The Phnom Penh Post Search

Search form




Logo of Phnom Penh Post newspaper Phnom Penh Post - យុវជន​-យុវតី ​​១ ក្រុម ​ស្ម័គ្រ​​ចិត្ត​​​​បង្កើត​គម្រោង​​បណ្ដាញ​សង្គម​ជួយ​​កសិករ​លក់​​ផលិតផល​




យុវជន​-យុវតី ​​១ ក្រុម ​ស្ម័គ្រ​​ចិត្ត​​​​បង្កើត​គម្រោង​​បណ្ដាញ​សង្គម​ជួយ​​កសិករ​លក់​​ផលិតផល​

Content image - Phnom Penh Post
សមាជិក​សកម្ម ៥ នាក់ ដែល​សុទ្ធសឹង​ជា​និស្សិត​ទើបបញ្ចប់ការសិក្សា និង​កំពុង​រៀនជំនាញផ្សេង​ទៀត​។ រូបថត សហ​ការី

យុវជន​-យុវតី ​​១ ក្រុម ​ស្ម័គ្រ​​ចិត្ត​​​​បង្កើត​គម្រោង​​បណ្ដាញ​សង្គម​ជួយ​​កសិករ​លក់​​ផលិតផល​

ភ្នំពេញ៖ ដោយ​សង្កេត​ឃើញ​ពី​ការ​ប្រឈម​របស់​​ប្រជាកសិករ​កម្ពុជា​​មួយ​ចំនួន​ ជាពិសេស​អ្នក​នៅ​ទី​ដាច់​ស្រយាល​ ដែល​បាត់បង់​ទីផ្សារ​​​​ព្រោះ​តែ​វិបត្តិ​កូវីដ យុវជន ​១ ក្រុម ​បាន​រួមគ្នា​បង្កើត​គម្រោង​ COVID Farmer Hacker ដើម្បី​ជួយ​​អ្នក​ខិតខំ​ដាំដុះ​តែ​ត្រូវ​រងគ្រោះ​ពី​ការ​រំខាន​ដល់​​​សេដ្ឋកិច្ច​​បង្ក​ដោយ​វីរុស​កូរ៉ូណា។​

ក្នុង​ចំណោម​សមាជិក​ COVID Farmer Hacker សរុប​​ ១០ នាក់ ដែល​​​​ភាគ​ច្រើន​ជា​និស្សិត​ដែល​ទើប​បញ្ចប់​ការ​សិក្សា ​និង​កំពុង​បន្ត​ទៅ​ជំនាញ​​ផ្សេង​ទៀត សមាជិក​សកម្ម ៥ នាក់ គឺ​៖ ដួង ចាន់ដារិទ្ធិ​ អាយុ ២៣ ​ឆ្នាំ រៀល ពីតុន ​២០ ឆ្នាំ វ៉ាង រតនមាលតី​ ២០ ឆ្នាំ អ៊ាន​ ស្រីល័ក្ខ​ ២២ ឆ្នាំ និង​ ហេង​ សុធាវី ២១ ឆ្នាំ​។

ពួក​គេ​ក៏​ជា​អ្នក​​​ផ្ដួចផ្ដើម​គំនិត​ និង​ធ្វើ​សំណើ​​​ទៅ​កាន់​ Impact​ Hub​ ដែល​​ជា​​សហគមន៍​ធំ​មួយ​នៅ​កម្ពុជា​​ផ្ដល់​ការ​គាំទ្រ​​​ដល់​យុវជន​ខ្មែរ​ក្នុង​ការ​អភិវឌ្ឍ​សហគ្រិនភាព​ និង​​ផ្ដល់​ភាពវិជ្ជមាន​ដល់​សង្គម​។

សមាជិក​ក្រុម COVID Farmer Hacker​ សុធាវី​ និង ​ពីតុន​ បាន​ប្រាប់​ ភ្នំពេញ ប៉ុសិ៍្ត​ ពី​មូលហេតុ​នៃ​ការ​បង្កើត​ជា​ក្រុម​​នេះ​យ៉ាង​​ដូច្នេះ​ថា៖ «ដំបូង​ដោយសារ​យើង​ឃើញ​ថា​ បន្លែ​ ផ្លែឈើ​ដែល​កសិករ​យើង​ដាំដុះ​ច្រើន​ ការ​នាំ​ចូល​មក​ក៏​ច្រើន​ កាន់​តែ​មាន​ការ​បិទ​ច្រក​ទៀត​នោះ​ ធ្វើ​ឱ្យ​ពួក​គាត់​ពុំ​អាច​លក់​ចេញ​​បាន​ ដូច្នេះ​ពួក​យើង​​ដែល​ជា​មិត្តភក្ដិ​នឹង​គ្នា​​ក៏​មូល​មតិ​គ្នា​សួរ​ថា​ អ្នក​ណា​ចាប់​អារម្មណ៍​ខ្លះ​ ហើយ​អាច​ជួយ​ និង​ទទួល​ខុស​ត្រូវ​ខាង​ណា​បាន​ខ្លះ​?»។

Content image - Phnom Penh Post
គោលដៅ​ ១ ​​នៃគម្រោង​ គឺ​​​ឱ្យកសិករ​អាច​លក់កសិផល ​​​ដោយពុំ​ចាំបាច់មានឈ្មួញ​កណ្ដាល​។ រូបថត សហ​ការី

គម្រោង​នេះ​ ​គឺ​ជា​គម្រោង​​ជួយ​ដល់​កសិករ​ដែល​មាន​ឧបសគ្គ​លក់​​កសិផល​​ ​ដោយសារ​វិបត្តិ​កូវីដ និង​គ្រោះ​ធម្មជាតិ​ផ្សេង​ទៀត​ ដោយ​បូក​រួម​ជាមួយ​​ការ​ជួយ​ផ្ដល់​​បច្ចេកទេស​ដាំដុះ​ផង​ដែរ​ ប្រសិន​បើ​គម្រោង​នេះ​​ដំណើរការ​​​ទៅ​ជោគជ័យ​។

ដារិទ្ធ ​បច្ចុប្បន្ន​ជា​និសិ្សត​ពេទ្យ​បាន​រៀបរាប់​ពី​គម្រោង​ដែល​អាច​សង្ខេប​ជា ​៣ ​ដំណាក់កាល​ធំៗ​ដូច​តទៅ​​៖ «ទី១​ គឺ​ពួក​យើង​​រក​គ្នា​ក្នុង​ការ​បង្កើត​គម្រោង។ ទី២ ពួក​យើង​រៀបចំ​គម្រោង​ ហើយ​ធ្វើ​ការ​បង្ហោះ​ក្នុង​បណ្ដាញ​សង្គម​ហ្វេសប៊ុក​ ដើម្បី​ឱ្យ​គេ​ស្គាល់​​ពួក​យើង​ច្រើន​ ក្នុង​នោះ​ក៏​បូក​សរុប​ជាមួយ​ការ​ជួយ​បង្ហោះ​ត​ ទៅ​ដល់​កសិករ​ណា​ដែល​គាត់​កំពុង​រក​អ្នកទិញ​។ ទី៣​ បើ​យើង​មាន​ការ​ទុក​ចិត្ត​ហើយ​មាន​អ្នក​ជួយ​ឧបត្ថម្ភ​ច្រើន​ ពួក​យើង​នឹង​ធ្វើ​ការ​ចុះ​ទៅ​ផ្ទាល់​​ទៅ​តាម​តំបន់​ណា​ដែល​ប្រជាជន​ពិតជា​មាន​បញ្ហា​មែន​ ​ហើយ​ក៏​ជួយ​ពន្យល់​ណែនាំ​ពី​របៀប​ដាំដុះ​ និង​ជម្រើស​​​ក្នុង​ការ​ដាំ​ដំណាំ​យ៉ាងណា​ឱ្យ​ងាយ​ស្រួល​បង្កើត​ទីផ្សារ»​។

បច្ចុប្បន្ន​ COVID ​Farmer ​Hacker ​​ទើប​តែ​អាច​នៅ​ជំហាន​ទី២ ​ដោយ​ជួយ​បង្ហោះ​ត​ជូន​ប្រជាកសិករ​ក្នុង​ការ​រក​ទីផ្សារ​។​

ធាវី​ អតីត​និស្សិត​ CamEd ជំនាញ​គណនេយ្យ​ និង​ហិរញ្ញវត្ថុ​បាន​បន្ត​ថា​៖ «ស្ថានភាព​ពួក​យើង​សព្វថ្ងៃ​មាន​តែ​ការ​ជួយ​បង្ហោះ​ព័ត៌មាន​ប្រជាកសិករ​តាម​គណនេយ្យ​ហ្វេសប៊ុក​។ ហើយ​ជួយ​​ឱ្យ​អ្នក​​​មាន​ចំណាប់​អារម្មណ៍​ទាក់ទង​​ទៅ​កសិករ​ផ្ទាល់»។

Content image - Phnom Penh Post
បច្ចុប្បន្ន​ក្រុមយុវវ័យ​​ប្រើប្រាស់បណ្ដាញសង្គម​ជួយផ្សព្វផ្សាយ​ពីបន្លែផ្លែឈើ​​របស់កសិករ​។ រូបថត សហ​ការី

បច្ចុប្បន្ន​ ក្រុម​យុវជន-យុវតី​នៃ​គម្រោង COVID ​Farmer ​Hacker ធ្វើ​ការ​​ស្ម័គ្រ​ចិត្ត ដោយ​មិន​រំពឹង​​ទាញ​​ប្រយោជន៍​ពី​គម្រោង​នេះ​ទេ។

ធាវី​ បាន​បន្ត​ថា​៖ «ចំណុច​ពិសេស ​និង​រាប់​ថា​ជា​ភាព​ខ្លាំង​របស់​ពួក​យើង​ គឺ​ពួក​យើង​គ្រាន់​តែ​ជា​ក្រុម​យុវជន​មួយ​ហើយ​ពួក​យើង​មិន​ចង់​បាន​អ្វី​ក្រៅ​ពី​ព្យាយាម​ជំរុញ​​ទឹក​ចិត្ត​កសិករ​ឱ្យ​បន្ត​ការ​ដាំដុះ​។ យើង​បាន​តែ​សង្ឃឹម​ថា​ ​កសិកម្ម​​ក្នុង​ស្រុក​យើង​នឹង​មាន​ការ​រីក​ចម្រើន​អាច​កាត់​បន្ថយ​ការ​នាំ​ចូល។ មួយ​វិញ​ទៀត​ពួក​គាត់​ទាំង​អ្នក​ទិញ ​និង​កសិករ​នឹង​អាច​ទាក់ទង​គ្នា​ផ្ទាល់​មិន​ចាំបាច់​មាន​ឈ្មួញ​កណ្ដាល​»។

ដោយ​ចាត់​ទុក​​​​វិធីសាស្ត្រ​ផ្សារ​ភ្ជាប់​កសិករ និង​ទីផ្សារ​កសិផល​​តាមរយៈ​បណ្ដាញ​សង្គម ​មិន​​ចាំបាច់​ចំណាយ​ទុន​ច្រើន ដារិទ្ធ​ បាន​បង្ហាញ​គោលដៅ​បន្ត​ថា៖​ «ប៉ុន្តែ​បើ​​យើង​មាន​ជំនួយ​ច្រើន​វិញ ​យើង​នឹង​ចុះ​ទៅ​ផ្ទាល់​តាម​ភូមិ​ឃុំ​ដែល​ប្រជាពលរដ្ឋ​មាន​វិបត្តិ​លក់​មិន​ចេញ​ហ្នឹង​តែ​ម្ដង​»៕

អត្ថបទគួរចាប់អារម្មណ៍

  • ភ្នំពេញ: អស់​រយៈពេល​ជិត​ ១១ ​ខែ បន្ទាប់ពី​ការដាក់​លក់​ដំណាក់កាល​ទី​ ១ ​ប្រកប​ដោយ​ជោគជ័យ​កាលពី​ខែធ្នូ​ឆ្នាំមុន Forest Harmony ជា​ក្រុមហ៊ុន​វិនិយោគ​រួម​រវាង​វិនិយោគិន​ក្នុង​ស្រុក និង​វិនិយោគិន​ជនជាតិ​បារាំង​កាលពី​ថ្ងៃ​សៅរ៍ បាន​ប្រកាស​បើក​ដំណើរការ​គម្រោង​អភិវឌ្ឍន៍​ដំណាក់កាល​ទី​ ២ ​របស់ខ្លួន​មាន​ឈ្មោះ​ថា Golf Harmony រួមមាន ទីលាន​វាយ​កូនហ្គោល និង​គម្រោង​អគារ​ខុនដូ​។

  • ភ្នំពេញ៖ បន្ទាប់​ពី​​​ការ​​ប្រឡង​​ប្រណាំង​​​ថត​វីដេអូ ​​ដើម្បី​ផ្សព្វផ្សាយ​​ពី​សក្តានុពល​នៃ​តំបន់​សហគមន៍​​​​ទេសចរណ៍ និង​​​​​អេកូ​ទេសចរណ៍​ ​បាន​រៀបចំ​​ ២ រដូវកាល​មក​​ហើយ​​ ខណៈ​​ការ​ប្រឡង​ប្រណាំង​រដូវកាល​ទី​៣ ​​​ឆ្នាំ ​២០២០​ ក៏​បាន​មក​​ដល់​​​។

  • ភ្នំពេញៈ រដ្ឋមន្ត្រីក្រសួង​អប់រំ​យុវជន និង​កីឡា​លោក​ ហង់ជួន ណារ៉ុន បានអនុញ្ញាត​ជា​​គោលការណ៍​ឱ្យ​គ្រឹះស្ថានសិក្សា​ឯកជន​ទាំងអស់​អាច​ដំណើរការឡើង​វិញ​នូវ​សេវា​រថយន្ត​ដឹក​សិស្ស សេវា​បណ្ណាល័យ សកម្មភាព​អប់រំ​កាយ និង​កីឡា និង​សេវា​អាហារដ្ឋាន ប៉ុន្តែ​ត្រូវអនុវត្ត​នូវ​គោលការណ៍​ប្រតិបត្តិ​ស្តងដា​ (SOP) ​ឱ្យ​ម៉ឺងម៉ាត់​។

  • តាកែវៈ មន្ត្រី​ការពារ​ទេសភាព​បឹង​ព្រែកល្ពៅ​ឱ្យ​ដឹងថា សម្បុក​សត្វ​ចង្កៀលខ្យង​ជាង​ ២ ០០០ ​សម្បុក​ បានបង្ហាញ​វត្តមាន​ជា​លើកដំបូង​ក្នុង​រយៈពេល​ជាង​ ១៥ ​ឆ្នាំ​ ដែល​នេះ​ជា​កំណត់ត្រា​ថ្មី​ដែល​ពុំ​ធ្លាប់មាន​នៅក្នុង​តំបន់​ការពារ​ទេសភាព​បឹង​ព្រែកល្ពៅ​ ស្ថិត​ក្នុងស្រុក​បុរីជលសា និង​ស្រុក​កោះអណ្តែត ខេត្តតាកែវ​។

  • ស្ទឹងត្រែង/ភ្នំពេញៈ គ្រឿងញៀន​ប្រភេទ​មេតំហ្វេតាមីន​ (ice) ​ចំនួន​ ៤១ ​គីឡូក្រាម​ត្រូវ​បាន​មន្ត្រី​អាវុធហត្ថ​ខេត្ត​ស្ទឹងត្រែង​បញ្ជូន​ទៅ​សាលាដំបូង​ខេត្ត​នាថ្ងៃទី​ ២៤ តុលា បន្ទាប់ពី​បង្ក្រាប​នៅ​ស្រុក​បុរី​ឣូរស្វាយសែនជ័យ​ពី​ថ្ងៃ​ទី​ ២៣ តុលា ខណៈ​ម្ចាស់​កំពុង​រត់គេច​ខ្លួន​។

  • ភ្នំពេញៈ ក្រសួង​អប់រំ យុវជន​ និង​កីឡា​កំពុង​សហការ​ជាមួយ​ក្រសួង​ប្រៃសណីយ៍ និង​ទូរគមនាគមន៍ ព្រមទាំង​ដៃគូ​អភិវឌ្ឍន៍ និង​វិស័យ​ឯកជន ដើម្បី​រៀបចំ​តភ្ជាប់​ប្រព័ន្ធ​អ៊ីនធឺណិត​ដល់​គ្រឹះស្ថានសិក្សា​សាធារណៈ​​ក្នុង​រយៈពេល​ ៤ ​ឆ្នាំ​ (​ឆ្នាំ​ ២០២០-២០២៣) ​ដើម្បី​ផ្ដល់​ការរៀន​ និង​ការបង្រៀន​តាមបែប​ឌីជីថល​​ដែល​ការអនុវត្ត​ត្រូវធ្វើ​ឡើងជា​ជំហានៗ​ចាប់ពី​ចុងឆ្នាំ​នេះ​ទៅ​។