The Phnom Penh Post Search

Search form




Logo of Phnom Penh Post newspaper Phnom Penh Post - យុវជន ​ពោធិ៍សាត់ ​ប្រើ​ថ្ងៃ​បុណ្យ​ចូល​ឆ្នាំថ្មី​ជាកិច្ច​កតញ្ញូ​ដល់គ្រូ




យុវជន ​ពោធិ៍សាត់ ​ប្រើ​ថ្ងៃ​បុណ្យ​ចូល​ឆ្នាំថ្មី​ជាកិច្ច​កតញ្ញូ​ដល់គ្រូ

Content image - Phnom Penh Post
ក្រុម​របាំ​ខេត្ដ​ពោធិ៍​សាត់ សម្តែង​ក្នុង​ទិវា​វប្បធម៌​ឆ្នាំ ២០១៦​ អបអរសាទរ​ថ្ងៃ​បុព្យ​ចូលឆ្នាំ​ប្រពៃណី​ជាតិ​។ រូប សហការី

យុវជន ​ពោធិ៍សាត់ ​ប្រើ​ថ្ងៃ​បុណ្យ​ចូល​ឆ្នាំថ្មី​ជាកិច្ច​កតញ្ញូ​ដល់គ្រូ

ពោធិ៍សាត់ៈ ឈុតអាវ​យឺត​ដ៏​ស្រស់​ស្អាត​ដែលមាន​រចនានូវ​រូបផ្តិល​ប្រាក់ និង​រូបសំណាក​វីរបុរស​ដ៏​ក្លាហាន​អតីតជា​មេទ័ព​ខ្មែរគឺ​លោក​តា​ឃ្លាំង​មឿង កងដៃ​ជ័រមាន​សារ «I Love Pursat ឬ I Love Cambodia» ក្រមា​ខ្មែរ​ និង​មួកស្លឹក​ត្នោត​នឹងក្លាយ​ជាចំណែក​មួយ​ចូលរួម​នៃ​មូលនិធិ​សប្បុរសធម៌​ និង​ភាពកតញ្ញូ ដើម្បី​ជួយដល់​លោកគ្រូ ​អ្នកគ្រូ​សាលា​បឋមមួយ​ ដែលបាន​ចូលនិវត្តន៍ ក្នុង​ឱកាស​ធ្វើពិធី​សង្ក្រាន្ត​កោះសំពៅ​មាស​ពោធិ៍សាត់​ឆ្នាំ​នេះ។

សង្ក្រាន្ដកោះ​សំពៅ​មាស​ពោធិ៍សាត់​នេះ​ នឹង​ធ្វើនៅ​ថ្ងៃចូល​ឆ្នាំប្រពៃណី​ជាតិខ្មែរ​ ចាប់ពី​ថ្ងៃទី ១៣​ ដល់​ថ្ងៃទី ១៦ ខែមេសា​ ខាងមុខ​ នៅ​ឯបរិវេណ​នៃកោះ​សំពៅ​មាស ដែលមាន​ទីតាំង​ស្ថិតនៅ​ចំពី​មុខសាលា​ខេត្ត​ពោធិ៍សាត់​ ដែល​មានទំហំ​ផ្ទៃដី​ប្រមាណ​ជិត ២ ហិកតា។

នេះជា​សកម្មភាព​សប្បុរស​ធម៌​ ដែលគេ​កម្របាន​ឃើញ​ថាក្រុម​យុវជនខ្មែរ​សម័យ​ទំនើប​ ចាប់អារម្មណ៍​ធ្វើណាស់​ក្រៅពី​នាំគ្នា​រៀបចំ​គម្រោង​ដើរលេង​ នៅ​ថ្ងៃបុណ្យ​ប្រពៃណី​ជាតិខ្មែរ​មួយនេះ។

យុវជន ជិន មុនីវឌ្ឍនៈ ជាសិស្ស​ថ្នាក់ទី ១២ នៅ​វិទ្យាល័យ​ពោធិ៍សាត់ ដែល​ជាសមាជិក​នៃ​ក្រុម​យុវ​ជនខេត្ត​ពោធិ៍សាត់​ឈ្មោះ​ I Love Pursat ដែលជា​អ្នក​រៀបចំ​មូលនិធិ​សប្បុរសធម៌​មួយ​ដើម្បី​រកប្រាក់​ចំណេញ​ពីការ​លក់វត្ថុ​អនុស្សាវរីយ៍​ខាងលើ ​បង្ហើប​ឲ្យដឹងថា៖ «យើងមាន​អាវយឺត​ចំនួន ៤០០ មាន​ពីរពណ៌ជា​ជម្រើស​ គឺពណ៌ស និងខ្មៅ​ តែមាន​គ្រប់ទំហំ​ កងដៃជ័រ​ច្រើន​ជម្រើស​មានចំនួន ៤០០ ក្រមាខ្មែរ​ច្រើនជម្រើស​ចំនួន ១៥០ និងមួកត្នោត​ចំនួន ២០០ ដាក់លក់​ជូនប្រជា​ពលរដ្ឋខ្មែរ​ នៅក្នុង​ពិធីសង្ក្រាន្ត​កោះសំពៅ​មាស​ពោធិ៍សាត់​នេះ​»។

Content image - Phnom Penh Post
ស្ទីកឃ័រ​ផ្សព្វ​ផ្សាយ​ទិញ​អាវយឺត​របស់​ក្រុម​យុវវ័យ​ពោធិ៍សាត់ I Love Pursat ។

ជិន មុនីវឌ្ឍនៈ ​ឲ្យ​ដឹងថា ក្រុមខ្លួន​បានកំណត់​យកសាលា​បឋម​សិក្សា​ពោធិ៍សាត់​មុនសិន​ជាជំហាន​ដំបូង​របស់យើង​ សម្រាប់​ការ​ផ្តល់ជូន​នូវប្រាក់​សប្បុរសធម៌​បានមក​ពីការលក់​វត្ថុអនុស្សាវរីយ៍​ខាងលើ​។

យុវជន​នេះក៏បាន​ប្រាប់​ឲ្យ​ដឹង​តម្លៃវត្ថុ​អនុស្សាវរីយ៍​ទាំងនោះ​ថា៖ «​អាវយឺត​មួយតម្លៃ ២ ម៉ឺនរៀល កងដៃ​មួយ ៤ ពាន់​រៀល ក្រមាមួយ​តម្លៃ ១២០០០ រៀល និង​មួក​ស្លឹក​ត្នោត​មួយ​តម្លៃ ៤ ពាន់រៀល ដែល​នឹងដាក់​លក់​នៅ​ស្តង់​យើង​តែម្តង»។

ដោយសារ​តែនេះ​ជា​ការ​ចាប់ផ្តើមដុះ​ចេញ​គំនិតបង្កើត​មូលនិធិ​សប្បុរស​ធម៌ និងជាកិច្ច​កតញ្ញូ​ជួយដល់​លោកគ្រូ និង​អ្នកគ្រូចូល​និវត្តន៍​ ក្រៅពី​មានបំណង​ចង់ឃើញ​ប្រជាពលរដ្ឋ​នៅក្នុង​ខេត្តចូល​រួម​សប្បាយ​​រីករាយ​លេងល្បែង​ប្រជា​ប្រិយ​ រាំលេង​កម្សាន្តនា​ថ្ងៃបុណ្យ​ចូលឆ្នាំ​ថ្មីនោះ ក្រុមយុវជន​ពោធិ៍សាត់​ឈ្មោះ​ I Love Pursat ក៏​ទទួច​ចង់ឲ្យ​មានការ​ជាវ​វត្ថុ​អនុស្សាវរីយ៍​របស់​ពួកគេផង​ដែរ។

មុនីវឌ្ឍនៈ បាន​បន្ថែមថា៖ «នាឱកាស​សង្ក្រាន្ត​នៅ​កោះសំពៅ​មាស​នេះ សូម​ពុកម៉ែ បងប្អូន​ និង​មិត្ត​យុវ​វ័យ​ទាំង​អស់​ជួយជាវ​ឲ្យច្រើន ដើម្បី​រួមចំណែក​ជួយដល់​លោក​គ្រូអ្នកគ្រូ​ ដែល​ចូលនិវត្តន៍​ បង្រៀននៅ​ឯសាលា​បឋម​ពោធិ៍សាត់​របស់​យើងផង!»៕​

អត្ថបទគួរចាប់អារម្មណ៍