The Phnom Penh Post Search

Search form

Logo of Phnom Penh Post newspaper Phnom Penh Post - ម្នាក់ ៥ ពាន់​រៀល ​ដើម្បី​អនា​គត​សិល្បៈ​ល្ខោន​ស្បែក​ធំ​របស់​ខ្មែរ​




ម្នាក់ ៥ ពាន់​រៀល ​ដើម្បី​អនា​គត​សិល្បៈ​ល្ខោន​ស្បែក​ធំ​របស់​ខ្មែរ​

Content image - Phnom Penh Post
ការ​សម្ដែង​ល្ខោន​ស្បែក​ធំជាផ្នែក​នៃសាច់​រឿងរាម​កេរ្តិ៍​ទាំងមូល​ដែល​មានរយៈ​ពេល​និទាន ២០ ម៉ោង។ ហុង មិនា

ម្នាក់ ៥ ពាន់​រៀល ​ដើម្បី​អនា​គត​សិល្បៈ​ល្ខោន​ស្បែក​ធំ​របស់​ខ្មែរ​

ភ្នំពេញ: យុទ្ធ​នាការ ៥០០០ រៀល​ដើម្បី​ទ្រទ្រង់​ជីវិត​ល្ខោន​ស្បែក​ធំ​បាន​ចាប់ផ្តើម​ទទួល​ការ​បរិច្ចាគ​កាលពី​សប្តាហ៍​មុនក្នុង​រយៈ​ពេល ៣ ខែ។

យុទ្ធ​នាការ​នេះគឺ​ផ្តួចផ្តើម​ធ្វើឡើង​សម្រាប់ការ​ផ្តត់ផ្គង់​ដល់​សមាគម​សុវណ្ណា​ភូមិ​ ជា​សមាគម​មួយ​គ្រប់គ្រង​ដោយ​លោកគ្រូ​ ម៉ាន់ កុសល ដែល​បម្រុង​នឹង​បិទ​កាលពី​ចុង​ខែ​ឧសភា។

តំណាង​ក្រុម «ភ្លើង​គប់» កញ្ញា រិទ្ធី លំអរ​ពេជ្រ​ ថ្លែងថា៖ «ការពិត​ទៅពួក​យើង​ធ្វើ​មូលនិធិ​យុទ្ធ​នាការ ៥០០០ រៀលនេះ​ឡើង​ដើម្បី​ប​ញ្ជ្រាប​ព័ត៌មាន​ជា​លក្ខណៈ​ស្តង់ដា​រអន្តរជាតិ​ដើម្បី​អ្នក​ចង់​បរិច្ចាគ​ទូទៅ។ ដូច្នេះ ​ក្រុម​ភ្លើង​គប់បាន​សហការ​ជាមួយ​អង្គការ​សិល្បៈ​ប្រទេស​សិង្ហ​បុរី​ដើម្បី​ជួយ​ប្រមូល​ការបរិច្ចាគ​ពីខាង​ក្រៅ​ប្រទេស»។

កញ្ញា​បន្តថា៖ «គំនិត​នៃ​យុទ្ធនាការ ៥០០០ រៀលគឺ​ពួក​យើង​មិនត្រូវ​ការ​ជំនួយ​អ្វី​ច្រើន​ទេ គឺ​គ្រាន់តែ ៥០០០ រៀលពី​ប្រជា​ពលរដ្ឋ​​ដែល​អាចធ្វើ​ឲ្យ​យុទ្ធនាការ​នេះ​ជោគ​ជ័យ។ ផ្ទុយ​ទៅវិញ​បើ​យើងចាំ​ការ​បរិច្ចាគ​ចំនួន​ច្រើន​គឺមិន​ងាយ​នោះទេ។ បើ​ម្នាក់​ចំណាយ​តែ ៥០០០ រៀល​តាមរយៈ​គេហ​ទំព័រ​នេះ ឬធុង​កូន​ជ្រូក​សន្សំ​នៅ​តាម​ហាង យុទ្ធនាការ ៥០០០ រៀលនេះ​នឹងអាច​ជោគជ័យ​បាន​ដើម្បី​លើក​ស្ទួយ​កម្លាំង​ចិត្ត​សិល្បករ​ទាំងមូល»។

ការ​បរិច្ចាគ​នេះ​អាចធ្វើ​បាន​តាម​ទម្រង់​ខុសៗ​គ្នា។ ការបរិច្ចាគ​ពី ៥ ដុល្លារ​ឡើង​ទៅ សប្បុរសជន​អាច​ទទួល​បាន​កាដូ​ថ្លែង​អំណរ​គុណ​ជា រូបគំនូរ អាវយឺត​ដែលមាន​រូប​ស្បែក​ធំ និង​ស្បែក​តូច ប៉ុន្តែវា​មិនមែន​ជាការ​លក់​ធ្វើអា​ជីវកម្ម​នោះ​ទេ។

កញ្ញា រិទ្ធី លំអរ​ពេជ្រ ទទូច​ថា៖ «ពេល​ខ្លះ​យើង​គិតថា​ថវិកា​តិចតួច​មិនអាច​ផ្លាស់ប្តូរ​បាន តែ​ពួកយើង​ត្រូវតែ​មាន​ជំនឿ​ថា​ថវិកា​ប៉ុនណាក៏​ជាការ​ចូលរួម​ចំណែក​ដើម្បី​ផ្លាស់​ប្តូរជីវិត​នៃការ​ដ​ង្ហោយ​រក​ជំនួយ​របស់​សមាគម​ល្ខោន​ស្បែក​ធំក្នុង​សង្គម​បាន។ បើ​ជនជាតិ​ខ្មែរ​មិន​អើពើ​លើ​ការបាត់​បង់​នេះ វា​ជាការ​សោក​ស្តាយ​មួយ​យ៉ាងធំ​សម្រាប់​ស្ថាប័ន​សិល្បៈ​ខ្មែរ​ដែល​បាន​បើក​ជាច្រើន​ឆ្នាំ​មក​នេះ»។

Content image - Phnom Penh Post
លោក កុសល កញ្ញា រិទ្ធី លំអរ​ពេជ្រ និង​ រិទ្ធី លំអរ​កេសរ​​។ Athena Zelandonii

លើស​ពីនេះ ក្រុម​ការងារ​កញ្ញា​ក៏បាន​ទាក់​ទង​ទៅ​ក្រុមហ៊ុន​ទូរស័ព្ទដៃ​ផ្សេងៗ​ដើម្បី​ប​ង្កើន​ការងាយ​ស្រួល​ដល់​ពួកគាត់​ដែល​ចង់​ធ្វើការ​បរិច្ចាគ​តាម​រយៈ Smart, Wing, TrueMoney និង​មធ្យោបាយ​ផ្សេង​ទៀត។

បន្ទាប់ពី​គម្រោង​រៃអង្គាស​នេះ កញ្ញា​បន្ត​ថា៖ «ពួកយើង​មាន​គម្រោង​សម្តែង​ល្ខោន​ស្បែក​ដើម្បី​យកប្រាក់​កម្រៃ និង​កូនជ្រូក​សន្សំ​ជាធុង​បរិច្ចាគ​នៅ​ទីតាំង​ដៃគូ​ដែល​ពួកយើង​កំពុង​ទាក់ទង​តាម​ហាង​កាហ្វេ ឬ​ភោ​ជនីយដា្ឋន ហើយ​ពួក​យើង​នឹង​សាក​ល្បង​ក្នុង​រយៈពេល​បីខែ​ពី ៥០ ទៅ ១០០ កូន​ជ្រូក​ដើម្បី​ដាក់​ថវិកា។

សម្រាប់​ព្រឹទ្ធាចារ្យ និង​សិល្បករ ល្ខោន​ស្បែក​ធំ ​ពួកគាត់​រំពឹងថា​គម្រោង​នេះនឹង​ទទួល​ផល​វិជ្ជមាន​ អាច​ចាប់ផ្តើម​អនាគត​មរតក​សិល្បៈ​របស់​ពួកគាត់​ជាថ្មី​ ខណៈ​មុននោះ​ពួក​គាត់​ធ្លាប់​បានបាក់​ទឹកចិត្ត​រហូតដល់​ចង់​បិទ​សមាគម​ចោល។

កញ្ញា រិទ្ធី លំអរ​ពេជ្រ បានអំ​ពាវនាវ​ថា៖ «ខ្ញុំ​គិតថា​ បើកូន​ខ្មែរ​ទាំងអស់​ចូលរួម​ហើយ​ចែករំលែក​ថរិកា​របស់​ខ្លូន​ពីហោ​ប៉ៅ​ត្រឹមតែ ៥០០០ រៀល គម្រោង​នឹង​ជោគជ័យ ប៉ុន្តែបើ​គិតថា​វាអត់​ប្រយោជន៍​ ហើយ​គ្មាន​សកម្មភាព​ទៅលើ​ការជួយ ទោះ​បីជា​គម្រោង​ហ្នឹងធ្វើ​ដល់​រយៈពេល​មួយឆ្នាំ​ទៀត ឬ​ពីរឆ្នាំ​ដោយ​មិន​ខ្វាយ​ខ្វល់​ទេ គម្រោង​នឹងមិន​ជោគ​ជ័យ។ ទោះ​ជាយ៉ាង​ណា ខ្ញុំជឿថា បើ​ប្រជាជន​គ្រប់រូប​បានចូល​រួម និង​ចែករំលែក គឺអាច​ទៅរួច​ដើម្បី​ជីវិត​ល្ខោន​ស្បែក​ធំ និង​សិល្បករ»៕

សម្រាប់​បរិច្ចាគ៖ https://www.indiegogo.com/projects/5kriels-for-the-life-of-cambodian-sha...

អត្ថបទគួរចាប់អារម្មណ៍