The Phnom Penh Post Search

Search form




Logo of Phnom Penh Post newspaper Phnom Penh Post - យាង វណ្ឌី ចាប់ចិត្ត​នឹង​ការស្រាវជ្រាវ​ភាពយន្ត​ខ្មែរ ផ្ដើម​ចេញ​ពី​ការនិទាន​របស់​ម្តាយ

យាង វណ្ឌី ចាប់ចិត្ត​នឹង​ការស្រាវជ្រាវ​ភាពយន្ត​ខ្មែរ ផ្ដើម​ចេញ​ពី​ការនិទាន​របស់​ម្តាយ

Content image - Phnom Penh Post
លោក យាង វណ្ឌី ប្រធាន​ក្រុម​ព្រះសូរិយា​។ អ្នកស្រី ឌី សាវ៉េត ក្នុង​ខ្សែ​ភាពយន្ត​រឿង ពស់​កេងកង​ដ៏ល្បីល្បាញ​ពី​សម័យមុន​។ រូបថត ហ្វេសប៊ុក

យាង វណ្ឌី ចាប់ចិត្ត​នឹង​ការស្រាវជ្រាវ​ភាពយន្ត​ខ្មែរ ផ្ដើម​ចេញ​ពី​ការនិទាន​របស់​ម្តាយ

ភ្នំពេញៈ ជា​អ្នកសិក្សា​ស្រាវជ្រាវ និង​បាន​រើកកាយ​មក​វិញ​នូវ​ខ្សែភាពយន្ត​ខ្មែរ​ជាច្រើន​ដែល​បាន​បាត់បង់​ក្នុង​អតីតកាល​ពេល​នេះ​ក្រុម​ព្រះសូរិយា​បាន​ដំណើរការ​ការងារ​របស់​ខ្លួន​ប្រមាណ​ជាង ១០ ​ឆ្នាំ​រួច​មក​ហើយ ដោយ​ទទួល​បាន​សមិទ្ធផល​ជាច្រើន​ដូចជា​ការរកឃើញ​នូវ​រូបថត​សិល្បករ ប្រវត្តិរូប​សិល្បករ​ខ្មែរ ខ្សែ​ភាពយន្ត​ខ្មែរ​មួយ​ចំនួន និង​បាន​រៀបចំ​កម្មវិធី​មហោស្រព​ភាពយន្ត​ជាច្រើន​លើក​នៅ​តាម​បណ្តា​រាជធានី-ខេត្ត​នៅ​ទូទាំង​ប្រទេស​។

មុន​នឹង​ឈាន​ជើង​ចូល​ប្រឡូក​ក្នុង​ការស្រាវជ្រាវ​នូវ​ភាពយន្ត​ខ្មែរ​នាសម័យ​មុន​លោក យាង វណ្ឌី ប្រធាន​ក្រុម​ព្រះសូរិយា​បាន​បញ្ជាក់​ប្រាប់​ឲ្យ ភ្នំពេញ ប៉ុស្តិ៍ ដឹងថា​លោក​បាន​ចាប់​អារម្មណ៍​រឿង​នេះ​តាមរយៈ​ការនិទាន​របស់​ម្តាយ​លោក​កាលពី​លោក​នៅ​កុមារភាព​។

លោក​បាន​តំណាល​ថា​៖ «​កាលពី​ខ្ញុំ​នៅ​ក្មេង​ក្រោយ​បែក​ពី​របប​ខ្មែរក្រហម​គ្រួសារ​ខ្ញុំ​អត់​មាន​អី​មើល​ទេ​អត់​មាន​ទូរទស្សន៍​អី​ទេ អ៊ីចឹង​ឲ្យ​តែ​ពេល​ញាំ​បាយ​ជុំ​គ្នា​ពេល​ល្ងាច​គឺ​ម៉ាក់​គាត់​តែងតែ​និយាយ​រឿង​កាលពី​គាត់​នៅ​ក្មេង​ឲ្យ​ស្តាប់ ហើយ​រឿង​គាត់​លួច​ទៅ​មើល​កុន​ជាមួយ​បងៗ​ម៉ាក់​ចូលចិត្ត​សរសើរ​ថា តួកុន ឌី សាវ៉េត ស្អាត​ណាស់​។ ម៉ាក់​ថា​គាត់​ជា​តារា​ទឹកភ្នែក​ពូកែ​យំ ហើយ​តួកាច​ឆ្នាសឆ្នើម​ហ្នឹង​តួ សាក់ ស៊ីស្បោង​។ កុន​ពី​ដើម​ល្អ​មើល​ណាស់​ពេល​មើល​ម្តងៗ​ហាក់បី​ដូចជា​យើង​កំពុង​ជួប​ផ្ទាល់​​អ៊ីចឹង ធ្វើឲ្យ​គាត់​ចងចាំ​ពួកគាត់​ក្នុង​ហ្នឹង​»​។

លោក​បាន​រៀបរាប់​ទៀត​ថា​៖ «​នៅ​អំឡុង​ឆ្នាំ​ ១៩៧០ ពេល​ម្ដាយ​ខ្ញុំ​មាន​វ័យ​ប្រមាណ ៨ ​ឆ្នាំ​ឲ្យ​តែ​មាន​ខ្សែភាពយន្ត​ខ្មែរ​ថ្មី​ចេញ​បញ្ចាំង​ម្តងៗ គាត់​តែងតែ​ទៅ​លួច​មើល​ជាមួយ​បងៗ ដោយសារ​តែ​ពេល​នោះ​គាត់​នៅ​ក្មេង​មាន​មាឌតូច គាត់​តែងតែ​ប្រជ្រៀត​ខ្លួន និង​ត្បុល​ខ្លួន​បាន​ចូល​ទៅ​ក្នុង​រោងកុន​ជានិច្ច​ដោយ​មិន​ចាំបាច់​ទិញ​សំបុត្រ​នោះ​ឡើយ​»​។

លោក យាង វណ្ឌី បាន​បន្ត​ថា​៖ «​ពេល​នោះ​ម៉ាក់ប៉ា​គាត់​មិន​អនុញ្ញាត​ឲ្យ​កូន​ទៅ​មើល​កុន​ទេ​តែ​ម៉ាក់​នៅ​តែ​ទៅ​លួច​មើល​ព្រោះ​គាត់​ស្រឡាញ់​ចូលចិត្ត​កុន​ខ្មែរ ប៉ុន្តែ​ពេល​ខ្លះ​ចេញ​ពី​មើល​កុន​យប់​ពេក​មក​ដល់​ផ្ទះ​ក៏​ត្រូវ​យាយ​តា​វាយ​ក៏​មាន​តែ​ម៉ាក់​នៅ​តែ​ឆ្លៀត​ទៅ​លួច​មើល​»​។

ទិដ្ឋភាព​នៅ​រោងកុន​មាន​មនុស្ស​ច្រើន​អ៊ូអរ​ណាស់​ពេល​លក់​សំបុត្រ​ម្តងៗ​។ មនុស្ស​នាំ​គ្នា​ប្រជ្រៀត​គ្នា​ដណ្តើម​ទិញ​សំបុត្រ​។ ជួន​ពេល​ខ្លះ​គឺ​អស់​សំបុត្រ ធ្វើ​ឲ្យ​អ្នក​ខ្លះ​ខកបំណង​មិន​បាន​មើល​រឿង​ថ្មី​ច្រើន​ណាស់​។ រីឯ​នៅ​ខាង​ក្នុង​រោងកុន​គឺ​មាន​របៀប​រៀបរយ​ល្អ​។

យោងតាម​បទពិសោធ​ម្ដាយ​របស់​លោក បើ​យើង​មើល​ដល់​មាន​សាច់រឿង​យំ​គេ​នឹក​ដល់​អ្នកស្រី ឌី សាវ៉េត​។ ចំណែក​តួ​វាយ​គ្នា​គេ​នឹក​ដល់​លោក ជា យុទ្ធថន ហើយ​បើ​តួកាច​គេ​នឹក​ដល់​អ្នកស្រី សាក់ ស៊ីស្បោង​។ សម័យ​នោះ​គឺ​ប្រជាជន​ខ្មែរ​ច្រើន​យក​ស្ទីល​លេង​ខ្លួន​តាម​តារា​កុន​។ សូម្បី​តែ​មក​ដល់​សម័យ​ឥឡូវ​អ្នក​និយម​ចូលចិត្ត​ទស្សនា​កុន​ពី​ដើម​ក៏​នៅ​តែ​លេង​ស្ទីល​តែង​ខ្លួន​តាម​ពួកគាត់​ដដែល​។

នៅពេល​តារា​កុនខ្មែរ​ល្បីៗ​មាន​វត្តមាន​នៅ​តាម​ទី​សាធារណៈ​ម្តងៗ​គឺ​មាន​ប្រជាជន​ចោមរោម​មើល​យ៉ាង​ច្រើន ហាក់​បង្ហាញ​ថា​វិស័យ​សិល្បៈ​កុន​ខ្មែរ​មាន​តម្លៃ​ណាស់ និង​ទទួល​បាន​ការស្រឡាញ់​ចូលចិត្ត​ពី​ប្រជាពលរដ្ឋ​ទូទាំង​ប្រទេស​។

ដោយ​បាន​ស្តាប់​ពី​ការរៀបរាប់​របស់​អ្នក​ម្តាយ​តាំងពី​ខ្លួន​នៅ​ក្មេង យុវជន យាង វណ្ឌី បាន​ចាប់ផ្តើម​ដក់​គំនិត​ជាប់​ខ្សែភាពយន្ត​ខ្មែរ​ពី​ជំនាន់​មុន និង​ចាប់ផ្តើម​ចង់​ដឹង​ថា​កុន​ខែ្មរ​នាសម័យ​នោះ​មាន​ភាពល្បីល្បាញ​អស្ចារ្យ​ប៉ុនណា​?

ជួន​ជា​ចៃដន្យ​នៅ​អំឡុង​ឆ្នាំ ២០១៣ បន្ទាប់ពី​លោក យាង វណ្ឌី បាន​មក​ធ្វើការ​ជា​អ្នក​ក្រឡុក​ស្រា​នៅ​តាម​ភោជនីយដ្ឋាន​នាទី​ក្រុង​ភ្នំពេញ​លោក​ក៏​បាន​ជួប​ជាមួយ​នឹង​សមាជិក​ក្រុម​ព្រះសូរិយា​ដែល​បាន​នាំ​យក​រឿង សព្វសិទ្ធ មក​ចាក់​បញ្ចាំង​។ ពេល​នោះ​លោក​ក៏​បាន​ចូល​ជា​សមាជិក​ក្រុម​ព្រះសូរិយា និង​បាន​ក្លាយ​ជា​ប្រធាន​ក្រុម​ព្រះសូរិយា​រហូត​មក​ដល់​សព្វថ្ងៃ​។

ប្រធាន​ក្រុម​ព្រះសូរិយា​រូប​នេះ​មិន​ត្រឹម​តែ​ធ្វើការ​ស្រាវជ្រាវ​តែ​នៅ​ក្នុង​ស្រុក​ប៉ុណ្ណោះ​ទេ​លោក​ក៏​បាន​បន្ត​ធ្វើការ​រុករក​ឯកសារ​នៅ​បណ្តា​ប្រទេស​ជិតខាង​ផង​ដែរ​។

ទៅ​ថ្ងៃ​អនាគត​ប្រធាន​ក្រុម​ព្រះសូរិយា​រូប​នេះ​មាន​បំណង​ប្រាថ្នា​ចង់​បង្កើត​កន្លែង​មួយ​សមរម្យ ដើម្បី​ថែរក្សា​ទុក​នូវ​ឯកសារ​ដែល​បាន​ស្រាវជ្រាវ​នាពេល​កន្លង​មក​ដូចជា​ហ្វីល​ កាសែត រូបភាព Poster និង​ឯកសារ​មួយ​ចំនួន ធ្វើ​យ៉ាងណា​ឲ្យ​ប្រភព​ឯកសារ​ទាំងអស់​នៅ​មាន​ជីវិត និង​ជា​កន្លែង​សម្រាប់​អ្នក​ចង់​សិក្សា​ស្រាវជ្រាវ​ពី​ខ្សែភាពយន្ត​ខ្មែរ​ផង​ដែរ​៕

អត្ថបទគួរចាប់អារម្មណ៍

  • ជនជាតិ​ភាគតិច និង​សង្គម​ស៊ីវិល​ប្ដឹង​ជំទប់​ឃុំ និង​អភិបាលរង​ខេត្ត ​រឿង​ចេញ​បណ្ណ​សម្គាល់​ដី​ជាន់​លើ​ដី​ព្រៃ

    មណ្ឌលគិរី: ពលរដ្ឋ​សហគមន៍​ជនជាតិ​ដើម​ភាគតិច និង​សង្គម​ស៊ីវិល​ចំនួន ៦ ​នាក់​ បាន​ដាក់​ពាក្យបណ្ដឹង​ចំនួន ២ ​ដាច់​ ដោយឡែក​ពី​គ្នា​ប្ដឹង​មនុស្ស ៤ ​នាក់ ​ទៅ​តុលាការខេត្ត​ក្នុង​នោះ​មាន​ជំទប់​ទី​ ១ ​ឃុំ​ប៊ូស្រា​ម្នាក់ និង​អភិបាលរង​ខេត្តមណ្ឌលគិរី​ម្នាក់​ដោយ​ចោទ​ពាក់ព័ន្ធ​ការចេញ​បណ្ណ​សម្គាល់​ម្ចាស់​ដីធ្លី​ជាន់​លើដី​គម្រប​ព្រៃឈើ និង​បទ​ចោទ​ពាក់ព័ន្ធ​លួច​គាស់​យក​ថ្ម​ធម្មជាតិ​

  • កាណាដា​ពិន័យ VW ១៥០ ​លាន​ដុល្លារ

    ក្រុងតូរ៉ុនតូៈ តុលាការ​ក្នុង​ទីក្រុង​តូរ៉ុនតូ​កាលពី​ថ្ងៃ​ពុធ​បាន​បញ្ជា​ឲ្យ​ក្រុមហ៊ុន Volkswagen (VW) បង់ប្រាក់​ពិន័យ ១៩៦,៥ លាន​ដុល្លារ​កាណាដា (១៥០ ​លាន​ដុល្លារ​អាមេរិក​) បន្ទាប់ពី​ក្រុមហ៊ុន​ផលិត​រថយន្ត​មួយ​នេះ​បាន​សារភាព​កំហុស​ចំពោះ​ការរំលោភច្បាប់​បរិស្ថាន​ក្នុង​រឿងអាស្រូវ​បោក​បន្លំ​ការបញ្ចេញ​កាបូន​។

  • សហជីព​បារាំង​​ព្យាយាម​បន្ត​ការ​តវ៉ា​ប្រឆាំង​ការ​កែ​ទម្រង់​ប្រាក់​សោធននិវត្តន៍​​ ដើម្បី​ដាក់​សម្ពាធ​លើ​រដ្ឋាភិបាល​​

    ក្រុង​ប៉ារីស៖ ក្រុម​សហជីព​បារាំង​កាល​ពី​ថ្ងៃ​ពុធ​ បាន​បន្ត​ធ្វើ​​កូដកម្ម​ជា​ច្រើន​ ដោយ​​មាន​​បំណង​បង្កើន​សម្ពាធ​​​​ទៅ​លើ​រដ្ឋាភិបាល​មុន​នឹង​រដ្ឋាភិបាល​នេះ​ ធ្វើ​ការ​បង្ហាញ​ការ​កែ​ទម្រង់​ប្រាក់​សោធននិវត្តន៍​ចុង​ក្រោយ ​ដែល​បាន​​​ជំរុញ​ឲ្យ​មាន​ការ​តវ៉ា​ពី​បញ្ហា​ការងារ​ធំ​បំផុត​នៅ​បារាំង​ជា​ច្រើន​ទសវត្សរ៍​នោះ​​។ ​

  • លាភ ​រដ្ឋា ​និង ​ផាន់ ​គ្រាន់ ​ប៉ះ​ថៃ​ចំណូល​ថ្មី​

    ភ្នំពេញ៖ ​អ្នក​លេង​កណ្តាប់​ដៃ​របស់​កម្ពុជា​ចំនួន ​២ ​នាក់ គឺ ​លាភ ​រដ្ឋា និង​ ផាន់ ​គ្រាន់​ ​នឹង​​ត្រូវ​បង្ហាញ​ខ្លួន​រួមគ្នា នៅ​​លើ​សង្វៀន​ SEATV នា​រសៀល​ថ្ងៃ​សៅរ៍​ស្អែក​នេះ ​ដោយ​ពួក​គេ​ត្រូវ​ជួប​ជាមួយ​​កីឡាករ​ថៃ​​ចំណូល​ថ្មី​ មិន​ធ្លាប់​មក​ប្រកួត​ក្នុង​សង្វៀន​នៅ​​ប្រទេស ​កម្ពុជា ​នោះ​ទេ​​។