ភ្នំពេញៈ ក្រុមយុវជនចំនួន ១២ រូប (ស្រី ២ និងប្រុស ១០) មកពីតំបន់ខេត្តឆ្ងាយៗនៃប្រទេសកម្ពុជារួមមានខេត្តរតនគិរី មណ្ឌលគិរី និងបន្ទាយមានជ័យ ដែលបានមករៀនវគ្គបណ្តុះបណ្តាលផលិតកុនឯកសារនៅមជ្ឈមណ្ឌលបុប្ផាណាអស់រយៈពេល ១ ឆ្នាំពេញនោះនឹងវិលត្រឡប់ទៅស្រុកកំណើតខ្លួនវិញ នៅសប្តាហ៍ក្រោយនេះដើម្បីប្រើចំណេះដឹងរបស់ខ្លួនធ្វើកិច្ចការចងក្រង និងផលិតភាពយន្តឯកសារជួយសហគមន៍រៀងៗខ្លួន។
មានការចាក់បញ្ចាំងភាពយន្តដំបូងនៃគម្រោង «ការបន្លឺសំឡេងរបស់ស្ត្រីជនជាតិដើមភាគតិច និងក្រុមមនុស្សដែលត្រូវបានគេរើសអើង» គឺជាប្រភេទខ្សែភាពយន្តឯកសារចំនួន ១០ រឿងដែលបង្ហាញពីការតស៊ូព្យាយាមនៅក្នុងឆាកជីវិត និងជាស្នាដៃដឹកនាំលើកដំបូងដោយក្រុមសិក្ខាកាមជាយុវជន ១២ រូបមកពី ៣ ខេត្តផ្សេងៗគ្នាត្រូវបានដាក់បញ្ចាំងជូនទស្សនាជាលើកដំបូងកាលពីល្ងាចថ្ងៃទី ៣១ ខែឧសភា ឆ្នាំ ២០១៩ កន្លងមកនៅឯមជ្ឈមណ្ឌលបុប្ផាណានោះ។
លោក ជា សុភាព ដែលជានាយកប្រតិបត្តិនៃមជ្ឈមណ្ឌលបុប្ផាណា បង្ហើបប្រាប់ភ្នំពេញ-ប៉ុស្តិ៍ថា៖ «គម្រោងមានឈ្មោះថា «ការបន្លឺសំឡេងរបស់ស្ត្រីជនជាតិដើមភាគតិច និងក្រុមមនុស្សដែលត្រូវបានគេរើសអើង» ទទួលបានការឧបត្ថម្ភពី VOICE តាមរយៈអង្គការអុកស្វាមកម្ពុជា ស្ថានទូតអូស្ត្រាលីប្រចាំនៅកម្ពុជា និងមូលនិធិ Heinrich Boll និងចូលរួមសហការពី Cambodia Film Commission (CFC)។ ខណៈគម្រោងដំបូងនេះគឺចង់បណ្តុះបណ្តាលដល់យុវជនខ្មែរប្រើចំណេះដឹង និងជំនាញផ្នែកផលិតកុនឯកសារ ដើម្បីជួយដល់សហគមន៍ផ្ទាល់ពួកគេដែលផ្តោតសំខាន់ទៅលើបញ្ហាសង្គមនានា ជាពិសេសនោះបញ្ហាសុខុមាលភាពមាតា និងកូនរបស់ស្ត្រីនៅសហគមន៍ទាំង ៣ ខេត្តដែលជាស្រុកកំណើតរបស់យុវជនទាំង ១២ រូបនោះ។ យើងចង់ឲ្យពួកគាត់ប្រើជំនាញថតវីដេអូ ដើម្បីយកសកម្មភាពទាំងឡាយនៅក្នុងសហគមន៍មកបង្កើតជាខ្សែភាពយន្តឯកសារផ្សេងៗតាមភាពជាក់ស្តែង ក្រោយពីបានរៀនចប់នៅទីក្រុងភ្នំពេញអស់រយៈពេល ១ ឆ្នាំកន្លងមកនោះ»។
នាយកប្រតិបត្តិរូបនេះបន្តថា៖ «នាពេលកន្លងមកយើងបានមើលឃើញនូវបញ្ហាសង្គមមួយចំនួនដែលពាក់ព័ន្ធនឹងស្ត្រីខ្មែរ ជាពិសេសស្ត្រីដែលជាជនជាតិដើមភាគតិចតែម្តង ដោយពួកគាត់បានជួបនឹងបញ្ហាច្បាប់ប្រពៃណីដូចជាការរៀបការទាំងវ័យក្មេងពេក (ចន្លោះវ័យ ១៥-១៦ ឆ្នាំ) ដែលនាំឲ្យពួកគាត់ប្រឈមនឹងបញ្ហាសុខភាព និងបញ្ហាមួយទៀតចង់ផ្លាស់ប្តូរផ្នត់គំនិតរបស់ស្ត្រីដែលគិតថា ស្ត្រីមិនបាច់រៀនសូត្រច្រើនពេកទេនោះផងដែរ ខណៈបញ្ហានេះ យើងក៏ចង់ពន្យល់ឲ្យពួកគាត់យល់ថា ស្ត្រីមានតួនាទីសំខាន់ក្នុងកិច្ចការចូលរួមអភិវឌ្ឍសង្គមជាតិ ដូចបុរសអ៊ីចឹងដែរ គឺថាពួកគាត់ប្រៀបបានទៅនឹងឆ្អឹងខ្នងនៃរាងកាយមនុស្សយើងដែរ»។
ឆ្នាំនេះមជ្ឈមណ្ឌលបុប្ផាណា បានដឹកនាំវគ្គបណ្ដុះបណ្ដាលមួយផ្នែកផលិតភាពយន្តឯកសារដែលចូលរួមពីសិក្ខាកាមចំនួន ១២ រូបមកពីសហគមន៍ជនជាតិដើមភាគតិចនៅក្នុងប្រទេសកម្ពុជាចំនួន ៣ ខេត្តគឺរតនគិរី មណ្ឌលគិរី និងបន្ទាយមានជ័យជាមួយគម្រោងភាពយន្តដំបូងឈ្មោះថា «ការបន្លឺសំឡេងរបស់ស្ត្រីជនជាតិដើមភាគតិច និងក្រុមមនុស្សដែលត្រូវបានគេរើសអើង» ដោយជោគជ័យ។
លោក ជា សុភាព ក៏បានបង្ហើបពីគម្រោងក្រោយដែរថា៖ «សម្រាប់គម្រោងក្រោយទៀត យើងនឹងផ្តោតទៅការអភិរក្សវប្បធម៌ ឬបញ្ហាសង្គមផ្សេងៗទៀត ដោយយើងនឹងងាកទៅរកយុវជន ដែលស្ថិតនៅខេត្តនានាដូចជាខេត្តព្រះវិហារ ស្ទឹងត្រែង និងកោះកុងម្តង»៕