.jpg)
ព្រះសង្ឃ និងពុទ្ធបរិស័ទនៅអារាមគល់ទទឹងធ្វើពិធីបង្ហោះគោម បួងសួងសុំសេចក្ដីសុខ។ រូបថត យូសុះ អាប់ឌុលរ៉ាស់ហ៊ីម
ភ្នំពេញៈ មាឃបូជា ជាពិធីបុណ្យដ៏ធំមួយរបស់ព្រះពុទ្ធសាសនាឲ្យតែដល់ថ្ងៃ ១៥ កើតពេញបូណ៌មី ខែមាឃ ម្ដងៗពុទ្ធសាសនិកតែងតែនាំគ្នាប្រារព្ធពិធីដ៏ធំមួយនេះ។
ជាមួយចំនួនអ្នកកាន់ពុទ្ធសាសនាប្រមាណ ៩៥ ភាគរយនៃប្រជាជនសរុបនៅប្រទេសកម្ពុជាក្នុងចំណោមអារាមជាច្រើន វត្តនិគ្រោធវ័ន ហៅ វត្តគល់ទទឹង បានប្រារព្ធពិធីបុណ្យមាឃបូជាយ៉ាងឱឡារិក រួមមានការរាប់បាត្រព្រះសង្ឃ ៥០០ អង្គ ការដង្ហែមាឃបូជា ពិធីបូជាប្រទីប សមាធិ បង្ហោះប៉េងប៉ោង និងបង្ហោះគោម ដោយមានពុទ្ធបរិស័ទ យុវជន និងយុវតី ចូលរួមយ៉ាងច្រើនកុះករ។
ជាអ្នកខេត្តកំពង់ស្ពឺមកចូលរួមពិធីបុណ្យមាឃបូជានាវត្តគល់ទទឹង យុវតី សៀវ ស៊ូឈីង បានប្រាប់ ភ្នំពេញ ប៉ុស្តិ៍ ថា៖ «ខ្ញុំមកនេះមកជាមួយគ្រួសារ មូលហេតុដែលខ្ញុំមកចូលរួមពិធីបុណ្យថ្ងៃនេះ ពីព្រោះបុណ្យនេះជាបុណ្យប្រពៃណីជាតិយើង ដូចនេះយើងចូលរួមគោរពទំនៀមទម្លាប់ប្រពៃណីខ្មែរយើងតាមបែបពុទ្ធសាសនាណាមួយខ្ញុំស្រលាញ់ព្រះពុទ្ធសាសនា»។
ក្នុងចំណោមអ្នកចូលរួមដ៏កុះករ យុវជន យុវតី ជាច្រើនក៏បានជួយរៀបចំពិធីបុណ្យមាឃបូជាដែរ។ រូបថត យូសុះ អាប់ឌុលរ៉ាស់ហ៊ីម
យុវជន ១ រូបទៀតឈ្មោះ ឡុង សំនៀង ដែលក្នុងដៃកាន់ទង់ព្រះពុទ្ធសាសនា ក៏សង្កេតឃើញថាឆ្នាំនេះយុវជនមានការផុសផុលច្រើនក្នុងការចូលរួមពិធីបុណ្យជាតិសាសនាខ្មែរដោយពីមុនពិធីបុណ្យដូចជាមាឃបូជា និងពិសាខបូជាហាក់ពុំសូវបានទទួលការចាប់អារម្មណ៍ទេពីយុវវ័យទាំងពុំបានដឹងថា បុណ្យនេះមានអត្ថន័យធំធេងតាមសាសនាជាតិ។
យុវជនមកពីរាជធានីភ្នំពេញលោកបានសម្ដែងការយល់ឃើញដែរថា៖ «ឥឡូវយុវជនគាត់ដឹងច្រើន ដោយសារតែមានការបង្រៀនតាមរយៈប្រព័ន្ធសង្គម តាមរយៈព្រះសង្ឃលោកបានបង្រៀនយុវជនច្រើន អាចនិយាយបានថាគាត់យល់ច្រើន អ៊ីចឹងគាត់មានការចូលរួមច្រើន»។
ដើមឡើយពិធីបុណ្យសាសនាបែបនេះត្រូវបានក្មេងជំនាន់ក្រោយយល់ថា ជាឱកាសចូលរួមសម្រាប់តែមនុស្សចាស់ៗ តែយុវសិស្ស ផាន់ កក្កដា មានទស្សនៈថាយុវជនត្រូវតែយល់ដឹងហើយឆ្លៀតចំណាយពេលវេលា ចូលរួមបុណ្យជាតិ និងបុណ្យសាសនា ។
ការប្រារព្ធពិធីបុណ្យមាឃបូជានៅវត្តបានបន្តរហូតដល់រំលងម៉ោង ៨ យប់។ រូបថត យូសុះ អាប់ឌុលរ៉ាស់ហ៊ីម
សិស្សវិទ្យាល័យព្រែកថ្មី វ័យ ១៨ ឆ្នាំដែលបានមកជួយរៀបចំពិធីមាឃបូជា កាលពីថ្ងៃអង្គាររូបនេះឲ្យដឹងទៀតថា៖ «ខ្ញុំមើលឃើញឆ្នាំហ្នឹងច្រើនជាងឆ្នាំមុន ព្រោះអីយុវជននៅម្តុំនេះគាត់យល់ដឹងច្រើន ព្រោះយើងជាសាសនិកជនត្រូវមកបូជាអីអស់ហ្នឹងមិនចាំបាច់តែចាស់ៗទេ។ យើងជាយុវជនក៏មានសិទ្ធិមកធ្វើបុណ្យដែរ ដូចខ្ញុំជាសាសនិក»។
ព្រះតេជគុណ ប៊ុន សំបូរ ដែលបានសាងផ្នួសនៅទឹកដីប្រទេសឥណ្ឌា និងបានមកចូលរួមពិធីបុណ្យមាឃបូជានាថ្ងៃទី ១៩ ខែកុម្ភៈនេះបានមានសង្ឃដីការៀបរាប់អត្ថន័យនៃពិធីបុណ្យមាឃបូជាថា៖ «អត្ថន័យនៃពិធីបុណ្យមាឃបូជាទី ១ គឺជាថ្ងៃដែលព្រះសម្មាសម្ពុទ្ធព្រះបរមគ្រូនៃយើង ព្រះអង្គបានដាក់អាយុសង្ខារមានន័យថា ៣ ខែទៀតព្រះអង្គនឹងចូលបរិនិពាន្វ។ អត្ថន័យទី ២ គឺជាថ្ងៃដែលព្រះសម្មាសម្ពុទ្ធបានប្រកាសនូវឱវាទបាតិមោក្ខដែលជាបេះដូងធម៌កិរិយាមិនធ្វើនូវបាបកិរិយា មិនធ្វើនូវកុសលកិរិយា ជម្រះចិត្តឲ្យល្អផូរផង់ និងជាថ្ងៃប្រកាសបង្កើតសាសនាព្រះពុទ្ធដែលក៏មានព្រឹត្តិការណ៍ដ៏អស្ចារ្យ ១ ទៀតគឺមានការជួបប្រជុំភិក្ខុទាំង ១២៥០ រូបដែលជាការជួបដោយឯកឯង មិនមានការណាត់ទុកទើបបានជាព្រះអង្គកំណត់យកថ្ងៃនេះជាថ្ងៃសំខាន់ក្នុងពុទ្ធសាសនា»។
ព្រះអង្គ ប៊ុន សំបូរ បានស្នើឲ្យយុវជនជាទំពាំងស្នងឫស្សីគួរតែដើរតាម និងបន្តប្រតិបត្តិអំពើរបស់ចាស់ទុំដែលជាមាគ៌ានាំមកនូវសេចក្តីសុខ និងត្រូវចូលរួមគាំទ្រ អភិរក្ស ការពារនូវព្រះពុទ្ធសាសនា ដើម្បីតាំងជាប្រយោជន៍ដល់មនុស្សជាតិ។
ព្រះតេជគុណមានសង្ឃដីកាថា៖ «កាលបើយើងនាំគ្នាខ្វះសីលទាន ខ្វះសទ្ធា ខ្វះការជឿជាក់គោរពប្រតិបត្តិ ព្រះពុទ្ធសាសនាក៏រលំរលាយតាមហ្នឹងដែរ។ យ៉ាងណាពុទ្ធបរិស័ទនាំគ្នាគោរពបានមាំមួន ព្រះពុទ្ធសាសនាក៏នឹងរីកចម្រើនផងដែរ»៕
ទិដ្ឋភាពបុណ្យមាឃបូជានៅវត្តគល់ទទឹងដែលល្បីប្រណិប័តន៍វិន័យបានល្អ។ រូបថត យូសុះ អាប់ឌុលរ៉ាស់ហ៊ីម
វីដេអូ៖
