The Phnom Penh Post Search

Search form




Logo of Phnom Penh Post newspaper Phnom Penh Post - ម្ចាស់​ជយលាភី​ខ្មែរ​ ២ ​រូប​ត្រៀម​ទទួល​ពានរង្វាន់​អក្សរសិល្ប៍​ទន្លេមេគង្គ​លើក​ទី​​១០ ​ឆ្នាំនេះ ដែល​ធ្វើ​នៅ​ប្រទេស​ មីយ៉ាន់ម៉ា

ម្ចាស់​ជយលាភី​ខ្មែរ​ ២ ​រូប​ត្រៀម​ទទួល​ពានរង្វាន់​អក្សរសិល្ប៍​ទន្លេមេគង្គ​លើក​ទី​​១០ ​ឆ្នាំនេះ ដែល​ធ្វើ​នៅ​ប្រទេស​ មីយ៉ាន់ម៉ា

Content image - Phnom Penh Post
លោក មឿន សំណាង ជា​ម្ចាស់​ជយលាភី​ផ្នែក​កំណាព្យ​ខ្មែរ និង​លោកស្រី​បណ្ឌិត ប៉ែន សេដ្ឋារិន (​ស្តាំ​) ជា​ម្ចាស់​ជយលាភី​ផ្នែក​រឿង​ខ្លី​។ រូបថត សមាគម​អ្នកនិពន្ធ​ខ្មែរ

ម្ចាស់​ជយលាភី​ខ្មែរ​ ២ ​រូប​ត្រៀម​ទទួល​ពានរង្វាន់​អក្សរសិល្ប៍​ទន្លេមេគង្គ​លើក​ទី​​១០ ​ឆ្នាំនេះ ដែល​ធ្វើ​នៅ​ប្រទេស​ មីយ៉ាន់ម៉ា

ភ្នំពេញៈ ការប្រឡង​ប្រជែង​តែង​និពន្ធ​រឿង​ខ្លី និង​កំណាព្យ សម្រាប់​ពានរង្វាន់​អក្សរសិល្ប៍​ទន្លេមេគង្គ​លើក​ទី​១០ ក្រោម​ប្រធានបទ «​ជីវិត និង​និរន្តរភាព​ទន្លេមេគង្គ​» ប្រចាំ​ឆ្នាំ​ ២០១៩ នេះ​នៅ​កម្ពុជា ម្ចាស់​ជយលាភី​បាន​ទៅ​លោកស្រី​បណ្ឌិត ប៉ែន សេដ្ឋារិន និង​លោក មឿន សំណាង ដែល​នឹង​ត្រៀម​ទទួល​ពានរង្វាន់​នៅ​ថ្ងៃទី​ ១១-១៤ ខែ​ តុលា ឆ្នាំ​ ២០១៩ នៅ​ប្រទេស ​មីយ៉ាន់ម៉ា​។

លោក​បណ្ឌិត ឡឹក ជំនោរ ជា​អនុប្រធាន​សមាគម​អ្នកនិពន្ធ​ខ្មែរ​ដែល​ទទួលបន្ទុក​ខាង​ផ្នែក​ស្រាវជ្រាវ​បោះពុម្ព​ផ្សាយ និង​នវានុវត្តន៍​បាន​ឲ្យ​ដឹងថា​៖ «​លោកស្រី​បណ្ឌិត ប៉ែន សេដ្ឋារិន គឺជា​ជយលាភី​ផ្នែក​រឿង​ខ្លី​មាន​ចំណងជើង​ថា «​គង្គា​ជីវិត​» ខណៈ​លោកស្រី​គឺជា​ជនជាតិ​ខ្មែរ​ដែល​មាន​សញ្ជាតិ​ជប៉ុន និង​ពេល​បច្ចុប្បន្ននេះ គាត់​ក៏​ជា​សាស្ត្រាចារ្យ​បង្រៀន​ផ្នែក​អក្សរសាស្ត្រ​ខ្មែរ​នៅឯ​សាកលវិទ្យាល័យ​ភូមិន្ទភ្នំពេញ​ផងដែរ (​គាត់​មក​បង្រៀន​មួយ​ខែ​ម្តង​)​។ ចំណែកឯ​លោក មឿន សំណាង ជា​ម្ចាស់​សំណេរ​នៃ​កំណាព្យ​មាន​ចំណងជើង​ថា «​ស្នេហ៍​លើ​ផ្ទៃ​ទន្លេ​» គឺ​លោក​ជា​បេក្ខជន​មកពី​ខេត្តសៀមរាប​»​។

សម្រាប់​ការប្រកួត​តែង​និពន្ធ​រឿង​ខ្លី និង​កំណាព្យ ពានរង្វាន់​អក្សរសិល្ប៍​ទន្លេមេគង្គ​នេះ​ត្រូវ​បាន​កំណត់​ដាក់​ប្រធានបទ​រួម​ថា «​ជីវិត និង​និរន្តរភាព​ទន្លេមេគង្គ​» ដែល​មាន​ប្រទេស​ជា​សមាជិក​មាន​ចំនួន ៦ ប្រទេស​គឺ​មាន​ប្រទេស​ ចិន កម្ពុជា ថៃ ឡាវ វៀតណាម និង​មីយ៉ាន់ម៉ា​។ ខណៈ​ឆ្នាំ​នេះ​ប្រទេស​មីយ៉ាន់ម៉ា​គឺជា​ម្ចាស់ផ្ទះ​ដែល​ប្រារព្ធ​ធ្វើ​នៅ​ថ្ងៃទី​ ១១-១៤ ខែ ​តុលា ឆ្នាំ​ ២០១៩ ហើយ​ប្រទេស​ទាំង​ ៦ ក៏ត្រូវ​សម្រេច​ឲ្យ​ធ្វើ​ជា​ម្ចាស់ផ្ទះ​រៀបចំ​ឆ្លាស់គ្នា​ជា​រៀងរាល់​ឆ្នាំ​ផងដែរ​តាម​តួអក្សរ​ឡាតាំង​នៃ​ប្រទេស​នីមួយៗ​។

លោក​បណ្ឌិត ឡឹក ជំនោរ ក៏​បន្ត​ឲ្យ​ដឹង​ពី​គោលបំណង​នៃ​ការកំណត់​ប្រធានបទ​នេះ​ដែរ​ថា​៖ «​ចង់​ឲ្យ​ស្មេរ​ទាំង​រឿង​ខ្លី និង​កំណាព្យ​ប្រើ​គំនិត និង​ទិដ្ឋភាព​មើលឃើញ​ជាក់ស្តែង​របស់​ខ្លួន​ក្នុង​ការបង្កើត​ចេញ​ជា​ស្នាដៃ​មក​ឲ្យ​មាន​លក្ខណៈ​ឆ្លុះបញ្ចាំង​ទាំង​សកម្មភាព​ល្អ និង​សកម្មភាព​អាក្រក់​របស់​មនុស្ស ដែល​កំពុងតែ​រស់នៅ និង​អាស្រ័យ​នូវ​ផល​ពី​ទន្លេ​នេះ​។ ដូច្នេះ​ពួកគាត់​ពិតជា​អាចធ្វើ​ការពណ៌នា​ពី​សកម្មភាព ឬ​ហេតុការណ៍​នានា​ដែល​បាន​កើតឡើង​នៅលើ​ដង​ទន្លេ​មេង្គ​ជាមិនខាន​។

ប្រទេស ​មីយ៉ាន់ម៉ា​ គឺជា​សមាជិក​ថ្មី​នៅក្នុង​ចំណោម​ប្រទេស​សមាជិក​ទាំង​ ៦ ដែល​បាន​ចូលរួម​នៅក្នុង​កម្មវិធី​ប្រឡង​តែង​និពន្ធ​រឿង​ខ្លី និង​កំណាព្យ​ពានរង្វាន់​អក្សរសិល្ប៍​ទន្លេមេគង្គ ហើយ​នៅ​ឆ្នាំ​ ២០១៩ ​នេះ​គឺ​ប្រទេស ​មីយ៉ាន់ម៉ា​បាន​ចូលរួម​ត្រឹមតែ​លើក​ទី​៤ ប៉ុណ្ណោះ និង​ជា​លើក​ទី​១ ក្នុង​នាម​ជា​ប្រទេស​ធ្វើ​ម្ចាស់ផ្ទះ​រៀបចំ​ផងដែរ​។ នៅ​ឆ្នាំក្រោយ (​ឆ្នាំ​២០២០) ប្រទេស​ កម្ពុជា​ យើង​នឹង​ត្រៀមខ្លួន​ធ្វើជា​ម្ចាស់ផ្ទះ​វិញ​ម្តង​»​។

រីឯ​លក្ខខណ្ឌ​ប្រកួត​តែង​និពន្ធ​រឿង​ខ្លី និង​កំណាព្យ​សម្រាប់​ពានរង្វាន់​អក្សរសិល្ប៍​ទន្លេមេគង្គ​នេះ ប្រទេស​នីមួយៗ​ត្រូវ​តែ​ជ្រើសរើស​រក​ជយលាភី​ចំនួន ២ រូប​រៀងៗ​ខ្លួន គឺ​មួយរូប​គឺជា​ជយលាភី​ផ្នែក​រឿង​ខ្លី និង​មួយរូប​ផ្នែក​កំណាព្យ​។ ចំពោះ​លក្ខខណ្ឌ​នៃ​ការតាក់តែង​ទាំង​រឿង​ខ្លី និង​កំណាព្យ​នៅ​ប្រទេស​កម្ពុជា បេក្ខជន​ត្រូវ​បាន​គេ​កំណត់​ឲ្យ​សរសេរ​យ៉ាងច្រើន​បំផុត​ត្រឹម​ចំនួន ១៥ ទំព័រ​ប៉ុណ្ណោះ​៕

អត្ថបទគួរចាប់អារម្មណ៍

  • ជនជាតិ​ភាគតិច និង​សង្គម​ស៊ីវិល​ប្ដឹង​ជំទប់​ឃុំ និង​អភិបាលរង​ខេត្ត ​រឿង​ចេញ​បណ្ណ​សម្គាល់​ដី​ជាន់​លើ​ដី​ព្រៃ

    មណ្ឌលគិរី: ពលរដ្ឋ​សហគមន៍​ជនជាតិ​ដើម​ភាគតិច និង​សង្គម​ស៊ីវិល​ចំនួន ៦ ​នាក់​ បាន​ដាក់​ពាក្យបណ្ដឹង​ចំនួន ២ ​ដាច់​ ដោយឡែក​ពី​គ្នា​ប្ដឹង​មនុស្ស ៤ ​នាក់ ​ទៅ​តុលាការខេត្ត​ក្នុង​នោះ​មាន​ជំទប់​ទី​ ១ ​ឃុំ​ប៊ូស្រា​ម្នាក់ និង​អភិបាលរង​ខេត្តមណ្ឌលគិរី​ម្នាក់​ដោយ​ចោទ​ពាក់ព័ន្ធ​ការចេញ​បណ្ណ​សម្គាល់​ម្ចាស់​ដីធ្លី​ជាន់​លើដី​គម្រប​ព្រៃឈើ និង​បទ​ចោទ​ពាក់ព័ន្ធ​លួច​គាស់​យក​ថ្ម​ធម្មជាតិ​

  • កាណាដា​ពិន័យ VW ១៥០ ​លាន​ដុល្លារ

    ក្រុងតូរ៉ុនតូៈ តុលាការ​ក្នុង​ទីក្រុង​តូរ៉ុនតូ​កាលពី​ថ្ងៃ​ពុធ​បាន​បញ្ជា​ឲ្យ​ក្រុមហ៊ុន Volkswagen (VW) បង់ប្រាក់​ពិន័យ ១៩៦,៥ លាន​ដុល្លារ​កាណាដា (១៥០ ​លាន​ដុល្លារ​អាមេរិក​) បន្ទាប់ពី​ក្រុមហ៊ុន​ផលិត​រថយន្ត​មួយ​នេះ​បាន​សារភាព​កំហុស​ចំពោះ​ការរំលោភច្បាប់​បរិស្ថាន​ក្នុង​រឿងអាស្រូវ​បោក​បន្លំ​ការបញ្ចេញ​កាបូន​។

  • សហជីព​បារាំង​​ព្យាយាម​បន្ត​ការ​តវ៉ា​ប្រឆាំង​ការ​កែ​ទម្រង់​ប្រាក់​សោធននិវត្តន៍​​ ដើម្បី​ដាក់​សម្ពាធ​លើ​រដ្ឋាភិបាល​​

    ក្រុង​ប៉ារីស៖ ក្រុម​សហជីព​បារាំង​កាល​ពី​ថ្ងៃ​ពុធ​ បាន​បន្ត​ធ្វើ​​កូដកម្ម​ជា​ច្រើន​ ដោយ​​មាន​​បំណង​បង្កើន​សម្ពាធ​​​​ទៅ​លើ​រដ្ឋាភិបាល​មុន​នឹង​រដ្ឋាភិបាល​នេះ​ ធ្វើ​ការ​បង្ហាញ​ការ​កែ​ទម្រង់​ប្រាក់​សោធននិវត្តន៍​ចុង​ក្រោយ ​ដែល​បាន​​​ជំរុញ​ឲ្យ​មាន​ការ​តវ៉ា​ពី​បញ្ហា​ការងារ​ធំ​បំផុត​នៅ​បារាំង​ជា​ច្រើន​ទសវត្សរ៍​នោះ​​។ ​

  • លាភ ​រដ្ឋា ​និង ​ផាន់ ​គ្រាន់ ​ប៉ះ​ថៃ​ចំណូល​ថ្មី​

    ភ្នំពេញ៖ ​អ្នក​លេង​កណ្តាប់​ដៃ​របស់​កម្ពុជា​ចំនួន ​២ ​នាក់ គឺ ​លាភ ​រដ្ឋា និង​ ផាន់ ​គ្រាន់​ ​នឹង​​ត្រូវ​បង្ហាញ​ខ្លួន​រួមគ្នា នៅ​​លើ​សង្វៀន​ SEATV នា​រសៀល​ថ្ងៃ​សៅរ៍​ស្អែក​នេះ ​ដោយ​ពួក​គេ​ត្រូវ​ជួប​ជាមួយ​​កីឡាករ​ថៃ​​ចំណូល​ថ្មី​ មិន​ធ្លាប់​មក​ប្រកួត​ក្នុង​សង្វៀន​នៅ​​ប្រទេស ​កម្ពុជា ​នោះ​ទេ​​។