.jpg)
ថវិកា ១ ផ្នែកបានពីការលក់កែវ នឹងត្រូវបរិច្ចាគជូនក្រុមសិល្បករសិល្បការិនីល្ខោន ដើម្បីទ្រទ្រង់ការសម្ដែង។ រូបថត សហការី
ភ្នំពេញ៖ គំនិតគិតគូរបរិស្ថាន ដប និងកែវទឹកឫស្សី មិនត្រឹមតែជួយកាត់បន្ថយសំរាមប្លាស្ទិកប្រចាំថ្ងៃប៉ុណ្ណោះទេ។ រចនាប័ទ្មសិល្បៈខ្មែរជារូបឆ្លាក់ល្ខោនខោល ល្ខោនបាសាក់ យ័ន្ត និងសំណេរឈ្មោះ រឹតតែបន្ថែមសោភណភាពដល់ផលិតផលពីធម្មជាតិប្រកបដោយការទទួលខុសត្រូវលើបរិស្ថាន និងទាក់ចិត្តយុវវ័យឲ្យជាវ ដប និងកែវឫស្សីរបស់ Organic Lifestyle។
លោក ងឺ សុវណ្ណារិទ្ធ ស្ថាបនិក និងអ្នកចាត់ការទូទៅហាង Organic Lifestyle បានសម្រេចចិត្តបើកហាងលក់សម្ភារប្រើប្រាស់ប្រចាំថ្ងៃ ផលិតចេញពីឫស្សី ដើម្បីចូលរួមទប់ស្កាត់ការប្រើប្រាស់ប្លាស្ទិកក្នុងជីវិតប្រចាំថ្ងៃ និងចូលរួមការពារបរិស្ថាន។
ម្ចាស់ហាងលក់ផលិតផលគិតគូរដល់បរិស្ថានរូបនេះបានលើកឡើងថា៖ «ហាងរបស់យើងមានអាយុកាលនៅក្មេងខ្ចីណាស់ ព្រោះយើងទើបតែបើកបាន ១ ឆ្នាំកន្លះប៉ុណ្ណោះ បើគិតពីថ្ងៃបើកដំបូងនៅខែតុលា ឆ្នាំ ២០១៩ ហើយផលិតផលដំបូងរបស់យើងគឺ ទុយោស្មៅ បន្ទាប់មកទើបយើងមានផលិតសម្ភារប្រើប្រាស់បែបបរិស្ថានផ្សេងៗទៀត»។
ក្នុងដំណើរការជាង ១ ឆ្នាំនេះ ក្រុមការងាររបស់ សុវណ្ណារិទ្ធ បានផលិតសម្ភារប្រើប្រាស់ផ្សេងៗទៀតដែលគ្មានសារធាតុប្លាស្ទិក ដោយផលិតពីឫស្សីដូចជា កែវទឹក ដបទឹក សម ស្លាបព្រា ចង្កឹះ ច្រាសដុសធ្មេញ សាប៊ូដុសខ្លួនសរីរាង្គ ទុយោឫស្សី និងទុយោផលិតពីអង្ករ។
ក្នុងចំណោមផលិតផលទាំងនោះ ដប និងកែវទឹកឫស្សី ទទួលបានចំណាប់អារម្មណ៍គួរឲ្យកត់សម្គាល់ ដោយមានការឆ្លាក់បន្ថែមនូវឈ្មោះ អក្សរ ពាក្យស្លោក និងរូបភាពផ្សេងៗ ដូចជា រូបយ័ន្ត តុក្តតា រូបមនុស្ស។
ដើម្បីផ្សារភ្ជាប់ផលិតផលពីធម្មជាតិទៅនឹងកេរដំណែលសិល្បៈខ្មែរ លោកបាននឹកឃើញឆ្លាក់រូបល្ខោនខោល ល្ខោនបាសាក់ ជាអត្តសញ្ញាណខ្មែរនៅកែវទឹក និងដបទឹកឫស្សី ទាំងនោះក្នុងគោលបំណងចូលរួមលើកតម្កើងវប្បធម៌បុរាណខ្មែរពីដូនតា។
ដបទឹកឫស្សីដែលអាចរក្សាសីតុណ្ហភាព និងកែវរូបល្ខោនបាសាក់។ រូបថត សហការី
ការច្នៃប្រឌិតថ្មីនេះ ក៏រួមចំណែកលើកទឹកចិត្តដល់អតិថិជនអ្នកស្នេហាបរិស្ថាន និងសិល្បៈ ទទួលបាននូវរបស់ប្រើប្រាស់មានលក្ខណៈផ្ទាល់ខ្លួន និងភាពលេចធ្លោប្លែកពីគេ។
លោកបាននិយាយថា៖ «ការយកតួអង្គល្ខោនខោល ឬល្ខោនបាសាក់មកកែច្នៃ ឆ្លាក់លើដបទឹកនេះ ដោយសារយើងចង់ឲ្យប្រជាជនបានស្គាល់កាន់តែច្រើនថែមទៀត ពីកេរដំណែល ដែលដូនតាយើងបានបន្សល់ទុកមក ដើម្បីក្រើនរំឭកឲ្យប្រជាជនចូលរួមថែរក្សាមរតកជាតិ ព្រោះល្ខោនខោល ជាសិល្បៈល្ខោនមួយមានកំណើតចំណាស់ជាងគេនៅកម្ពុជា»។
កែវឫស្សី ចំណុះ ៤៥០ មិល្លីលីត្រ មិនមានឆ្លាក់ឈ្មោះ មានតម្លៃ ១៣ ដុល្លារ និងមានឆ្លាក់ឈ្មោះតម្លៃ ១៦ ដុល្លារ។ ដបទឹកឫស្សី ចំណុះ ៥០០ មិល្លីលីត្រ អត់មានឈ្មោះ តម្លៃ ១៦ ដុល្លារ និងមានឆ្លាក់ឈ្មោះ តម្លៃ ១៩ ដុល្លារ។ ដបទឹករូបយ័ន្ត ចំណុះ ៥០០ មិល្លីលីត្រ អាចរក្សាសីតុណ្ហភាពបាន ២៤ ម៉ោង តម្លៃ ១៩ ដុល្លារ។
តម្លៃកែវទឹកឫស្សីរូបល្ខោនខោលមានតម្លៃ ៤,៩ ដុល្លារ មានបន្ថែមទុយោឫស្សីមួយ។
ជាមួយឆន្ទៈចូលរួម ថែរក្សាសិល្បៈដូនតាមួយនេះ ម្ចាស់ហាង Organic Lifestyle លោក សុវណ្ណារិទ្ធ ក៏លៃលកថវិកាមួយចំនួន ដែលបានពីការលក់ដបទឹករូបល្ខោនខោល និងល្ខោនបាសាក់ ទៅបរិច្ចាគជូនក្រុមសិល្បករសិល្បការិនីលោ្ខន ដើម្បីទ្រទ្រង់ការសម្ដែង។
ក្នុងនោះថវិកា ចំនួន ០,៥ ដុល្លារពីការលក់កែវទឹកឫស្សីរូបល្ខោនខោលនីមួយៗនឹងត្រូវបរិច្ចាគសម្រាប់ការសម្ដែងល្ខោនខោលនាចុងឆ្នាំនេះ។
អតិថិជនក៏អាចកុម្ម៉ង់ឆ្លាក់ឈ្មោះរបស់ខ្លួននៅលើកែវ និងដបឫស្សី។ រូបថត សហការី
លោក វណ្ណារិទ្ធ បានរៀបរាប់ពីការឆ្លាក់រូបនៅលើដបទឹកថា៖ «យើងចំណាយពេលយូរបន្តិចក្នុងការផលិតរូបទាំងនេះ ជាក់ស្តែងដូចរូបតួអង្គហនុមាន នៃល្ខោនខោលនេះ យើងត្រូវចំណាយពេលប្រហែល ២ អាទិត្យ ក្នុងការជ្រើសរើសយកតួអង្គ និងសិក្សាទៅលើមកុដ ហើយធ្វើការរចនាឲ្យប្រាកដថាជាបែបបទខ្មែរសុទ្ធសាធ តែមានលក្ខណៈបែបទំនើប»។
លោកបានឲ្យដឹងទៀតថា៖ «ក្រោយពីការរចនានៅលើកុំព្យូទ័រ យើងក៏ត្រូវមើលបន្ថែមនៅពេលឆ្លាក់ចេញជារូបរាងពិតនៅលើដបទឹកជាក់ស្តែង និងខាត់កែខៃវាបន្ថែមទៀត ឲ្យមើលទៅមានរូបរាងស័ក្តិសម និងមានសភាពស្រស់ស្អាត»។
ដ្បិតហាង Organic Lifestyle មានវ័យក្មេងខ្ចីក្នុងអាជីវកម្ម តែមានសម្ទុះការគាំទ្រខ្លាំងពីសំណាក់អតិថិជន ជាពិសេសគឹ ដបទឹក និងកែវទឹកឫស្សី រូបល្ខោនខោលនេះតែម្តង។
ម្ចាស់ហាងផលិតផលគិតគូរបរិស្ថានរូបនេះ បានបន្តថា៖ «មនុស្សសឹងតែគ្រប់វ័យ ធ្វើការកុម៉្មង់ និងទិញដបទឹករូបសិល្បៈខ្មែរនេះ ហើយអតិថិជន ១ ភាគធំ គឺជាយុវវ័យ»។
លោក វណ្ណារិទ្ធ បានសម្ដែងចំណាប់អារម្មណ៍ទៀតថា៖ «យើងរីករាយខ្លាំងណាស់ នៅពេលឃើញប្រជាជនខ្មែរ ជាពិសេសយុវជនជំនាន់ក្រោយយ៉ាងច្រើនដូចនេះ មានក្តីស្រឡាញ់ និងការគាំទ្រចំពោះផលិតផលមានរូបល្ខោនខ្មែរមួយនេះ»។
ព័ត៌មានបន្ថែម សូមចូលទៅកាន់ហ្វេសប៊ុកផេច @ Organic Lifestyle ជីវភាពបែបធម្មជាតិ ឬទាក់ទងទៅលេខទូរស័ព្ទ ០១៥ ២៥៣ ២៥៣៕
