The Phnom Penh Post Search

Search form




Logo of Phnom Penh Post newspaper Phnom Penh Post - យុវជន​ជំនាន់​ថ្មី​លាត​ត្រដាង​បញ្ហា​វិបត្ដិ​ផ្លូវ​ចិត្ដ​​​ត​ជំនាន់​ពី​ឪពុក​ម្ដាយ​ហែល​ឆ្លង​​​​សង្គ្រាម​ស៊ីវិល លើ​សៀវភៅ ​២៤៣ ​ទំព័រ




យុវជន​ជំនាន់​ថ្មី​លាត​ត្រដាង​បញ្ហា​វិបត្ដិ​ផ្លូវ​ចិត្ដ​​​ត​ជំនាន់​ពី​ឪពុក​ម្ដាយ​ហែល​ឆ្លង​​​​សង្គ្រាម​ស៊ីវិល លើ​សៀវភៅ ​២៤៣ ​ទំព័រ

Content image - Phnom Penh Post
អ្នក​និពន្ធ​សៀវភៅ លោក កៅ សុខម៉ៅ ​បច្ចុប្បន្ន​ជា​មន្ដ្រី​ផ្នែក​ពាណិជ្ជកម្ម​ជាន់​ខ្ពស់​នៅ​នាយក​ដ្ឋាន​ពាណិជ្ជកម្ម​អន្ដរជាតិ​នៃ​ស្ថានទូត​ចក្រ​ភព​អង់គ្លេស​ប្រចាំ​កម្ពុជា​។ រូបថត សហ​ការី

យុវជន​ជំនាន់​ថ្មី​លាត​ត្រដាង​បញ្ហា​វិបត្ដិ​ផ្លូវ​ចិត្ដ​​​ត​ជំនាន់​ពី​ឪពុក​ម្ដាយ​ហែល​ឆ្លង​​​​សង្គ្រាម​ស៊ីវិល លើ​សៀវភៅ ​២៤៣ ​ទំព័រ

ភ្នំពេញ៖ ទិវា​ជ័យជម្នះ​ ៧ មករា ទើប​តែ​បញ្ចប់​ទៅ ប៉ុន្ដែ​មិនមែន​មាន​ន័យ​ថា ស្លាកស្នាម​ខ្មៅ​ងងឹត​ត្រូវ​បាន​រលុប​ស្អាត​អស់​ពី​​ការ​ចងចាំ​របស់​ពលរដ្ឋ​ខ្មែរ​រាប់​លាន​នាក់​នោះ​ទេ​​។

ឥទ្ធិពល​សង្គ្រាម​មិន​ត្រឹមតែ​តាម​​​លង​បន្លាច​​​ផ្លូវ​កាយ ​​និង​ផ្លូវ​ចិត្ដ​ នោះ​ទេ វា​​​ថែម​ទាំង​ជះ​ចំហាយ​ដល់​អ្នក​ជំនាន់​ក្រោយ​​ដូចជា​លោក កៅ សុខម៉ៅ​ ដែល​បាន​សម្រេច​លាត​ត្រដាង​វិបត្ដិ​ផ្លូវ​ចិត្ដ​ត​ជំនាន់​កើត​ឡើង​ក្រោយ​សង្គ្រាម​អំពី​ជីវិត​ខ្លួន​ឯង​​តាមរយៈ​​សៀវភៅ «Black» ហើយ​ក៏​​ជា​សំណេរ​​បាន​ជួយ​សង្គ្រោះ​​​​ជីវិត​លោក​ផង​ដែរ​។

លោក សុខម៉ៅ ជា​បុគ្គលិក​នៅ​ស្ថានទូត​អង់គ្លេស​ប្រចាំ​កម្ពុជា បាន​ប្រាប់​ ភ្នំពេញ​ ប៉ុស្ដិ៍​ ថា​៖ «​ខ្ញុំ​មិន​គិត​ថា មាន​នរណា​អាច​ព្យាបាល​​ជំងឺ​ផ្លូវ​ចិត្ដ​នោះ​ទេ យើង​គ្រាន់​តែ​រៀន​រស់​ជាមួយ​​វា។ នៅ​អាយុ ២១ ​ឆ្នាំ ជំងឺ​ផ្លូវ​ចិត្ដ​ជា​មូលហេតុ​មួយ​នៃ​ជំងឺ​ធ្លាក់​ទឹក​ចិត្ដ និង​ថប់​បារម្ភ​ហើយ​ជំងឺ​ទាំង​នេះ​ធ្វើ​ឱ្យ​​ខ្ញុំ​ក្លាយ​​ជា​មនុស្ស​នា​ពេល​នេះ​»។

លោក​បាន​លើក​ប៊ិច​ឡើង និង​ចាប់​ផ្ដើម​នឹក​ពី​រឿង​អតីត​នូវ​ការ​ចងចាំ​មិន​ល្អ​ ដែល​ទាំង​មាន​ទាំង​ការ​ប្រមាថ និង​ក្ដី​ស្រឡាញ់​ ក៏​ដូច​ជា​បញ្ហា​របស់​ក្មេង​ប្រុស​ម្នាក់​។

លោក​បាន​និយាយ​ថា​៖ «ការ​​សរសេរ​ប្រៀប​ដូច​អ្វី​ដែល​ខ្ញុំ​បាន​​ធ្វើ​ដំណើរ​ទៅ​កុមារភាព ជា​អ្វី​ដែល​ខ្ញុំ​មិន​ធ្លាប់​គិត​ថា ខ្ញុំ​អាច​ឆ្លង​កាត់​បាន​នោះ​ទេ​។ ខ្ញុំ​ហាក់​មាន​អារម្មណ៍​ថា ខ្ញុំ​ឈប់​រត់ និង​ចាប់​ផ្ដើម​ក្រឡេក​មើល​អតីតកាល​។ ទោះ​យ៉ាង​ណា វា​ធ្វើ​ឱ្យ​ខ្ញុំ​ចំណាយ​ពេល​ ២៣ ​ឆ្នាំ ​​ដើម្បី​ឈាន​ដល់​ចំណុច​ទទួល​បាន​ការ​លើក​ទឹកចិត្ដ​»។

សៀវភៅ​អំពី​ការ​ចងចាំ​ ២៤៣​ ​ទំព័រ ​​Black ជា​ចំណង​ជើង​យក​តាម​​​លំនាំ​ឈ្មោះ ដែល​ម្ដាយ​លោក​បាន​ដាក់​ឈ្មោះ​ឱ្យ​ ជា​ទណ្ឌកម្ម​នឹង​ការ​ចាប់​កំណើត​។ ក្នុង​ឆ្នាំ ​១៩៩៤ លោក សុខម៉ៅ បាន​​កើត​ក្នុង​គ្រួសារ​សែស្រឡាយ​​ចិន​ នៅ​ខេត្ដ​រតនគិរី ភាគ​ឦសាន​នៃ​ប្រទេស​កម្ពុជា​។

លោក​ជា​កូន​ប្រុស​របស់​ឪពុក​​ម្ដាយ​រៀបការ​តាំង​ពី​វ័យ​ក្មេង​ និង​ពុះពារ​ក្នុង​ជីវភាព​ក្រីក្រ​។ ឪពុក​ម្ដាយ​តែងតែ​ទុក​រូប​​លោក​នៅ​ជាមួយ​តា​យាយ​ ពេល​ពួក​គេ​ត្រូវ​ប្រកប​របរ​ចិញ្ចឹម​​ជីវិត​នៅ​ជាយ​ម្ខាង​ទៀត​នៃ​ប្រទេស​។ ជីវិត​ សុខម៉ៅ បាន​ឆ្លង​កាត់​ព្យុះ​ភ្លៀង​ឥត​ស្រាកស្រាន្ដ​ទម្រាំ​ទទួល​បាន​អាហារូបករណ៍​សិក្សា​នៅ​បរទេស​ ក្រោម​គំនាប​ដ៏​តឹងរ៊ឹង​របស់​គ្រួសារ និង​បញ្ហា​​សេដ្ឋកិច្ច​។

លោក សុខម៉ៅ ដែល​ជា​មន្ដ្រី​ផ្នែក​ពាណិជ្ជកម្ម​ជាន់​ខ្ពស់​នៅ​នាយកដ្ឋាន​ពាណិជ្ជកម្ម​អន្ដរជាតិ​នៃ​ស្ថានទូត​ចក្រភព​អង់គ្លេស​ប្រចាំ​កម្ពុជា ​បាន​ប្រាប់​​ថា​៖ «​គ្រប់​កំហុស​ដែល​បាន​កើត​ឡើង​ស្មើ​នឹង​រំពាត់​វាត់​លើ​រាង​កាយ​អាក្រាត​ក្រោម​ក្រសែ​ភ្នែក​អ្នក​ដទៃ​ ហើយ​រាល់​ការ​ត​មាត់​ តែងតែ​ទទួល​នូវ​កំផ្លៀង​»។

ពេល​នេះ លោក សុខម៉ៅ អាយុ ២៧ ​ឆ្នាំ បាន​និយាយ​ថា ឪពុក​ម្ដាយ​របស់​លោក​ក៏​មាន​ជោគ​វាសនា​មិន​ខុស​គ្នា​ដែរ​។ ការ​​រស់នៅ​ក្នុង​សម័យ​សង្គ្រាម ជីដូន​​របស់​លោក​បាន​ហាម​ឃាត់​​អ្នក​ម្ដាយ​ទៅ​រៀន​ និង​បង្ខំ​ឱ្យ​ជួយ​រក​លុយ​ផ្គត់ផ្គង់​ជីវភាព​គ្រួសារ​ តាំង​ពី​នៅ​ក្មេង​ខ្ចី​។

Content image - Phnom Penh Post
សៀវភៅ Black រំលេច​រឿងរ៉ាវការ​ចងចាំ និង​វិបត្តិ​​ជំងឺផ្លូវចិត្ដត​ជំនាន់ពីឪពុកម្ដាយ​ទៅ​កូន​។ រូបថត សហ​ការី

លោក​អះអាង​ថា​៖ «​គាត់​ត្រូវ​បាន​បង្ខំ​ឱ្យ​រៀបការ​ទាំង​នៅ​ក្មេង​ និង​​ត្រូវ​បីបាច់​កូន​ដោយ​​​ខ្លួន​ឯង។ សម្ពាធ​ទាំង​​​ផ្លូវ​កាយ និង​ផ្លូវ​ចិត្ដ​បាន​គាប​សង្កត់​លើ​ជំនាន់​របស់​ម្ដាយ​ខ្ញុំ​តាំង​ពី​ក្មេង​វ័យ​។ វា​ក្លាយ​ជា​ដំបៅ​ត​ជំនាន់​ ដែល​ពួក​គេ​មិន​បាន​ដឹង​ខ្លួន​។ ដូច្នេះ ពួក​គេ​បន្ដ​ចិញ្ចឹម និង​ប្រៀនប្រដៅ​កូន​តាម​លំនាំ​តែ​មួយ​»។

លោក​បន្ដ​ថា អំពើ​ហិង្សា​ទាំង​នេះ​បាន​អូស​ទាញ​រូប​លោក​ឱ្យ​ធ្លាក់​ទៅ​ក្នុង​ជំងឺ​ធ្លាក់​ទឹក​ចិត្ដ​តាំង​ពី​វ័យ​ក្មេង និង​ថែម​ទាំង​រុញ​ច្រាន​ទៅ​ក្បែរ​រណ្ដៅ​អត្ដឃាត​។ ខណៈ​ជំងឺ​ផ្លូវ​ចិត្ដ​នៅ​តែ​ជា​ប្រធានបទ​រសើប​ក្នុង​សង្គម​ខ្មែរ និង​មិន​ត្រូវ​បាន​ចាត់​ទុក​ជា​ករណី​ធ្ងន់ធ្ងរ ពលរដ្ឋ​ភាគ​​ច្រើន​បាន​រង​នូវ​បញ្ហា​ផ្លូវ​ចិត្ដ​យ៉ាង​តិច​មួយ​ប្រភេទ​។

លោក សុខម៉ៅ បាន​ដក​ស្រង់​របាយការណ៍​អង្គការ TPO ដែល​បាន​សរសេរ​ថា ពលរដ្ឋ​ខ្មែរ​ប្រមាណ ៤០​ ភាគរយ​ទទួល​រង​នូវ​បញ្ហា​សុខភាព​ផ្លូវ​ចិត្ដ​ និង​វិបត្ដិ​ផ្លូវ​ចិត្ដ​។

លោក​បាន​ប្រាប់​ថា​៖ «វិបត្ដិ​ផ្លូវ​ចិត្ដ​ត​ជំនាន់​នេះ​បាន​ធ្វើ​ឱ្យ​ប៉ះពាល់​ដល់​កុមារ​តាំង​របៀប​ជា​ច្រើន ហើយ​ករណី​មួយ​ចំនួន​ បាន​បង្ក​ឱ្យ​ប៉ះពាល់​​ដល់​សុខភាព​ផ្លូវ​កាយ និង​ផ្លូវ​ចិត្ដ។ ធំធាត់​ក្នុង​គ្រួសារ​ដែល​ប្រើ​ច្បាប់​វិន័យ​តឹងរ៉ឹង កូន​ៗ​អាច​ក្លាយ​ជា​មនុស្ស​កោងកាច ឬ​ស្ងប់ស្ងាត់​»។

យុវជន​រូប​នេះ​បាន​បន្ទោស​លើ​​សង្គ្រាម​ស៊ីវិល ដែល​បាន​ជះ​ឥទ្ធិពល​អាក្រក់​ដល់​ឪពុក​ម្ដាយ​ដោយសារ​មនុស្ស​ជា​ច្រើន​មាន​ជំងឺ​បាក់​ស្បាត​ ព្រមទាំង​ប៉ះពាល់​ដល់​ការ​អប់រំ និង​សេដ្ឋកិច្ច​គ្រួសារ​ថែម​ទៀត​។

លោក​អះអាង​ថា​៖ «​ខ្ញុំ​គិត​ថា បើ​គ្មាន​សង្គ្រាម ខ្ញុំ​ប្រហែល​ជា​ត្រូវ​បាន​ចិញ្ចឹម​បែប​ផ្សេង ហើយ​​ឪពុកម្ដាយ​ខ្ញុំ​ក៏​ប្រហែល​ជា​ប្រើ​វិធី​ប្រដៅ​កូន​បែប​ផ្សេង​។ លទ្ធផល​ភាគ​ច្រើន​ចេញ​ពី​ភាព​ក្រីក្រ និង​ខ្វះ​ការ​អប់រំ​»។

លោក សុខម៉ៅ ចាប់​ផ្ដើម​​​ប្រែ​ក្លាយ​ការ​ឈឺ​ចាប់​ទៅ​ជា​ពាក្យ​ពេចន៍​ក្នុង​សៀវភៅ​​ ដែល​លោក​បាន​សម្រេច​​បោះពុម្ព​ក្នុង​ក្ដី​រំពឹង​ផ្សព្វផ្សាយ​សារ និង​ចំណេះដឹង​អំពី​ជំងឺ​ផ្លូវ​ចិត្ដ​នៅ​កម្ពុជា​ ជា​ពិសេស​ជំងឺ​ផ្លូវ​ចិត្ដ​ត​ជំនាន់​ពី​ឪពុក​ម្ដាយ​ទៅ​កូន​។

សៀវភៅ​នេះក៏​​ជា​ឱសថ​ព្យាបាល​ផ្លូវ​ចិត្ដ​ដល់​​រូប​លោក​​។

លោក​បន្ថែម​ថា អ្នក​ជំនាញ​ផ្នែក​ផ្លូវ​ចិត្ដ និង​អ្នក​ព្យាបាល​ជំងឺ​ផ្លូវ​ចិត្ដ ​គឺ​ជា​បុគ្គល​សំខាន់​ដែល​អាច​ជួយ​អ្នក​ជំងឺ​ដោះស្រាយ​បញ្ហា​ទាំង​នេះ​។

សៀវភៅ «Black» មាន​​លក់​នៅ​ Monument Books, Swarng Cafe and Bookstore, ហាង​សៀវភៅ Kinokuniya ផ្សារ​អ៊ីអន ​២ សែនសុខ, Le Story និង​ វេបសាយ​ Amazon៕

អត្ថបទគួរចាប់អារម្មណ៍

  • ខេត្តបាក់និញៈ សួនឧស្សាហ​កម្ម​ Yen Phong 1 Industrial Park នៅខេត្ត Bac Ninh ភាគខាងជើង​បាន​ក្លាយជា​​សួនឧស្សាហ​កម្មលើក​ដំបូង​នៅក្នុងប្រទេស​វៀតណាម ដែលទទួល​បាន​​បណ្ដាញ​ទូរគមនា​គមន៍​ 5G ដោយ​បច្ចេកវិទ្យាថ្មីនេះ​​ បានដាក់​​ឲ្យដំណើរការ​នៅទីតាំងនោះ​ដោយ​ក្រុមហ៊ុន Viettel កាល​ពីថ្ងៃព្រហស្បតិ៍។​​

  • ភ្នំពេញៈ កម្ពុជា​នាំចេញ​ទំនិញ​ទៅ​ទីផ្សារ​អាមេរិក​មានតម្លៃ​ជាង ៦ ​ពាន់​លាន​ដុល្លារ​ ក្នុង​រយៈពេល​ ១១ ​ខែ ឆ្នាំ​ ២០២០ កើន​ជាង ២២ ​ភាគរយ​ធៀបនឹង​រយៈពេល​ដូចគ្នា​ឆ្នាំ​ ២០១៩ ខណៈ​ទំហំ​ពាណិជ្ជកម្ម​ទ្វេភាគី​មានតម្លៃ​ជាង ៦,៣ ​ពាន់​លាន​ដុល្លារ​។ នេះ​បើ​យោងតាម​ទិន្នន័យ​ពី​ការិយាល័យ​ពាណិជ្ជកម្ម​អាមេរិក​។

  • ភ្នំពេញៈ ត្រឹម​រយៈពេល​ជិត​ ១ ​ខែ​ប៉ុណ្ណោះ​ចាប់ពី​ថ្ងៃទី​ ២០ ធ្នូ ដល់​ថ្ងៃទី​ ១៧ មករា ពលករ​ខ្មែរ​ដែល​បាន​វិលត្រឡប់​មកពី​ប្រទេស​ថៃ​តាម​ច្រក​នៃ​បណ្តា​ខេត្ត​ជាប់​ព្រំដែន​កម្ពុជា-ថៃ​ចំនួន​ ៦៩ ​នាក់ ​ត្រូវបាន​រកឃើញ​វិជ្ជមាន​កូវីដ​ ១៩ ដោយ​ក្នុង​នោះ​ពលករ​ដែល​បាន​ព្យាបាល​ជាសះស្បើយ​ ២១ ​នាក់​។

  • ស្ទឹងត្រែងៈ កម្លាំង​នគរបាល​ប្រឆាំង​គ្រឿងញៀន​គ្រោង​នឹង​បញ្ជូន​បុរស​ជនជាតិ​ឡាវ​​ ២ ​នាក់ និង​វត្ថុតាង​គ្រឿងញៀន​ជិត​ ៥០ ​គីឡូក្រាម​ទៅ​តុលាការ​នៅ​ព្រឹក​ថ្ងៃ​ចន្ទ​នេះ​ ខណៈ​ដែល​សមត្ថកិច្ច​កម្ពុជា​កំពុង​សហការ​ជាមួយ​សមត្ថកិច្ច​ឡាវ​ ដើម្បី​តាម​រក​ចាប់ខ្លួន​ជនជាតិ​ឡាវ​ ៤ ​នាក់​ទៀត​ដែល​រត់គេចខ្លួន​។

  • ភ្នំពេញៈ លោក ហង់ជួន ណារ៉ុន រដ្ឋមន្ត្រី​ក្រសួង​អប់រំ ​យុវជន និង​កីឡា​បាន​ដឹកនាំ​កិច្ចប្រជុំ​ដាក់​ចេញ​វិធានការ​បន្ថែម​ដល់​សាលារៀន​ដែល​កំពុង​ត្រូវបាន​ប្រើប្រាស់​ជា​មណ្ឌល​ចត្ដាឡីស័ក ពិសេស​សាលារៀន​តាម​ខេត្ដ​ជាប់​ព្រំដែន​ប្រទេស​ថៃ និង​វៀតណាម​ដើម្បី​ធ្វើយ៉ាងណា​ធានា​ផ្ដល់​ការសិក្សា​ដល់​សិស្ស​គ្រប់គ្នា​ក្នុង​ឆ្នាំ​សិក្សា​ថ្មី​នេះ​។

  • ភ្នំពេញៈ លោក​ឧបនាយករដ្ឋមន្ត្រី ស ខេង រដ្ឋមន្ត្រី​ក្រសួង​មហាផ្ទៃ​បាន​ណែនាំ​ឱ្យ​អាជ្ញាធរ​គ្រប់លំដាប់​ថ្នាក់​លុបបំបាត់​ការបង្ក​សំឡេង​រំខាន​លើស​កម្រិត​ដោយ​យានយន្ដ​គ្រប់​ប្រភេទ និង​លុបបំបាត់​កន្លែង​កែច្នៃ​បំពង់​ស៊ី​ម៉ាំង​ដែល​បង្ក​ភាព​រំខាន​ដល់​អារម្មណ៍ និង​សិទ្ធិ​រស់នៅ​របស់​ពលរដ្ឋ