.jpg)
យន្តហោះប្រណីត ដែលមានមិនលើសពី ១៣កៅអី ផ្ដល់ភាពឯកជនដល់អ្នកដំណើរ។ រូបថត AFP
ក្រុងម៉ូស្គូ៖ សម្រាប់ពលរដ្ឋរុស្ស៊ីទ្រព្យស្ដុក ធ្លាប់ចំណាយវិស្សមកាលរដូវក្ដៅទៅកាន់រីសតមេឌីទែរណេ ឬផ្ទះលម្ហែក្នុងទីក្រុងឡុងដ៍ ការរឹតបន្ដឹងការរីករាលដាលវីរុសកូរ៉ូណា ដែលបានបិទព្រំដែន និងជើងហោះហើរបានបង្កការភ្ញាក់ផ្អើលនូវក្ដីសុបិនពីចម្ងាយ។
ប៉ុន្ដែសេដ្ឋីនៅរុស្ស៊ីជាច្រើន ដែលកាន់លិខិតឆ្លងដែនទី២ ឬជាពលរដ្ឋមានការអនុញ្ញាតឲ្យស្នាក់នៅក្រៅប្រទេសបាននឹកឃើញវិធីសាស្ដ្រប៉ិនប្រសប់ក្នុងការគេចចេញពីវិធានការទប់ទល់វីរុស ដើម្បីទៅកាន់ផ្ទះទី២ ក្នុងទីក្រុងឡុងដ៍ ប្រទេសស៊ីប ម៉ូណាកូ ឬក្រុងណៃ តាមរយៈយន្ដហោះឯកជនយ៉ាងហ៊ឺហា។
ការហោះហើរលក្ខណៈឯកជនពីអាកាសយានដ្ឋានក្រុងម៉ូស្គូ បានកើនឡើងលើសទ្វេដងចន្លោះខែមេសា និងពាក់កណ្ដាលខែមិថុនា។ នេះបើ-យោងតាមសារព័ត៌មានជំនួញ RBK បានរាយការណ៍កាលពីចុងខែមិថុនា ដោយដកស្រង់ប្រភពពីអាកាសយានដ្ឋាន ២ ក្នុងទីក្រុងម៉ូស្គូ។
RBK រាយការណ៍ថា ការកើនឡើងពី ៤០០ ទៅ ៨៥០ ជើងហោះហើរឯកជនក្នុង ១ ខែ ជាចំនួនការរៀបចំកញ្ចប់ហោះដ៏ច្រើនមួយទៅក្រៅប្រទេស។
នៅទីភ្នាក់ងារជួលយន្ដហោះឯកជនក្រុងម៉ូស្គូ Leading Charter Technologies (LTC) លោកនាយក Lev Shalayev បានគ្រងឈុតយីហោថ្លៃ Gucci ពីក្បាលដល់ចុងជើងមានការសប្បាយរីករាយចំពោះកំណើននៃការហោះហើរលើសពី «៥០ ជើង» ក្នុង ១ ថ្ងៃនេះ។
លោកបានប្រាប់ AFP ថា៖ «មនុស្សជាច្រើន ដែលធ្លាប់ហោះហើរលំដាប់កៅអីអ្នកជំនួញ ពេលនេះក៏ក្លាយជាភ្ញៀវហោះហើរបែបឯកជនដែរ»។
លោកនិយាយថា គោលដៅពេញនិយមនានា រួមមានតំបន់ទេសចរណ៍បែបប្រណីត ដូចជាទីក្រុងនីស ម៉ាឡាកា អាលីខានតែ និងបាសេឡូណា ជាដើម។ អតិថិជនជាច្រើនទៀតនាំគ្នាសម្រុកទៅប្រទេសស៊ីប ជាទីសំណព្វចិត្ដសម្រាប់ពលរដ្ឋរុស្ស៊ីលើផ្នែកជំនួញ និងការលម្ហែ។
សេដ្ឋីរុស្ស៊ីបានងាកមកជិះឧទ្ធម្ភាគចក្រក្នុងដំណើរផ្លូវជិត។ រូបថត AFP
លោកបានឲ្យដឹងទៀតថា៖ «ពេលនេះ អ្នកដំណើររបស់យើងភាគច្រើនកំពុងតែទៅវិស្សមកាល»។
លោកអះអាងថា ក្នុងយន្ដហោះដែលមានកន្លែងអង្គុយធំៗមិនលើស ១៣ កៅអី មានតម្លៃសំបុត្រហោះហើរអាចចាប់ផ្ដើមពី ៤ ៥៧៥ ដុល្លារ។ អារម្មណ៍ភ័យខ្លាចឆ្លងមេរោគក៏បានកើនឡើងខ្លាំងចំពោះការធ្វើដំណើរជិតៗតាមអាកាស។
សូម្បីតែចម្ងាយប្រមាណ ២០ គីឡូម៉ែត្រភាគខាងជើងទីក្រុងម៉ូស្គូ ក្រុមហ៊ុន Heli Tech បានទទួលស្វាគមន៍ភ្ញៀវក្នុងសាលដ៏ធំទូលាយក្បែរអគារផ្ទុកឧទ្ធម្ភាគចក្រ។
នាយក វីកទ័រ ម៉ាទីនូវ បាននិយាយថា ការលក់បានកើនឡើង ៣០ ភាគរយ ចាប់តាំងពីបើកដំណើរការដើមឆ្នាំ។
លោកនិយាយថា៖ «អតិថិជនបានគិតដល់ឧទ្ធម្ភាគចក្រជាមធ្យោបាយធ្វើដំណើរដ៏គួរឲ្យទុកចិត្ដ ដែលអាចគេចផុតពីហានិភ័យកូវីដ ១៩»។
ឧទ្ធម្ភាគចក្រមានប្រជាប្រិយភាពរួចជាស្រេចក្នុងចំណោមអ្នកជំនួញដែលអន្ទះសាចង់គេចពីបញ្ហាចរាចរណ៍កកស្ទះ អំឡុងពេលធ្វើដំណើរនាពេលព្រឹកព្រលឹមម្ដងៗ។ ប៉ុន្ដែអតិថិជនថ្មីៗក៏កំពុងតែសម្លឹងរកមធ្យោបាយធ្វើដំណើរសុវត្ថិភាពនេះផងដែរ។
ក្រុមហ៊ុនបានផ្ដល់ជម្រើសយានដឹកជញ្ជូនផ្លូវអាកាសក្នុងតម្លៃពី ៥ ម៉ឺន ទៅ ១,២ លានដុល្លារផងដែរ៕ AFP/HR
