.jpg)
បេក្ខនារីប្រកួតប្រជែង Miss Universe Cambodia 2020 សាន្ត កុសុមៈ កំពុងត្រូវមហាជនចាប់អារម្មណ៍។ រូប ហ្វេសប៊ុក
ភ្នំពេញ៖ ខណៈព្រឹត្តិការណ៍ប្រកួតកញ្ញាឯកចក្កវាឡកម្ពុជាឆ្នាំ ២០២០ (Miss Universe Cambodia 2020) នៅពុំទាន់មានដំណឹងច្បាស់លាស់នៃការប្រកួតប្រជែងនៅឡើយនោះ ស្រាប់តែមានការបង្ហោះរូបភាព និងសារ បញ្ជាក់អំពីលក្ខណសម្បត្តិរបស់បេក្ខនារីមួយចំនួន ដើម្បីបន្ថែមជាល្បោយព័ត៌មានធ្វើឲ្យមានភាពទាក់ទាញចំណាប់អារម្មណ៍ដល់អ្នកលេងបណ្តាញសង្គម ឬក្រុមប្រិយមិត្តដែលនិយមគាំទ្រសម្រាប់វិស័យប្រកួតប្រជែងជ្រើសរើសសម្រស់មួយនេះ។
ជាក់ស្តែងមហាជនភ្ញាក់ផ្អើលចំពោះលក្ខណសម្បត្តិរបស់យុវតីម្នាក់មានឈ្មោះថា កញ្ញា សាន្ត កុសុមៈ ដែលមានសមត្ថភាពចេះដល់ទៅ ៤ ភាសា ហើយទំនងជាបេក្ខនារីដាក់ពាក្យចូលប្រកួតកញ្ញាឯកចក្កវាឡកម្ពុជាឆ្នាំ ២០២០ នេះផងដែរ។
តាមគេហទំព័រមួយឈ្មោះ Miss Cambodia បានសរសេរសារ និងរូបភាពរបស់កញ្ញា សាន្ត កុសុមៈ ដោយបង្ហោះថា៖ «Road to Miss Universe Cambodia 2020 នាងមានឈ្មោះថា សាន្ត កុសុមៈ វ័យ ២០ ឆ្នាំ មានកម្ពស់ ១,៧ ម៉ែត្រ។ នាងមានមុខរបរគ្រប់គ្រងសណ្ឋាគារមួយកន្លែង និងធ្វើជាអ្នកបកប្រែ។ ចំពោះការសិក្សាបានបញ្ចប់កម្រិតវិទ្យាល័យ និងបន្តការសិក្សានៅសាកលវិទ្យាល័យផ្នែកអក្សរសាស្រ្តអង់គ្លេស។ កញ្ញាចេះនិយាយ ភាសាខ្មែរ អង់គ្លេស កូរ៉េ និងចិន។ ទេពកោសល្យវិញនាង ចេះច្រៀងចម្រៀងយ៉ាងពីរោះ ទាំងភាសាជាតិ និងអន្តរជាតិ។ កុំភ្លេចគាំទ្ររូបកញ្ញាផង នាងក៏មិនធម្មតានោះដែរ ទាំងការឆ្លើយនូវសំណួរ និងការដើរម៉ូដនោះ!»។
បើតាមការបង្ហើបឲ្យដឹងពីលោក ម៉ែន និមលរ័តន៍ អតីតប្រធានប្រតិបតិ្តនៃ Arise- Agency ដែលទទួលបន្ទុកបណ្តុះបណ្តាល និងបញ្ជូនបេក្ខភាពកញ្ញាឯកកម្ពុជាប្រចាំឆ្នាំកន្លងមក តែរូបលោកក៏បានដឹងពីព័ត៌មានខ្លះនៃការដំណើរការប្រកួតប្រជែងជ្រើសរើសកញ្ញាឯកចក្កវាឡកម្ពុជាប្រចាំឆ្នាំ ២០២០ នេះដែរ ដោយបានបង្ហើបថា៖ «បើតាមខ្ញុំបានដឹងនោះ កម្មវិធីប្រកួតប្រជែងរកបេក្ខនារី Miss Universe Cambodia 2020 នៅពុំទាន់កំណត់ប្រកួតនៅឡើយនោះទេសម្រាប់ឆ្នាំ ២០២០ នេះ ដោយសារតែបញ្ហាជំងឺកូវីដ ១៩ នៅមិនទាន់អនុញ្ញាតឲ្យអ្នករៀបចំកម្មវិធីអាចដំណើរការវាបាន។ ដូច្នេះ សម្រាប់ព័ត៌មាននានាដែលពាក់ព័ន្ធរឿងប្រកួត ឬបេក្ខនារីនានានោះ ក៏ទំនងជាមិនមានអ្វីច្បាស់លាស់នៅឡើយដែរ»។
គួររំឭកដែរថា បេក្ខនារីជាកញ្ញាឯកចក្កវាឡកម្ពុជា នាឆ្នាំកន្លងមកនោះ រួមមានកញ្ញា សំណាង អេលីណា ជាកញ្ញាឯកចក្កវាឡកម្ពុជាឆ្នាំ ២០១៩ កញ្ញា រឿន ណាត ជាកញ្ញាឯកចក្កវាឡកម្ពុជាឆ្នាំ ២០១៨ និងកញ្ញា ប៊ី សុធារី កញ្ញាឯកចក្កវាឡកម្ពុជាឆ្នាំ ២០១៧៕
