ២២ ឆ្នាំ កញ្ញា ម៉ៃយ៉ា ហាក់ដូចជាមិនបានត្អូញត្អែរពីការលំបាកនៅក្នុងការថតកុនឡើយ៕